સુશાંતસિંહ રાજપૂતના આપઘાત કેસમાં મુંબઈની બાંદ્રા પોલીસે હવે તપાસ ઝડપી કરી દીધી છે. આ ઘટના અંગે દરરોજ લોકોની પુછપરછ કરવામાં આવી રહી છે. સાથે સાથે સતત ચકાસણી પણ કરવામાં આવી રહી છે. તાજેતરમાં જ પોલીસે જ્યારે સુશાંતના ઘરની તલાશી લીધી ત્યારે તેને એવું મળ્યું કે જે પોલીસની તપાસમાં મદદરુપ થશે.
પોલીસને એક ફિલ્મની સ્ક્રિપ્ટ મળી
જીનિયસ એન્ડ ડ્રોપ આઉટ નામની સ્ક્રિપ્ટ મળી
સુશાંત જાન્યુઆરીથી તેના પ્રોજેક્ટ પર કામ શરૂ કરવાના હતા
પોલીસે જ્યારે સુશાંતના ઘરની તલાશી લીધી ત્યારે તેમને એક ફિલ્મની સ્ક્રિપ્ટ મળી. બાંદ્રા પોલીસને જીનિયસ એન્ડ ડ્રોપ આઉટ નામની સ્ક્રિપ્ટ સુશાંત સિંહ રાજપૂતના ઘરેથી મળી છે. જેને ડ્રીમ 150 તરીકે પણ ઓળખવામાં આવે છે. પોલીસના જણાવ્યા અનુસાર સુશાંત જાન્યુઆરીથી તેના પ્રોજેક્ટ પર કામ શરૂ કરવાના હતા.
બુધવારે સુશાંત સિંહ રાજપૂતના મિત્ર અને કાસ્ટિંગ ડિરેક્ટર મુકેશ છાબડાએ પોલીસને કહ્યું હતું કે અભિનેતા સાથે તેની ખૂબ જ સારી મિત્રતા છે. મુકેશ છાબડાની દિગ્દર્શિત પહેલી ફિલ્મ 'દિલ બેચારા'માં સુશાંત સિંહ રાજપૂત મુખ્ય ભૂમિકામાં હતા.
દિલ બેચારામાં સુશાંત સિંહ ઉપરાંત સૈફ અલી ખાન અને સંજના સંઘી પણ છે. આ ફિલ્મ આ વર્ષે 8 મેના રોજ રીલિઝ થવાની હતી. પરંતુ લોકડાઉનને કારણે તેની રિલીઝ મુલતવી રાખવામાં આવી હતી. એવા પણ અહેવાલો છે કે નિર્માતાઓ ડિજિટલ પ્લેટફોર્મ પર ફિલ્મ રજૂ કરવાની યોજના બનાવી રહ્યા છે.
ઉલ્લેખનીય છે કે સુશાંતસિંહ રાજપૂતે 14 જૂને મુંબઇ સ્થિત તેમના ઘરે જ ફાંસો ખાઇને આત્મહત્યા કરી હતી. આ સમાચાર બહાર આવતાની સાથે જ લોકો હચમચી ગયા હતા. બોલિવૂડ હસ્તીઓ શોકમાં ડૂબી ગયા હતા. સુશાંતના મોતના આંચકાથી લોકો હજી બહાર આવ્યા નથી.