સળગતો મુદ્દો પોલીસ ગ્રેડ પે આંદોલનનો ભાઠો ફરી ધણધણ્યો, મહિલા કોન્સ્ટેબલ નિલમ મકવાણાએ DySP પર લગાવ્યા મોટા આરોપ
પોલીસ ગ્રેડ પે મુદ્દે કમિટી બન્યાને 2 માસ પૂર્ણ
મહિલા કોન્સ્ટેબલ નિલમ મકવાણાના ગંભીર આક્ષેપ
મારી અનેકવાર બદલી કરવામાં આવી
પોલીસ ગ્રેડ પે મામલે થયેલા આંદોલન મામલે મહિલા કોન્સ્ટેબલનો એક વીડિયો વાયરલ થયો છે. વીડિયો થકી નિલમ મકવાણાએ ગંભીર આક્ષેપ કર્યા છે.. નિલમ મકવાણાએ જણાવ્યું કે કમિટીની રચના કરાઈ હતી. જોકે બે માસ બાદ પણ કોઈ જ નિર્ણય કરવામાં આવ્યો નથી. નિલમ મકવાણાએ DySP પર લાફો મારવાનો આક્ષેપ પણ કર્યો. તેને જણાવ્યું કે 7 જાન્યુઆરીએ વિરોધ કરવા માટે જઈ રહ્યા હતા તે સમયે અટકાયત કરીને તેમને લાફો મારવામાં આવ્યો હતો. મહિલા સુરક્ષાની વાતો કરતી સરકાર આ મામલે ન્યાય અપાવે તેવી પણ માગ કરી છે. સાથે જ પોલીસ ગ્રેડ પેનો ચુકાદો નહીં આવે ત્યાં સુધી લડત ચાલુ રાખવાની ચીમકી પણ ઉચ્ચારી છે.
પોલીસ ગ્રેડ પેનો મામલો વેગ પકડતા કરાઇ હતી કમિટીની જાહેરાત
CM, રાજ્ય ગૃહ મંત્રી અને DGPની બેઠક બાદ 28 ઓકટોબરના રોજ પોલીસ ગ્રેડ પેને લઈ કમિટીની જાહેરાત કરવામાં આવી હતી.પત્રકાર પરિષદમાં પોલીસ વડા આશિષ ભાટીયાએ કહ્યું હતું કે ગ્રેડ પે તેમજ અન્ય માંગોને લઈ સરકારે એક કમિટીના ગઠનનો નિર્ણય કર્યો છે. જેમાં 5 જેટલા પોલીસના ઉચ્ચ અધિકારીઑની બ્રિજેશ ઝાના અધ્યક્ષ સ્થાને કમિટી બનાવાઇ છે.જે સૂચિત સમયગાળામાં વિવિધ માંગ પર અભ્યાસ કરી સરકારને રિપોર્ટ સોંપશે જે બાદ સરકાર કોઈ યોગ્ય જાહેરાત કરશે. પરંતુ 72 દીવસથી વધુ સમય થયો હોવા છતાં પણ હજુ સુધી કોઈ યોગ્ય જાહેરાત કરવામાં આવી નથી.જેથી હવે ફરી પોલીસ ગ્રેડ પે મામલે પોલીસ કર્મીઑ સોશિયલ મીડિયાનો સહારો લઈ રહ્યા છે.
કોણ કોણ છે કમિટીમાં?
ગુજરાતના IGP બ્રિજેશ ઝાના અધ્યક્ષ સ્થાને કમિટી બની હતી
ગૃહ વિભાગના ડેપ્યુટી સેક્રેટરી જિગર પટેલ
DG ઓફિસના ચીફ ફાયનાસિયલ ઓફિસર સ્મૃતિ પાઠકનો સભ્ય સચિવ તરીકે સમાવેશ
નાણાં વિભાગના અધિકારીનો પણ કમિટીમાં સમાવેશ
મોટા પાયે બદલીઑ થઈ હતી
પોલીસ ગ્રેડ પે આંદોલનમાં શિસ્તભંગ કરનાર પોલીસકર્મીઓ સામે કાર્યવાહી કરવામાં આવી હતી. મામલો થોડો થાળે પડતાં ગ્રેડ પે મુદ્દે વિરોધ કરનારા પોલીસકર્મીઓની એક ઝાટકે બદલી કરી દેવામાં આવી છે. 9 પોલીસ કર્મચારીઓની રાજ્યના વિવિધ જિલ્લાની અલગ અલગ જગ્યાએ બદલી કરી નાખવામાં આવી છે. ગાંધીનગરમાં વિધાનસભા બહાર હાર્દિક પંડ્યા નામના કોન્સ્ટેબલ ધરણાં પર બેઠો હતો. ગ્રેડ પે અને સાતમા પગાર માંગને લઈ ધરણાં પર બેઠેલા સેક્ટર 7 પોલીસ દ્વારા કોન્સ્ટેબલને પોતાની અભિવ્યક્તિ રજૂ કરતાં રોકવામાં આવ્યો હતો અને પોલીસે પોલીસ કોન્ટેબલને ધરણાં સ્થળેથી ડિટેઇન કર્યો હતો.જે બાદ આજે શિસ્તભંગની કાર્યવાહી કરતાં ધરણા પર બેસનાર હાર્દિક પંડ્યાની જુનાગઢ બદલી કરી નાખવામાં આવી હતી.