ભાવનગરના ભરતનગર પોલીસ મથકમાં પોલીસ ઇન્સ્પેકટર તરીકે ફરજ બજાવનારા અને અપરાધીઓમાં ખોફ ઉભો કરનાર 'લેડી સિંઘમ' પોલીસ ઇન્સ્પેકટરની ધરપકડ કરવામાં આવતા ખળભળાટ મચી ગયો છે. જે.એમ ચાવડાની સરકારી રેકર્ડ સાથે ચેડા કરીને નાણાની ઉચાપત કરવાના કેસમાં ધરપકડ કરવામાં આવી છે. જોકે આ લેડી સિંઘમે કોર્ટ કંપાઉન્ડમાં જ કહ્યું હતું કે 'કોઈ અંદરના માણસે જ તેમનો દાવ લઇ લીધો છે અને તેને કોઈ ઉચાપત કરી નથી.'
નાણા ઉચાપત કર્યાની થઇ પોલીસ ફરિયાદ
હજુ તો થોડા સમય પહેલા જ રાજ્યને મુખ્યમંત્રીએ એકરાર કર્યો હતો કે ગુજરાતમાં મહેસુલ વિભાગ અને ગૃહ એટલે કે પોલીસ વિભાગમાં સૌથી વધુ ભ્રષ્ટાચાર ચાલી રહ્યો છે. આ વાતને જાણે કે સમર્થન મળતું હોય તેવો કિસ્સો બહાર આવ્યો છે. ભાવનગરના ભરતનગર પોલીસ સ્ટેશનમાં PI તરીકે ફરજ બજાવતા લેડી સિંઘમ જે.એમ ચાવડા હાજર થતાની સાથે જ પોતે કડક હોવાની છાપ ધરાવતા અને આ વિસ્તારમાં અપરાધીઓમાં પણ તેમનો ખોફ ઉભો થયો હતો. ભરતનગરના આ PI સામે વાહન ચેકિંગ દરમિયાન સરકારી રેકર્ડ સાથે ચેડા કરી નાણા ઉચાપત કર્યાની પોલીસ ફરિયાદ ખુદ સીટી DySPએ નોંધાવી હતી.
લેડી સિંઘમની થઇ ધરપકડ
આજે સવારથી જ આ કેસની તપાસ અન્ય DySPને સોંપવામાં આવી હતી. આજ સવારે DySP ચૌધરીએ ભરતનગર પોલીસ સ્ટેશન જઈ જે.એમ ચાવડાની ધરપકડ કરી હતી. આ PI સામે ૧૬ જેટલી બુકમાં ચેડા કરીને નાણાની ઉચાપત કરી હોવાનું ફરિયાદમાં નોંધવામાં આવ્યું છે. PI ચાવડાને કોર્ટમાં રજુ કરવામાં આવ્યા હતા અને કોર્ટે તેમના એક દિવસનાં રિમાન્ડ મંજુર કર્યા છે.
'મેં કોઈ ઉચાપત કરી નથી અને અંદરના જ માણસે મારો દાવ લીધો છે'
ભાવનગરના ભરતનગર વિસ્તારમાં થોડા સમયથી માથાભારે શખ્સોનો આતંક હતો. તે સમયે PI તરીકે લેડી સિંઘમ તરીકે ઓળખાતા જે.એમ ચાવડાની નિમણૂંક કરવામાં આવી હતી. આમ તો સુત્રોમાંથી એમ પણ જાણવા મળ્યું છે કે ૩૧ ડીસેમ્બરના રોજ ચેકિંગ દરમિયાન દારૂની રેડ કરવામાં આવી હતી. તે સમયે મોટી રકમો આ પીઆઈએ લોકો પાસેથી પડાવી હતી. તેની ફરિયાદ DSP અને IG સુધી થઇ હતી. તેના કારણે જે.એમ ચાવડાની ધરપકડ કરવામાં આવી હતી. લેડી સિંઘમે કોર્ટ કંપાઉન્ડમાં કહ્યું હતું કે 'મેં કોઈ ઉચાપત કરી નથી અને અંદરના જ માણસે મારો દાવ લીધો છે. ન્યાયતંત્ર પર મને વિશ્વાસ છે કે મને યોગ્ય ન્યાય મળશે.'