આગામી સપ્તાહે પીએમ મોદી બેહરીન અને UAEના પ્રવાસે જશે. PM મોદીને UAEના સર્વોચ્ચ સન્માન ઝાયદ મેડલથી સન્માનિત કરવામાં આવશે. ઝાયદ મેડલ UAEનું સર્વોચ્ચ નાગરિક સન્માન છે. પીએમ મોદી બેહરીનના નેતાઓ સાથે મુલાકાત પણ કરશે અને ભારતીય સમુદાયના લોકોને સંબોધિત પણ કરશે.
G7 બેઠકમાં વિશેષ અતિથિ તરીકે રહેશે હાજર
બાદમાં પીએમ મોદી ફ્રાંસમાં G7 બેઠકમાં ભાગ લેવા જશે. પીએમ મોદીને G7 બેઠકમાં વિશેષ અતિથિ તરીકે આમંત્રિત કરવામાં આવ્યા છે. G7 સમૂહ દેશોનું 45મું સંમેલન આગામી 24થી 26 ઓગસ્ટ દરમિયાન ફ્રાંસના બિયારિત્ઝમાં યોજાશે.
UAE નું સર્વોચ્ચ નાગરિક સન્માન
ઉલ્લેખનીય છે કે, 'ઝાયદ મેડલ' UAE નું સર્વોચ્ચ નાગરિક સન્માન છે. જે કોઇ રાષ્ટ્રના રાજા, રાષ્ટ્રપતિ અથવા રાષ્ટ્ર પ્રમુખને આપવામાં આવે છે. પ્રધાનમંત્રીને આ સન્માન બંન્ને દેશો વચ્ચે લાંબા સમયગાળાથી ચાલી આવતી મિત્રતા અને સંયુક્ત વ્યૂહાત્મક સહયોગને મજબૂત કરવાની ભૂમિકા માટે આપવામાં આવી રહ્યું છે.
ટ્વીટ કરી ભારત-UAEના સંબંધોના કર્યા વખાણ
યુએઈ આર્મીના ડેપ્યુટી સુપ્રીમ કમાન્ડર શેખ મોહમ્મદ બિન ઝાયદ અલ નહ્યાને પોતાના ટ્વીટર પર એક પોસ્ટ કરતા લખ્યું હતું કે, સંયુક્ત આરબ અમીરાત અને ભારત વચ્ચે અમારા ઐતિહાસિક તથા વ્યાપક સંબંધો રહ્યા છે. તેને વધુ મજબૂત બનાવવા માટે પ્રિય મિત્ર ભારતીય પ્રધાનમંત્રી નરેન્દ્ર મોદીએ અગત્યની ભુમિકા ભજવી છે. તેમના આ પ્રયાસની પ્રશંસા કરતા અમે તેમને ઝાયદ મેડલ પ્રદાન કરીએ છીએ.