પાકિસ્તાનના વડાપ્રધાન શાહબાઝ શરીફ અને તેમનો પુત્ર અને પંજાબના મુખ્યમંત્રી હમઝા શાહબાઝ પર ધરપકડની તલવાર લટકી રહી છે
પાકિસ્તાનમાં ગૃહયુદ્ધના ભણકારા
પાકિસ્તાનના PM પર ધરપકડની તલવાર લટકી
મની લોન્ડ્રીંગ કેસમાં FIR નોંધાઈ
પાકિસ્તાનના વડાપ્રધાન શાહબાઝ શરીફ અને તેમનો પુત્ર અને પંજાબના મુખ્યમંત્રી હમઝા શાહબાઝ પર ધરપકડની તલવાર લટકી રહી છે. પાકિસ્તાનની ફેડરલ ઇન્વેસ્ટિગેશન એજન્સી (FAI)એ મની લોન્ડરિંગના મામલામાં FIR દાખલ કરી છે. હવે PM શાહબાઝ શરીફ અને તેમના પુત્રની 14 અબજના મની લોન્ડરિંગ કેસમાં ગમે ત્યારે ધરપકડ થઈ શકે છે. FIAએ વધુ તપાસ માટે PM શહબાઝ શરીફ અને તેમના પુત્ર હમઝા શાહબાઝની ધરપકડ કરવા કોર્ટને વિનંતી કરી છે. જો કે કોર્ટે તેમના આગોતરા જામીન 11મી જૂન સુધી લંબાવ્યા હતા.
શાહબાઝ અને તેના પુત્રો તપાસકર્તાઓને સહકાર આપતા નથી
FIAએ 14 અબજ રૂપિયાના મની લોન્ડરિંગ કેસમાં વડાપ્રધાન અને અન્ય શકમંદો વિરુદ્ધ વચગાળાની તપાસ રિપોર્ટ પણ દાખલ કર્યો છે. પીએમ શાહબાઝ અને હમઝા કડક સુરક્ષા વચ્ચે સ્પેશિયલ કોર્ટમાં હાજર થયા હતા. કોર્ટના એક અધિકારીએ જણાવ્યું હતું કે, "એફઆઈએના વકીલે કોર્ટમાં તપાસ અહેવાલ રજૂ કર્યો અને મુખ્ય શકમંદો - વડાપ્રધાન શાહબાઝ અને હમઝાની ધરપકડની માંગ કરી છે. દલીલ કરી છે કે, કેસમાં વધુ તપાસ માટે તેમની કસ્ટડી જરૂરી છે કારણ કે તેઓ તપાસમાં જોડાયા નથી અને તપાસકર્તાઓને સહકાર આપ્યો નથી.
પીએમ શાહબાઝના વકીલ અમજદ પરવેઝે FIAની અરજી પર સખત વાંધો ઉઠાવ્યો અને તેને "એજન્સીનો ખોટો દાવો" ગણાવ્યો હતો. તેમણે કહ્યું કે, પિતા અને પુત્રની ભૂમિકાની તપાસ FIA દ્વારા કરવામાં આવી ચુકી છે, જ્યારે તેઓ લાહોરમાં જેલમાં હતા. પરવેઝે કહ્યું કે, તેનો અસીલ પણ જ્યારે તે જેલમાં હતો, ત્યારે તપાસમાં જોડાયા હતા અને FIA ઓફિસમાં તપાસકર્તાઓ સમક્ષ પણ હાજર થયા હતા.