અમદાવાદ / રિવરફ્રન્ટ પર અશ્લીલ હરકતો કરતાં કોલેજિયન કપલો હવે ધ્યાન રાખજો, પોલીસે યુવક-યુવતીની ધરપકડ કરી

પોલીસ સૂત્રોના જણાવ્યા અનુસાર રિવરફ્રન્ટ પર પ્રેમી યુગલની અસંખ્ય ફરિયાદો લોકો કરી રહ્યા છે. યુવક અને યુવતીઓ એવી બીભત્સ સ્થિતિમાં બેઠાં હોય છે, બાળકો સાથે રિવરફ્રન્ટ પર ફરવા માટે આવતા પરિવારો પણ પ્રેમી યુગલને જોઇને શરમમાં મુકાઇ જાય છે. હાલમાં સાબરમતી રિવરફ્રન્ટ પર રસ્તે જતી યુવતીઓને હેરાન કરવાના તેમજ છેડતીના બનાવ બની રહ્યા છે તેમજ પ્રેમી યુગલ એકલતાનો લાભ લઈને બીભત્સ હરકતો કરતાં આવાં પ્રેમીપંખીડાંઓને ઝડપવા પોલીસે કવાયત શરૂ કરી છે.

ગઈ કાલે રિવરફ્રન્ટ (વેસ્ટ) પોલીસ સ્ટેશનના સ્ટાફના માણસો પેટ્રો‌લિંગમાં હતા ત્યારે એનઆઇડી પાછળ આવેલા વોક-વે પર સીડીમાં જાહેરમાં એક કપલ એકબીજાને બાથમાં લઇ બેઠું હતું. રિવરફ્રન્ટના પગથિયાં પર જાહેરમાં ભાન ભૂલીને બીભત્સ હરકતો કરતાં યુગલની પોલીસે ધરપકડ કરી છે. પોલીસે યુગલની પૂછપરછ કરતાં જાણવા મળ્યું હતું કે ૨૧ વર્ષનો બાવળાનો યુવક અને કણભાની ૧૯ વર્ષની યુવતી બંને વિદ્યાર્થીઓ છે. જાહેરમાં અશ્લીલ ચેનચાળા કરવા એ ગુનો બનતો હોવાથી બંનેને પોલીસ સ્ટેશન લઇ જવાયાં હતાં. બંને કોલેજમાં ભણે છે. 

ઉપરાંત રિવરફ્રન્ટ પર એકલદોકલ વ્યક્તિને મોડી રાતે લૂંટવાના બનાવો પણ બને છે તો બીજી બાજુ લવ પોઇન્ટ સમાન અમદાવાદનો રિવરફ્રન્ટ તોડબાજીનું સ્થળ બની રહ્યું હોય તેવો કિસ્સો પ્રકાશમાં આગાઉ આવ્યો છે. રિવરફ્રન્ટ પર પ્રેમી યુગલ એકાંતની પળો માણી હોય છે ત્યારે પોલીસ ડરાવીને તોડબાજી કરતી હોવાની પણ ફરિયાદો ઉઠતી હોય છે.