અમદાવાદ / રોજ-રોજ પોલીસ ઢગલાબંધ દારૂ પકડે તો છે પણ તેનું શું કરે છે, જાણો

• ડીસીપીએ જાતે ૪૬ હજાર દારૂની બોટલ પર બુલડોઝર ચલાવી દીધું 
• રામોલના મેદાનમાં પોલીસે જપ્ત કરેલા દારૂનાં જથ્થાનો નાશ કરાયો

ખાસ વાત એ છેકે અમદાવાદના ઇતિહાસમાં પહેલી વખત ઝોન ૫ ના ડીસીપી રવિ તેજા વાસમશેટ્ટીએ બુલડોઝર જાતે ફેરવીને દારૂના જથ્થાનો નાશ કર્યો હતો. શહેરના રામોલ વિસ્તારમાં આવેલા કામધેનુ મેદાનમાં ગઇ કાલે ઝોન ૫ના ડીસીપી રવિ તેજા વાસમશેટ્ટીએ જાતે બુલડોઝર ચલાવીને ૧.૭૩ કરોડ રૂપિયાના દારૂના જથ્થાનો નાશ કર્યો હતો. ઓઢવ, રખિયાલ, બાપુનગર, અમરાઇવાડી, રામોલ, ખોખરા અને નિકોલ વિસ્તારમાં પોલીસ તેમજ અન્ય એજન્સીઓએ છેલ્લાં બે વર્ષમાં ૪૬ હજાર દારૂની બોટલો જપ્ત કરી હતી. 

કોર્ટની મંજૂરી બાદ આ દારૂના જથ્થાને નાશ કર્યો

પોલીસ સ્ટેશનમાં મુદ્દામાલનું ભારણ વધી ગયું હોવાથી તેમજ લિગલ પ્રોસિજરના ભાગ રૂપે પોલીસે કોર્ટની મંજૂરી બાદ આ દારૂના જથ્થાને નાશ કર્યો હતો. આ ઘટનામાં ડીસીપી, એસીપી, તમામ પોલીસ સ્ટેશનના પોલીસ ઇન્સપેક્ટર તેમજ સરકારી કર્મચારીઓ અને કોર્ટના કર્મચારીઓ હાજર રહ્યા હતા. ડીસીપીએ જાતે બુલડોઝર ચલવાતા એસીપી સહિતના પોલીસ કર્મચારીઓ અચંબામાં મુકાઇ ગયા હતા. આ મામલે ડીસીપી રવિ તેજા વાસમશેટ્ટીએ જણાવ્યુ છેકે ૧.૭૩ કરોડના દારૂનો  નાશ કર્યો છે. 

દારૂના ૫૦૦થી વધુ કેસ 

ઝોન ૫ માં આવતા નિકોલ, ખોખરા, રામોલ, અમરાઈવાડી, બાપુનગર, રખિયાલ અને ઓઢવ પોલીસ દ્વારા છેલ્લા બે વર્ષ માં દારૂના ૫૦૦થી વધુ કેસ કરવામાં આવ્યા હતા. આ અગાઉ પણ ગોમતીપુર પોલીસ દ્વારા દારૂના જથ્થાનો નાશ કરવામાં આવ્યો હતો.