ચોર-લૂંટારુ ટોળકી દ્વારા અમદાવાદમાં રેકી કરીને સિક્યોરિટી ગાર્ડ વગરની સોસાયટીઓે અને એટીએમને ટાર્ગેટ કરીને મધરાતે તાળાં તોડી ચોરી કરવાનો પ્રયાસ કરવામાં આવી રહ્યો છે.ત્યારે એલિસબ્રિજ પાસે એસબીઆઈનું એટીએમ તોડવાનો પ્રયાસ કરતાં રંગેહાથ બે ચોરને પકડી પાડ્યા હતા જયારે એક ચોર ફરાર થઇ ગયો હતો.
બોડકદેવમાં આવેલ દેવસૃષ્ટિમાં રહેતા અને પોલિટેકનિક એસબીઆઈમાં મેનેજર તરીકે ફરજ બજાવતા કુલદીપ ગર્ગે એલિસબ્રિજ પોલીસ સ્ટેશનમાં ફરિયાદ નોંધાવી છે કે ગઈ કાલે મધરાતે મુંબઈમાં સીસીટીવી કેમેરાની સિસ્ટમનું મોનિટરિંગ કરતી ઈ-સર્વેલન્સ ટીમની ઓફિસમાં એલાર્મ વાગવા લાગ્યું હતું.
પોલીસને જાણ કરતાં પોલીસ ઘટનાસ્થળ પર પહોંચી
જેથી સીસીટીવી વગેરે મેન્ટેનન્સનું કામ કરતી કંપનીએ કુલદીપને ફોન પર કહ્યું કે એસબીઆઈના એટીએમમાં ગેસ કટર સાથે ચોર ઘૂસેલ છે અને સેન્સર તથા કેમેરા સાથે છેડછાડ કરી એટીએમ તોડવાનો પ્રયાસ કરે છે. મેનેજરે તાત્કાલિક પોલીસને જાણ કરતાં પોલીસ ઘટનાસ્થળ પર પહોંચી ગઈ હતી.
પોલીસે રંગેહાથ ઝડપી લીધા ચોરને
પોલીસે એટીએમનું શટર ઊંચું કરતાં બે ચોરને ગેસ કટરથી એટીએમ કાપવાની કોશિશ કરતાં રંગેહાથ ઝડપી પાડ્યા હતા, જયારે એટીએમ બહારથી એક યુવક ફરાર થઇ ગયો હતો. પોલીસે હાલ ગુનો નોંધી ફરાર યુવકની શોધખોળ શરૂ કરી છે.