વાતચીત / ઈરાન-USમાં યુદ્ધના ભણકારા વચ્ચે PM મોદીએ ટ્રમ્પ સાથે ફોન પર કરી વાત, થઈ આ મુદ્દે ચર્ચાઓ

• PM મોદી-ટ્રમ્પ વચ્ચે થઈ ફોન પર વાત
• એકમેકને નવા વર્ષની શુભેચ્છા આપી 
• સહકાર આપવા મામલે થઈ ચર્ચા

પીએમ મોદીના કાર્યાલય તરફથી મળતી માહિતી અનુસાર જાણવા મળી રહ્યું છે કે પીએમ મોદી અને અમેરિકી રાષ્ટ્રપતિ ડોનાલ્ડ ટ્રંપે એકમેકને નવા વર્ષની શુભકામનાઓ આપી છે. બંને દેશો વચ્ચેના સંબંધ છેલ્લા થોડા સમયથી મજબૂત બન્યા છે. આ સંબંધો વિશ્વાસ સાથે આગળ વધી રહ્યા છે. 

ઈરાન - અમેરિકામાં સારી નથી સ્થિતિ

પીએમ મોદી અને અમેરિકી રાષ્ટ્રપતિ ડોનાલ્ડ ટ્રંપની વચ્ચે વાતચીત ત્યારે થઈ છે જ્યારે આખી દુનિયાની નજર અમેરિકા અને ઈરાનના સંબંધો પર છે. અમેરિકા દ્વારા ઈરાની જનરલ સુલેમાનીને એર સ્ટ્રાઈકમાં મારી નાંખવામાં આવ્યો છે ત્યારબાદ ઈરાન અકળાયું છે. ઈરાન તરફથી સતત બદલો લેવાની ધમકી આપવામાં આવી રહી છે. તો અમેરિકાએ પણ પાછા પગલાં લીધા નથી. આ કારણ છે કે દુનિયામાં આ સમયે ટેન્શનની સ્થિતિ છે અને દરેક વ્યક્તિ યુદ્ધની સ્થિતિ ટાળવાનો પ્રયાસ કરી રહી છે. 

ઈરાન અને ભારતના વિદેશમંત્રીઓએ પણ કરી હતી ફોન પર વાતચીત

ઉલ્લેખનીય છે કે વિદેશમંત્રી એસ. જયશંકરે હાલની સ્થિતિમાં ઈરાનના વિદેશમંત્રી સાથે ફોન પર વાત કરી હતી અને હાલની સ્થિતિની ચર્ચા પણ કરી હતી. આ સમયે એસ. જયશંકરે ઈરાની વિદેશમંત્રી સાથે સંયમથી વર્તવાની સલાહ આપી હતી. આ સિવાય અમેરિકી વિદેશમંત્રી માઈક પોમ્પિયોએ પણ એસ. જયશંકરની સાથે ફોન પર વાત કરીને તેમને અમેરિકાના એક્શનની જાણકારી આપી હતી.