નવસારીઃ શહેરમાં એક કંપનીના મેનેજરને ફિલ્મી ઢબે ફસાવીને પૈસાની લૂંટનો મામલો પોલીસ ચોપડે નોંધાયો છે. મેનેજરને હનીટ્રેપમાં ફસાવી પૈસા પડાવતી આ ટોળકીની આખરે પર્દાફાશ થતાં પોલીસે ધરપકડ કરી છે. ઘટનાની વિગત એવી છે કે નવસારીના વેજલપોર ગામે એક નાના કારખાનામાં મૂળ બનાસકાંઠાનો ઉદા પટેલ નામનો ઈસમ રત્નકલાકાર તરીકે કામ કરતો હતો.
તે સમયે કારખાનાના મેનેજર મહાદેવ ચૌધરી પર તેની નજર પડી અને તેની પાસેથી પૈસા ખંખેરવા માટે તેણે પોતાના અન્ય ચાર સાગરિતો સાથે મળી સમગ્ર પેંતરો રચ્યો. મેનેજરને એક મહિલાની લાલચ આપી સંબંધ બાંધવા ઉશ્કેર્યા. હનીટ્રેપમાં ફસાવીને તેઓનો મુખ્ય પ્લાન માત્રને માત્ર પૈસા પડાવવાનો હતો. બાદમાં મહાદેવ ચૌધરીને ઉદા પટેલે એક જગ્યાએ બોલાવ્યા જ્યાં તે એક મહિલા સાથે હાજર હતો.
મહાદેવભાઈ આવી જતા ઉદા પટેલ ત્યાંથી પલાયન થયો અને તેના અન્ય સાગરીતો આવી ચડયા હતા. જેમાંથી એકે પોતાની ઓળખ આ મહિલાના પતિ તરીકે આપી અને મહાદેવભાઈને કહ્યું કે મારી પત્ની સાથે કેમ ઉભો છે. બાદમાં આ ગેંગે તેમનું અપહરણ કરી માર મારી પાંચ લાખની ખંડણી માંગી હતી. મેનેજર પાસે દોઢ લાખના હીરા આવ્યાની જાણ ઉદાને હોવાથી કડક ઉઘરાણી કરી હતી.
જેનાથી ગભરાઈને મેનેજરે 90 હજાર આપી છૂટકારો મેળવ્યો હતો. બાદમાં અન્ય 50 હજાર આપવા જતાં મેનેજરે પોલીસનો સહારો લઈ તમામ આરોપીને પોલીસે છટકું ગોઠવી ઝડપી પાડયા હતા. આ અંગે મેનેજરે નવસારી ગ્રામ્ય પોલીસ સ્ટેશનમાં ફરિયાદ પણ નોંધાવી હતી. જેના પગલે પોલીસે વધુ કાર્યવાહી હાથ ધરી છે.