ઋષિ સુનકના બ્રિટનના પ્રધાનમંત્રી બન્યા બાદ રશિયાએ નવી સરકારને લઈને નિવેદન આપ્યું છે અને કહ્યું છે કે યુકે પાસેથી સારા સંબંધોની કોઈ આશા નથી.
ઋષિ સુનકે યુક્રેનના રાષ્ટ્રપતિ સાથે કરી વાતચીત
રશિયાએ બ્રિટનની નવી સરકાર અંગે આપ્યું નિવેદન
યુકે પાસેથી સારા સંબંધોની કોઈ આશા નથીઃ રશિયા
બ્રિટનના નવા પ્રધાનમંત્રી તરીકે કાર્યભાર સંભાળતાની સાથે જ ઋષિ સુનક (Rishi Sunak) એક્શનમાં આવી ગયા છે અને તેમણે પોતાનું કામ શરૂ કરી દીધું છે. પીએમ બન્યા બાદ ઋષિ સુનકે યુક્રેનના રાષ્ટ્રપતિ વોલોદિમિર ઝેલેન્સ્કી (Volodymyr Zelensky) સાથે વાત કરી. આ બધા વચ્ચે રશિયાએ પણ બ્રિટનની નવી સરકાર અંગે નિવેદન આપ્યું અને કહ્યું કે યુકે પાસેથી સારા સંબંધની કોઈ આશા નથી.
બ્રિટનની સાથે સંબંધોમાં સુધારો થવાની નથી કોઈ આશાઃ રશિયા
ઋષિ સુનકના પ્રધાનમંત્રી બન્યા બાદ રશિયાએ કહ્યું કે, તેમના કાર્યકાળ દરમિયાન રશિયાને બ્રિટન સાથે સંબંધોમાં સુધારો થવાની આશાનું કોઈ કારણ દેખાતું નથી. ક્રેમલિનના પ્રવક્તા દમિત્રિ પેસકોવે (Dmitry Peskov) ઋષિ સુનકના પ્રધાનમંત્રી બનવા પર નિવેદન આપતા કહ્યું કે, રશિયાને નજીકના ભવિષ્યમાં બ્રિટન સાથે વધુ રચનાત્મક સંબંધ બનાવવા માટે કોઈ 'પૂર્વ શરત, આધાર કે આશા' દેખાતી નથી.
યુક્રેન સાથે યુદ્ધ બાદ રશિયા-બ્રિટનના સંબંધોમાં ખટાસ
વાસ્તવમાં રશિયાએ આ વર્ષે ફેબ્રુઆરીમાં જ્યારે યુક્રેન પર હુમલો કર્યો, ત્યારે બ્રિટને યુક્રેનનું સમર્થન કર્યું હતું અને ત્યારબાદથી રશિયા સાથેના તેના સંબંધોમાં ખટાશ આવી ગઈ છે. બ્રિટન યુક્રેનના રાષ્ટ્રપતિ વોલોદિમિર ઝેલેન્સ્કી (Volodymyr Zelenskyy)ના પ્રમુખ સમર્થકોમાંથી એક છે. બોરિસ જ્હોન્સન જ્યારે બ્રિટનના પ્રધાનમંત્રી હતા ત્યારે તેમણે યુદ્ધગ્રસ્ત યુક્રેનની રાજધાની કીવ પહોંચીને બધાને ચોંકાવી દીધા હતા.
ઋષિ સુનકને લઈને ઝેલેન્સ્કીએ કર્યું ટ્વીટ
યુક્રેનના રાષ્ટ્રપતિ વોલોદિમિર ઝેલેન્સ્કીએ ઋષિ સુનકને ટ્વીટ કરીને શુભેચ્છા પણ પાઠવી છે. તેમણે ટ્વીટ કરીને કહ્યું કે, 'હું કામના કરું છું કે તમે બ્રિટિશ સમાજ અને સમગ્ર વિશ્વ સામેના તમામ પડકારોનો સફળતાપૂર્વક સામનો કરો. હું યુક્રેન અને બ્રિટન રણનીતિક ભાગીદારીને એકજૂથ થઈને મજબૂત બનાવી રાખવા માટે તૈયાર છું.'
In an excellent conversation with @RishiSunak we agreed to write a new chapter in 🇺🇦-🇬🇧 relations but the story is the same - full support in the face of Russian aggression. I appreciate PM’s first call to Ukraine. And always grateful for the support of the 🇬🇧 people.
બ્રિટને ભારત સહિત ઘણા દેશોની સાથે કરી ચર્ચા
ઋષિ સુનકના પ્રધાનમંત્રી બનતાની સાથે જ બ્રિટનના વિદેશ મંત્રી જેમ્સ ક્લેવરલીએ યુક્રેન અંગે ભારત સહિત અનેક દેશો સાથે ચર્ચા કરી અને યુક્રેનને સહયોગ આપવાની વાત કરી. ક્લેવરલીએ સૌથી પહેલા સિંગાપુરના વિદેશ મંત્રી વિવિયન બાલકૃષ્ણન સાથે રશિયા-યુક્રેન યુદ્ધ અંગે વાત કરી. ત્યારબાદ ભારતના વિદેશમંત્રી એસ જયશંકર સાથે પણ વાત કરી. યુએઈના વિદેશમંત્રી શેખ અબ્દુલ્લા બિન જાયદ અલ નાહયાન, યુક્રેનના વિદેશમંત્રી દિમિત્રો કુલેબા, તુર્કીના વિદેશમંત્રી મેવલુત કૈવુસોગ્લુ સાથે પણ વાત કરી.