સુવિધા / ખાસ કિસ્સામાં PMC બેન્કમાંથી રૂ. એક લાખ સુધી ઉપાડી શકાશે

• પીએમસીના ગ્રાહકો હવે એક લાખ રૂપિયા સુધીની રકમ ઉપાડી શકશે
• કોઇ પણ મેડિકલ ઇમર્જન્સીના કિસ્સામાં રૂ. એક લાખ સુધીની રોકડ રકમ ઉપાડી શકાશે

પીએમસી બેન્કના ગ્રાહકો મેડિકલ ઇમર્જન્સી, લગ્ન, સિનિયર સિટીઝન, શિક્ષણ અને દિવ્યાંગને મહત્તમ રૂ. એક લાખ સુધીનો ઉપાડ કરવાની મંજૂરી આપવામાં આવી છે, જોકે આ માટે તેમણે નાણાં ઉપાડતી વખતે જરૂરી પ્રમાણપત્ર બેન્કમાં જમા કરાવવાં પડશે.

આ અગાઉ પીએમસી બેન્કે રોકડ ઉપાડની મર્યાદા રૂ. ૨૫ હજારથી વધારીને રૂ. ૪૦ હજાર કરી દીધી હતી અને હવે કેટલાક ખાસ સંજોગોમાં આરબીઆઇએ રૂ. એક લાખ સુધીની રોકડ ઉપાડવા માટેની જોગવાઇ કરી છે.

આરબીઆઇ દ્વારા આપવામાં આવેલી જાણકારી અનુસાર કોઇ પણ મેડિકલ ઇમર્જન્સીના કિસ્સામાં રૂ. એક લાખ સુધીની રોકડ રકમ ઉપાડી શકાશે, જ્યારે લગ્ન, સિનિયર સિટીઝન, શિક્ષણ અને દિવ્યાંગ લોકો માટે આ ઉપાડ મર્યાદા રૂ. ૫૦ હજારની કરવામાં આવી છે. અત્રે ઉલ્લેખનીય છે કે રૂ. એક લાખ સુધીના રોકડ ઉપાડની આ મર્યાદા અગાઉ જાહેર કરેલ રૂ. ૪૦ હજારની ઉપાડ મર્યાદા ઉપરાંત નથી.

જો મેડિકલ ઇમર્જન્સીમાં રૂ. એક લાખ સુધીની રોકડ ઉપાડ કરવી હશે તો તે માટે ગ્રાહકોએ તબીબી પ્રમાણપત્ર રજૂ કરવું પડશે એટલું જ નહીં મેડિકલ રિપોર્ટ અને સારવારના બિલ પણ જમા કરાવવા પડશે, જ્યારે સિનિયર સિટીઝને રૂ. ૫૦ હજાર ઉપાડવા માટે એજ સર્ટિફિકેટ રજૂ કરવું પડશે. 

દિવ્યાંગોએ પણ સંબંધિત પ્રમાણપત્ર રજૂ કરવાનું રહેશે. શિક્ષણ માટે રકમ ઉપાડવા માટે ફીની રિસિપ્ટ અને અન્ય ખર્ચાની વિગતો રજૂ કરવી પડશે, જ્યારે લગ્ન માટે ઇન્વિટેશન કાર્ડ, હોલ બુકિંગ રિસિપ્ટ, દાગીનાની ખરીદીના બિલ વગેરે રજૂ કરવા પડશે.