ખાખીગીરી / 'આને લૂંટ કેસમાં પૂરી દો અંદર' : આણંદમાં ફરિયાદીને જ પોલીસે ખોટા કેસમાં પુર્યા જેલમાં, વાયરલ વીડિયોથી પોલીસબેડામાં હડકંપ

• આણંદમાં પોલીસની દાદાગીરી
• ગૌરક્ષકોને ખોટા લૂંટ કેસમાં ફસાવાનો દાવો
• બેફામ અપશબ્દો બોલ્યા

ગુજરાતમાં અવાર નવાર પોલીસની દાદગીરીના વીડિયો વાયરલ થતાં હોય છે ક્યાંક અંગત અદાવતમાં પોલીસ વૃદ્ધને ઢોર માર મારી રહી છે તો ક્યાંય મદદ માગવા આવેલા લોકોને અપશબ્દો આપી તગડી મુકાય છે.
  
PI આર.એન. વિરાણીની ખાખીગીરી

આણંદના તારાપુર પોલીસની દાદાગીરી સામે આવી છે,PI આર.એન. વિરાણી ખાખીનો રૌફ ઝાડી રહ્યા હોય તેવું વીડિયો સ્પષ્ટ દેખાઈ રહ્યું છે. વીડિયોમાં ગૌરક્ષકોને ને પોલીસ ખોટા કેસમાં ફસાવતી હોવાનો દાવો થઈ રહ્યો છે. ફરિયાદ કરવા ગયેલા ગૌરક્ષકોને PI આર.એન. વિરાણી તે કેમ પેલાને માર્યો એમ કહી ફરિયાદ કરવા આવેલા શખ્સો પર ચડી બેઠા અને મન ફાવે તેમ અપશબ્દો બોલી ફરિયાદી ગૌરક્ષકોને જેલમાં પૂરી દેવાની ધમકી સાથે ધક્કા મારતો વીડિયો વાયરલ થતાં પોલીસ બેડામાં હડકંપ મચ્યો છે. 

ફરિયાદ કરવા ગયેલા ગૌરક્ષકોને જ પોલીસે કસ્ટડીમાં પુર્યા

આણંદમાં બનેલી આ ઘટનાનો વીડિયો સોશિયલ મીડિયામાં ખૂબ વાયરલ થઈ રહ્યો છે. દાવા પ્રમાણે પીડિતે પોલીસને ફોન કરી ગૌવંશ બચાવવા મદદ માગી હતી, પણ મદદ ન મળતા ફરિયાદી ગૌરક્ષકો તારાપુર પંથકમાં પોલીસ આ અંગે રજૂઆત કરી હતી. રજૂઆત કરવા જતાંની સાથે PI આર.એન. વિરાણી ફરિયાદીને અપશબ્દો બોલી અડધૂત કરી નાખ્યા હતા. ત્યાંથી મામલો શાંત ન પડતાં ગૌરક્ષકો પોલીસની આ  કાર્યવાહી સામે રોષ દાખવતાં PI આર.એન. વિરાણી વધુ ભડકી ઉઠયા અને લૂંટના કેસમાં ફસાવી દેવાની પોલીસે ધમકીઓ આપી, બાદમાં ફરિયાદી સાથે આવેલા અન્ય લોકોને પણ પોલીસે કસ્ટડીમાં પુર્યા છે. 

જિલ્લા પોલીસ વડાને કરાશે રજૂઆત

તારાપુર પંથકમાં પોલીસની કામગીરી સામે રોષ જોવા મળી રહ્યો છે. ગૌરક્ષકો જિલ્લા પોલીસ વડાને સમગ્ર ઘટના અંગે જાણ કરવાની તૈયારીમાં છે અને PI આર.એન. વિરાણી સામે કડક કાર્યવાહી કરવાની માંગ કરી રહ્યા છે.