ભારતે જમ્મૂ-કાશ્મીર પર લીધેલા નિર્ણયને લઇને પાકિસ્તાન વિશ્વના દેશોથી અલગ-થલગ પડી ગયું છે. પાકિસ્તાન વારંવાર દુનિયા સમક્ષ જમ્મૂ-કાશ્મીરના મુદ્દાને લઇને સમર્થન માટે પ્રયત્ન કરી રહ્યું છે. જો કે આ દરમિયાન વડાપ્રધાન નરેન્દ્ર મોદી અને અમેરિકાના રાષ્ટ્રપતિ ડોનાલ્ડ ટ્રમ્પ વચ્ચે સોમવારની મોડી રાતે વાતચીત થઇ હતી.
પીએમ મોદીએ બંને દેશો વચ્ચેના સંબંધો તેમજ ક્ષેત્રિય વિસ્તારને લઇને ટ્રમ્પ જોડે ચર્ચા કરી હતી. પીએમ મોદીએ અમેરિકાના રાષ્ટ્રપતિ ડોનાલ્ડ ટ્રમ્પને જણાવ્યું હતું કે પાકિસ્તાને આતંકવાદને સહકાર આપવાનું બંધ કરવું જ પડશે. જો કે પીએમ મોદી સાથે વાતચીત કર્યા બાદ અમેરિકાના રાષ્ટ્રપતિ ટ્રમ્પે પાકિસ્તાનના પીએમ ઇમરાન ખાન સાથે પણ વાતચીત કરી હતી.
ડોનાલ્ડ ટ્રમ્પને પીએમ મોદીએ શું કહ્યું ?
ઉલ્લેખનીય છે કે, વડાપ્રધાન નરેન્દ્ર મોદી અને ટ્રમ્પ વચ્ચે થયેલી વાતચીત દરમિયાન સરહદ પર થઇ રહેલી આતંકવાદી પ્રવૃત્તિનો ઉલ્લેખ કરવામાં આવ્યો હતો. આ સાથે જ પાકિસ્તાનનું નામ લીધા વગર પીએમ નરેન્દ્ર મોદીએ કહ્યું હતું કે, કેટલાક નેતાઓ દ્વારા કરવામાં આવતું ભારત વિરૂદ્ધ ભડકાઉ નિવેદનબાજી ક્ષેત્રીય શાંતિ માટે લાભદાયી નથી.
રાષ્ટ્રપતિ ટ્રમ્પ સાથે વાતચીત દરમિયાન PM મોદીએ આતંક અને હિંસા મુક્ત વાતાવરણના નિર્માણ પર ભાર મુક્યો હતો અને કહ્યું કે, આવા વાતાવરણમાં સીમા પર આતંકવાદની કોઇ જગ્યા ન હોવી જોઈએ.
પીએમ મોદી બાદ ઇમરાન ખાનને કરી ટ્રમ્પ સાથે વાત
ઉલ્લેખનીય છે કે વડાપ્રધાન નરેન્દ્ર મોદીએ ડોનાલ્ડ ટ્રમ્પ સાથે વાત કરી હોવાના અહેવાલ પ્રગટ થયા બાદ પાકિસ્તાનના વડાપ્રધાન ઇમરાન ખાને પણ ટ્રમ્પ સાથે વાત કરી હતી. ઇમરાન ખાન અને ડોનાલ્ડ ટ્રમ્પની વાતચીત દરમિયાન ક્ષેત્રીય મુદ્દા પર વાત થઇ.
અમેરિકાના રાષ્ટ્રપતિ ટ્રમ્પે ઇમરાન ખાનને ભારત સાથેના સંબંધોમાં શાંતિ જાળવવા જણાવ્યું હતું. આ સાથે અમેરિકાના રાષ્ટ્રપતિએ પાકિસ્તાનના પીએમને કોઇપણ પ્રકારના એકશન, આક્રમકતાથી દૂર રહેવા જણાવ્યું. ડોનાલ્ડ ટ્રમ્પે ઇમરાન ખાનને શાંતિ રાખવા કહ્યું હતું.
ડોનાલ્ડ ટ્રમ્પે આ અંગેની જાણકારી ટવિટ કરી આપી
અમેરિકાના રાષ્ટ્રપતિ ડોનાલ્ડ ટ્રમ્પે બંને નેતાઓ સાથેની વાતચીત અંગેની જાણકારી ટવિટ કરી આપી હતી. ટ્રમ્પે કહ્યું કે મેં મારા સારા મિત્ર ભારતના વડાપ્રધાન નરેન્દ્ર મોદી સાથે વાતીચીત કરી. જ્યારે પાકિસ્તાનના પીએમ ઇમરાન ખાન સાથે પણ વાતચીત થઇ. પીએમ મોદીની સાથેની વાતચીતમાં વેપાર અને જમ્મૂ-કાશ્મીરને લઇને ચર્ચા થઇ.
US President Donald Trump: Spoke to my two good friends, PM Modi of India, & PM Khan of Pakistan, regarding trade, strategic partnerships and, most importantly, for India and Pakistan to work towards reducing tensions in Kashmir. A tough situation, but good conversations. pic.twitter.com/x9aoBsOGGe