રંગીલી પાર્ટી! / રાજકોટની ફાયનાન્સ ઓફિસમાં 12 લોકો દારૂપાર્ટી કરતા હોવાનો Video વાયરલ થતા પોલીસે કરી કાર્યવાહી, CPએ જાણો શું કહ્યું

• રાજકોટની ફાયનાન્સ ઓફિસમાં દારૂ પાર્ટીનો મામલો  
• વાઇરલ વિડીયો અંગે પોલીસે હાથધરી કાર્યવાહી
• હાલ પોલીસે વીડિયોમાં દેખાતા 6 ની કરી અટકાયત 

ગુજરાતમાં દારૂબંધી છે પરંતુ ક્યાં તે સવાલ અત્યારે સૌ કોઇને થઇ રહ્યો છે. કારણ કે ગુજરાતમાંથી દારૂબંધીના નિયમો નેવે મૂકતી અનેક ઘટનાઓ સામે આવી રહી છે ત્યારે રાજકોટમાં બંધ ઑફિસમાં દારૂ પાર્ટી થતી હોવાનો વીડિયો સામે આવ્યો છે. બુધવારના રોજ રાત્રિના સમયે દારૂ પાર્ટી યોજાઇ હતી.આ વીડિયોમાં 12 જેટલા વ્યક્તિઓ જોવા મળી રહ્યા હતા. એક તરફ દારૂ પાર્ટી થઇ રહી છે તો બીજી તરફ દારૂના નશામાં ચૂર થઇને ફિલ્મી ગીતો પર ડાન્સ કરી રહ્યા છે. આ વીડિયો માલવિયા નગર પોલીસ સ્ટેશન વિસ્તારનો હોવાની ચર્ચા છે. 

દારૂ પાર્ટી કરનાર 12 લોકોમાંથી 6ની અટકાયત
ત્યારે સમગ્ર દારૂ પાર્ટી મામલે પોલીસે કાર્યવાહી કરવાની શરૂ કરી છે. બી ડિવિઝન પોલીસ સ્ટેશન વિસ્તારની રણછોડનગર શેરી નંબર 16ની ઓફિસમાં દારૂ પાર્ટી થઇ હતી. જેમાં વીડિયોમાં 12 લોકો દારૂ પી નાચગાન કરતાં દેખાઈ રહ્યા છે. વીડિયો વાયરલ થતાં પોલીસે એક્શન લઈ 6 લોકોની અટકાયત કરી છે જ્યારે અન્ય 6 લોકોને પકડવા તજવીજ હાથ ધરી છે. મોટો ઘટસ્ફોટએ થયો છે કે આ દારૂપાર્ટીમાં પોલીસ હેડ ક્વાર્ટરનો કર્મી વીરા ચાવડા સામેલ હોવાની ચર્ચાઓ છે. તે મુજબ ઓફિસ પાર્ટનર મયુર ચાવડા, પંકજભાઈ ડાંગર, જગદીશ પટેલ, જયંતિ લોખીલ, હરભમ લોખીલ, માટીયા ભરવાડ નામના શખ્સની પણ પોલીસે ઓળખ કરી લીધી છે.

'પોલીસ કોન્સ્ટેબલ પાર્ટીમાં સામેલ હતા કે નહીં તે અંગે તપાસ'
સમગ્ર ઘટનાને લઈ પોલીસ કમિશનર રાજુ ભાર્ગવે પણ નિવેદન આપતા કહ્યું કે વાયરલ વીડિયો અંગે બી ડિવિઝન પોલીસે કાર્યવાહી કરી છે. જેમાં 6 લોકોની અટકાયત કરી છે અન્ય 6ની શોધખોળ ચાલુ પોલીસ કોન્સ્ટેબલ પાર્ટીમાં હતા કે કેમ તે અંગે તપાસ ચાલુ છે. 

અગાઉ યુવાનોની દારૂ પાર્ટીનો વીડિયો આવ્યો હતો સામે 
તો થોડા દિવસ અગાઉ રાજકોટના જસદણ વિસ્તારનો એક વીડિયો સામે આવ્યો હતો. જેમાં પાંચ યુવાનો ખુલ્લેઆમ દારૂની છોળો ઉડાડીને ટલ્લી બન્યા હતા. દારૂ પીને જાહેર માર્ગ ઉપર છાકટા બન્યા હતા. પીલે..પીલે ઓ મેરે રાજા ગીત પર યુવાનો બોટલો લઇને ઝૂમતા જોવા મળી રહ્યા હતા. આ વીડિયો સોશિયલ મીડિયામાં વાયરલ થતા જિલ્લા પોલીસે આરોપીઓને શોધવા માટેની તજવીજ હાથ ધરી હતી.