અમદાવાદ / મેમનગર હિટ એન્ડ રન મામલે ટ્રાફિક પોલીસે ડ્રાઈવરની કાર સાથે અટકાયત કરી

• મેમનગર હિટ એન્ડ રનનો મામલો
• MLA શૈલેષ પરમારનો ડ્રાઇવર થયો હાજર
• આરોપી ડ્રાઇવર અકસ્માત સર્જી ફરાર થઇ ગયો હતો

MLA શૈલેષ પરમારની કારથી હિટ એન્ડ રનનો મામલે હવે 18 કલાક બાદ અકસ્માત સર્જનાર ડ્રાઇવર દેવેન્દ્ર ભાવસાર પોલીસ સમક્ષ હાજર થયો. ત્યારે હાલ પોલીસે MLA શૈલેષ પરમારની કાર કબ્જે કરી છે. સમગ્ર મામલાને લઇ ટ્રાફિક MLA શૈલેષ પરમારની હોવાનું સામે આવ્યું છે.

આરોપી ડ્રાઇવર અકસ્માત સર્જી ફરાર થઇ ગયો હતો. જો કે ત્યારબાદથી તે અમદાવાદમાં હતો. ત્યારે કારની સ્પીડ કેટલી હશે એ અંગે તપાસ કરાશે અને પૂછપરછ બાદ ડ્રાઇવરની અટકાયત-ધરપકડ અંગે નિર્ણય લેવાશે. જો કે MLAનો પુત્ર કાર ચલાવતો હોવાનું હજુ સુધી સામે નથી આવ્યું.

આ અગાઉ ધારાસભ્ય શૈલેષ પરમારે આ મામલે પ્રતિક્રિયા આપતાં જણાવ્યું હતું કે ડ્રાયવર કેમ ગયો તે મને ખબર નથી. ધારાસભ્યએ કહ્યું હતું કે અકસ્માત સમયે ડ્રાઇવર એકલો જ હતો. જ્યારે અકસ્માતનો ભોગ બનનાર પરિવારને મળવા હું ચોક્કસ જઇશ તેમ જણાવ્યું હતું. આ સાથે શૈલેષ પરમારે કહ્યું કે ડ્રાઇવર ક્યાં છે તેની મને ખબર નથી. 

ગઇકાલે અમદાવાદ શહેરના મેમનગર ખાતે હિટ એન્ડ રનનો બનાવ બન્યો હતો. જેમાં MLA શૈલષ પરમારની કાર દ્વારા સ્કૂટર ચાલક પ્રફુલ્લભાઇ પટેલને અડફેટે લીધા હતા. હોસ્પિટલમાં સારવાર દરમિયાન પ્રફુલભાઇ પટેલનું મોત નિપજ્યું હતું. જો કે ત્યારબાદ પરિવાર દ્વારા પોલીસ ફરિયાદ નોંધાવતા પોલીસ પર ધારાસભ્યને બચાવવાનો આક્ષેપ કરવામાં આવ્યો હતો. પોલીસે ફરિયાદમાં ધારાસભ્યના નામનો ઉલ્લેખ કર્યો નથી. જો કે આ બધા વચ્ચે ધારાસભ્ય શૈલેષ પરમારની આ મામલે પહેલી વાર પ્રતિક્રયા સામે આવી હતી. 

સતાધાર વિસ્તારમાં આવેલા સ્વાગત સોસાયટીમાં રહેતા પ્રફુલ્લભાઇ  પટેલ ગઇ કાલે પુત્રને ટ્યૂશન ક્લાસથી લેવા માટે જ્યુપીટર લઇને ઘરેથી નીકળ્યા ત્યારે તેમનું અકસ્માતમાં મૃત્યુ નીપજ્યું હતું. પોલીસે સીસીટીવી ફૂટેજની તપાસ કરી હતી. જેમાં કાર નંબરના આધારે જાણવા મળ્યું હતું કે કોંગ્રેસના ઉપનેતા અને દંડક તેમજ દાણીલીમડાના ધારાસભ્ય શૈલેશ પરમારની તે કાર છે, જેની સ્પીડ વધુ હોવાનું દેખાઇ રહ્યુ છે.

ટ્રાફિક એ ડિવિઝન પોલીસે અજાણ્યા કાર ચાલક વિરુદ્ધમાં ગુનો દાખલ કરીને તપાસ શરૂ કરી હતી. શહેરમાં સ્પીડ લિમિટ થોડાક સમય પહેલાં નક્કી કરવામાં આવી છે ત્યારે ફૂટેજ જોતાં સ્પષ્ટ દેખાઇ રહ્યું છે કે કાર ચાલકની સ્પીડ નિયમ કરતાં વધુ હશે.

અકસ્માત ધારાસભ્યની કારથી થયેલો હોવાથી પોલીસ આ કેસમાં ઢીલ મૂકી રહી હોવાના પ્રફુલ્લભાઇના પરિવારજનોએ આક્ષેપ કર્યો હતો. ૧૨ કલાક થઇ ગયા છતાંય હજુ પોલીસ કર્મચારી પ્રફુલ્લભાઇના ઘરે તપાસ માટે પહોંચી નથી ત્યારે ડ્રાઇવર કોણ છે. તેનું નામ પણ જાણવાની તસ્દી પોલીસે લીધી નહોતી.

આ મામલે ટ્રાફિક એ ડિવિઝન પોલીસ કારની સ્પીડ નક્કી કરવા માટે એફએસએલની મદદ લેશે ત્યારે કાર શૈલેશ પરમાર ચલાવતા હતા કે અન્ય કોઇ તેની પણ સીસીટીવીના આધારે તપાસ કરવામાં આવશે.  શૈલેશ પરમારની કારના કાચ પર બ્લેક ફિલ્મ લાગેલી હોવાનું ખુદ એ ડિવિઝનના પીઆઇ પી.બી.ખાંભલા માની રહ્યા છે.