મદદે આવી ખાખી / લઠ્ઠાકાંડે પિતા છીનવ્યા, 4 બાળકોને છાનાં રાખવા મા પણ નથી: શિક્ષણ માટે પોલીસે લીધી જવાબદારી

• બરવાળાના દેવગણા ગામે પોલીસની સરાહનીય કામગીરી
• પિતાનું મૃત્યુ થતા અનાથ થયેલા 4 બાળકોને પોલીસે દત્તક લીધા
• પોલીસે બાળકોના અભ્યાસ સહિતની તમામ જવાબદારી ઉપાડી લીધી

બોટાદના દેવગણા ગામમાં અનાથ થયેલા બાળકોની વ્હારે પોલીસ આવતા પોલીસની સરાહનીય કામગીરી અહીં જોવા મળી રહી છે. કારણ કે બરવાળા લઠ્ઠાકાંડમાં ઝેરી દારૂએ અનેક પરિવારોના ઘર તબાહ કરી દીધા છે. ત્યારે દેવગણા ગામમાં અનાથ થયેલા 4 બાળકોને પોલીસે દત્તક લઇ લીધા છે.

પોલીસે બાળકોના અભ્યાસ સહિતની તમામ જવાબદારી ઉપાડી લીધી

મહત્વનું છે કે, આ ચારેય બાળકોના પિતા કનુભાઈ સેખલિયાનું લઠ્ઠાકાંડમાં ઝેરી કેમિકલના કારણે મૃત્યુ થયું હતું. સાથે આ બાળકોની માતાનું પણ અગાઉ અવસાન થઇ ચૂક્યું છે. જેના લીધે પિતાનું મૃત્યુ થતા ચારેય બાળકો અનાથ થઇ ગયા હતા. પરંતુ કહેવાય છે ને કે જેનું કોઇ નથી હોતું તેના ભગવાન હોય છે. ભગવાન કોઇને કોઇ રીતે મદદ જરૂરથી કરે છે. ત્યારે આ ચારેય બાળકોની જવાબદારી હવે પોલીસે ઉપાડી લીધી છે. પોલીસે બાળકોના અભ્યાસ સહિતની તમામ જવાબદારી પોતાના શિરે લઇ લીધી છે. હાલમાં આ ચારેય બાળકો કનુભાઈના મોટા ભાઈ સાથે રહે છે.

લઠ્ઠાકાંડમાં અનેક પરિવારના લોકોની જિંદગી હોમાઇ ગઇ

બોટાદ લઠ્ઠાકાંડની ઘટનાએ સમગ્ર ગુજરાતને હચમચાવી નાખ્યું છે. ત્યારે આ કાંડમાં અનેક પરિવારના લોકોની જિંદગી હોમાઇ ગઇ છે. જેમાં બોટાદના દેવગણા ગામે 5 લોકોના મૃત્યુ થયા છે. જેમાંથી માતા વિનાના 4 બાળકોના પિતાનું મૃત્યુ થતા બાળકો અનાથ થઇ ગયા હતા.

બોટાદના દેવગણા ગામે 35થી 60 વર્ષની ઉંમરના 5 લોકોના મૃત્યુ

મહત્વનું છે કે, આ લઠ્ઠાકાંઠમાં અનેક ગામડાઓમાં કેટલાંય પરિવારના લોકોએ જીવ ગુમાવ્યો છે. જેથી મૃતક પરિવારોમાં ભારે માતમ છવાયો છે. ત્યારે બોટાદના દેવગણા ગામે 35થી 60 વર્ષની ઉંમરના 5 લોકોના મૃત્યુ થયા છે.