અમદાવાદ / પોલીસે રક્તદાન કરવાની ઝુંબેશ ઉપાડી પરંતુ 50 ટકા મહિલા પોલીસ રક્તદાન ન કરી શકી, કારણ ચોંકાવનારું

• પોલીસે હાથ ધરી થેલેસમીયાગ્રસ્ત બાળકો માટે રક્તદાન ઝુંબેશ 
• ખુદ મહિલા પોલીસ જ ન કરી શકી રક્તદાન 
• 800 પૈકી 436 મહિલા પોલીસમાં જોવા મળી લોહીની ઉણપ

થેલેસમિયા ગ્રસ્ત બાળકોની મુસ્કાન જીવિત રાખવા અમદાવાદ પોલીસે રકતદાનનુ અભિયાન શરૂ કર્યુ. 14 જૂન વિશ્વ રકતદાન દિવસથી અમદાવાદ પોલીસ અને રેડ ક્રોસ સોસાયટીએ મુસ્કાન માટે રકતદાન ઝુંબેશ શરૂ કર્યુ. 

436 મહિલા પોલીસ રક્તદાન કરવા સક્ષમ નથી 

આ ઝુંબેશ અંતર્ગત અમદાવાદ શહેર અને જીલ્લાના પોલીસ કર્મચારીઓએ સ્વેચ્છાએ રક્તદાન કરી રહયા હતા. પરંતુ આ ઝુંબેશમા રક્તદાન કરવાની ઈચ્છા હોવા છંતા 50 ટકા મહિલાઓને રક્તદાન કરવા માટે મંજૂરી નથી મળી. કારણ કે તેમના શરીરમા જ રક્તનુ પ્રમાણ ઓછું જોવા મળ્યુ. અમદાવાદ શહેરમા 1800 મહિલા પોલીસ છે. જેમા 800 મહિલા પોલીસે રકતદાનની ઈચ્છા વ્યકત કરી. જેમાથી 436 મહિલાઓ રકતદાન કરવા માટે સક્ષમ નહતી.  સામાન્ય રીતે 12 થી 15.5 ટકા રકત હોય તો જ રકતદાન થાય. પરંતુ મહિલા પોલીસમા હિમોગ્લોબીનનું પ્રમાણ ખુબ જ ઓછુ હતુ. 

સતત તણાવમાં રહી કામ કરતા પોલીસ કર્મીઓના સ્વાસ્થ્યમાં પડી રહી છે મુશ્કેલી 

સતત કાયદો વ્યવસ્થા અને સમાજના રક્ષણ માટે કામના ભારણ હેઠળ રહેતા પોલીસ કર્મચારીઓનું જીવન પણ બીમારીનો બોજ બની બેઠેલું હોય છે. એટલું જ નહીં પણ પોલીસના અનિયમિત નિત્યક્રમનાં કારણે હાર્ટ એટેક અને બ્લડ પ્રેસરથી અનેક પોલીસ જવાનના મૃત્યુ થયા હોવાના કિસ્સા પણ સામે આવ્યા છે.  સતત કામમા વ્યસ્ત રહીને તણાવ ગ્રસ્ત રહેતા પોલીસ કર્મચારીઓને સ્વાસ્થ્યને લઈને મુશ્કેલીઓ વધતી હોય છે. 

પોલીસ હેલ્થ વિભાગ થયું સક્રિય

અમદાવાદની શકિતસમાન મહિલા પોલીસ પણ આ રકતની ઉણપથી પીડાઈ રહી છે. આ સમસ્યા ફકત મહિલા પોલીસ જ નહીં પરંતુ અનેક મહિલાઓની હોય છે. જેનુ કારણ છે પ્રોટીન યુકત ભોજનના બદલે જંકફુડ તેમજ બલ્ડ લોશ થવાના કારણે ડાયેટ ડેફીસેન્સી અને આયર્ન ડેફીસેન્સીના કારણે એનીમીયા થાય છે. મહિલા પોલીસના હિમોગ્લોબીન ઓછુ હોવાના આંકડા બાદ પોલીસ હેલ્થ વિભાગે તેમની સ્વાસ્થયને લઈને કાળજી શરૂ કરી. 

પોલીસના સ્વાસ્થ્યને લઈને હાથ ધરાઇ ઝુંબેશ 
  
મુસ્કાન માટે રકતદાનના ઝુંબેશથી અનેક થેલેસમીયાગ્રસ્ત બાળકોની ચહેરા પર પોલીસે મુસ્કાન આપી. કાયદો વ્યવસ્થા, ફરજ અને પારિવારીક સ્મસ્યાઓના કારણે પોલીસને અનેક બીમારીઓ થઈ રહી છે. જેથી સ્માર્ટ સીટીની સ્માર્ટ પોલીસ બનાવવા ડીજીપીએ પોલીસના સ્વાસ્થ્યને લઈને પણ ઝુંબેશ શરૂ કર્યુ છે. 

સ્ટોરી : અનીતા પટ્ટણી, અમદાવાદ