અમદાવાદમાં નવરંગપુરા વિસ્તારમાં એક પોલીસ કોન્સેટબલે જાહેરમાં યુવતીને લાફા માર્યા હતા. જેથી તેને સસ્પેન્ડ કરાયો. પરંતુ બાદમાં તે પોલીસ કોન્સ્ટેબલ બુટલેગર બની પરત ફરજ પર હાજર થયો.
પોલીસ કોન્સ્ટેબલે જાહેરમાં યુવતીને માર્યા હતા લાફા
સ્પેન્ડ થયા બાદ કોન્સ્ટેબલ બન્યો બુટલેગર
152 દારૂની બોટલો પોલીસે કરી જપ્ત
શાહીબાગ પોલીસ સ્ટેશનની બાજુમાં આવેલી પોલીસ લાઇનમાં દારૂનો ધંધો કરતો નવરંગપુરા પોલીસ સ્ટેશનનો હેડ કોન્સ્ટેબલ વિક્રમસિંહ વાઘેલાનો વધુ એક વિવાદ પણ સામે આવ્યો છે. થોડાક સમય પહેલાં નવરંગપુરા ખાતે માસ્કના દંડ બાબતે યુવતીને જાહેરમાં બે લાફા વિક્રમસિંહે ઝીંકી દીધા હતા જેમાં તેને ઝોન ૧ના ડીસીપીએ સસ્પેન્ડ કર્યો હતો. યુવતીને લાફા ઝીંકનારો વીડિયો સોશિયલ મીડિયામાં વાઇરલ થયો હતો. જેના કારણે પોલીસની ઇમેજ ખરડાઇ હતી. વિક્રમસિંહ દોઢેક મહિના પહેલાં પોલીસ ખાતામાં ફરીથી હાજર થયો છે.
4.51 લાખનો દારૂ પોલીસે કર્યો જપ્ત
શાહીબાગ પોલીસને કંટ્રોલ મેસેજ મળ્યો હતો કે શાહીબાગ પોલીસ લાઇનના ખુલ્લા ગ્રાઉન્ડમાં સફેદ કલરની સ્વિફ્ટ કારમાં દારૂનું ખુલ્લેઆમ વેચાણ થાય છે. કંટ્રોલ રૂમમાં આવેલા ફોન બાદ શાહીબાગ પીઆઇ કે.ડી.જાડેજા તેમની ટીમ સાથે પોલીસ લાઇનમાં પહોચી ગયા હતા અને નવરંગપુરા પોલીસ સ્ટેશનમાં પીસીઆર વાનમાં ફરજ બજાવતા હેડ કોન્સ્ટેબલ વિક્રમસિંહ વાઘેલાની દારૂના જથ્થા સાથે ધરપકડ કરી લીધી હતી. વિક્રમસિંહ વાઘેલા ચાંદખેડા ખાતે આવેલી નૂતન પ્રકાશ સોસાયટીમાં રહે છે અને પોલીસ લાઇનમાં આવીને દારૂનો ધંધો કરે છે. ખુલ્લા મેદાનમાં અંધારું હોવાના કારણે વિક્રમ છેલ્લા ઘણા સમયથી દારૂનો ધંધો બેરોકટોક ચલાવતો હતો. પોલીસને વિક્રમસિંહ પાસેથી અલગ અલગ બ્રાન્ડની ૧૫૨ દારૂનો બોટલ મળી છે. શાહીબાગ પોલીસે ૪.૫૧ લાખનો મુદ્દામાલ તેની પાસેથી જપ્ત કર્યો છે.
અન્ય પોલીસકર્મીઓની સંડોવણી હોવાની શક્યતા
વિક્રમસિંહ દોઢ મહિના પહેલાં નોકરી પર હાજર થયો હતો અને દારૂનો ધંધો શરૂ કર્યો હતો. વિક્રમસિંહ અન્ય પોલીસ કર્મચારીઓની મદદથી દારૂનો ધંધો કરતો હોવાનું પણ પોલીસબેડામાં ચર્ચાઇ રહ્યું છે. દારૂની આટલી બધી બોટલો વિક્રમસિંહે કયા બુટલેગર પાસેથી ખરીદી તે મામલે પોલીસે તપાસ શરૂ કરી છે.