દ્વારકા જિલ્લામાં ગુજસીટોક હેઠળ બિચ્છુ ગેંગના 12 શખ્સોને ઉઠાવી લઈ પોલીસે કાર્યવાહી હાથ ધરી છે.
દ્વારકા જિલ્લામાં ગુજસીટોક અંતર્ગત પ્રથમ ગુનો
બિચ્છુ ગેંગ સામે દ્વારકા જિલ્લા પોલીસ એક્શનમાં
મીઠાપુર પંથકની કુખ્યાત બિચ્છુ ગેંગ સામે કાર્યવાહી
દ્વારકા જિલ્લામાં ગુજસીટોક અંતર્ગત પ્રથમ ગુનો નોંધાયો છે. દેવભૂમિ દ્વારકા, મીઠાપુર પંથકમાં દોઢ દાયકાથી બિચ્છુ ગેંગે હાહાકાર મચાવ્યો હતો. ક્રાઇમનું ઝેર ઓકતી બિચ્છુ ગેંગ સામે દ્વારકા જિલ્લા પોલીસ એક્શનમાં આવી છે. બિચ્છુ ગેંગના 12 શખ્સોને ઝડપીને પોલીસે કાર્યવાહી હાથ ધરી છે.
હત્યાના પ્રયાસ, લૂંટ, ખંડણી જેવા અનેક ગુનામાં શખ્સોની સંડોવણી
દેવભૂમિ દ્વારકા જિલ્લા એસપી નિતેશ પાંડેયના માર્ગદર્શન હેઠળ એલ.સી.બી.ની ટીમ દ્વારા ગુપ્ત રાહે તપાસ હાથ ધરાઈ હતી. જેમાં દેવભૂમિ દ્વારકાના ઓખા મંડળ અને મીઠાપુર વિસ્તારમાં ૧૫ વર્ષ ઉપરાંતથી લાલુભા સાજાભા સુમણીયા તથા વનરાજભા પાલાભા સુમરીયા સીન્ડીકેટ હેઠળ ક્રાઇમની દુનિયામાં બિચ્છુ ગેંગ કાર્યરત હતી. જે એક ઓર્ગેનાઇઝ્ડ ક્રાઇમ સીન્ડીકેટ ચલાવી રહેલ હોવાનું તેમજ તે ખૂનની કોશિષ, ધાક ધમકી આપી ડરાવવું , ધમકાવવું તેમજ ખંડણી વસૂલવી અને જુગાર તથા પ્રોહીબીશન જેવી અસામાજિક પ્રવૃતિ આચરી દ્વારકા , મીઠાપુર ઓખા મંડળ વિસ્તારમાં ડરનો માહોલ ઊભો કર્યો હોવાનું સામે આવ્યું હતું.
12 શખ્સો સામે કાર્યવાહી હાથ ધરાઈ
જેને પગલે પોલીસે તપાસ હાથ ધરતા આ ગુન્હામાં આરોપી લાલુભા સાજાભા સુમણીયા, વનરાજ પાલાભા સુમણીયા, હાજાભા પાલામાં સુમણીયા, જગદિશભા હનુભા સુમણીયા, સાજામાં માનસંગભા સુમીચા, રાજેશભા માલામા સુમણીયા, નથુભા સાજાભા સુમણીયા, માપભા વીરાભા સુમણીયા, માનસંગભા ઘાંધાભા માણેક, માનસંગભા સાજામાં સુમણીયા, માલાભા સાજાભા સુમણીયા અને કિશન ટપુભા માણેકની પણ પ્રકરણમાં સંડોવણી ખૂલી હતી જેને લઈને પોલીસે 11 શખ્સોને ઉઠાવી લીધા છે જ્યારે આરોપી કિશન ટપુભા માણેક અગાઉથી પોલીસ ઝપટે ચડયો હોવાથી તમામ વિરુદ્ધ ગુજસીટોક હેઠળ કાર્યવાહી કરવામાં આવી છે.