લખનઉઃ પ્રધાનમંત્રી મોદીનાં હમશકલ અને એક વખતનાં પ્રશંસક, અભિનંદન પાઠક લખનૌથી રાજનાથ સિંહ સામે લડશે ચૂંટણી. શુક્રવારનાં રોજ સ્વતંત્ર ઉમેદવાર તરીકે અભિનંદને ફોર્મ ભર્યું હતું.
એક વખત વડા પ્રધાન મોદીનાં પ્રશંસક અને લગભગ તેમનાં જેવા જ દેખાય છે તે અભિનંદન પાઠકે લખનઉ લોકસભાથી ચૂંટણી લડવાની જાહેરાત કરી છે. તેઓ અહીંથી કેન્દ્રીય ગૃહમંત્રી અને ભાજપનાં ઉમેદવાર રાજનાથસિંહ સામે સ્વતંત્ર ઉમેદવાર તરીકે ચૂંટણી લડશે. અગાઉમાં એક એવી ચર્ચા હતી કે તે વિવાદાસ્પદ સંગઠન ઉત્તર પ્રદેશ નવનિર્માણ સેનાનાં બેનર હેઠળ પણ ચૂંટણી લડી શકે છે.
શુક્રવારનાં રોજ સ્વતંત્ર ઉમેદવાર તરીકે ઉમેદવારી કરવા પહોંચેલ અભિનંદને જણાવ્યું કે, "હું લોકસભાની ચૂંટણીમાં લખનઉ બેઠકથી લડવા જઇ રહ્યો છું. હું જુમલાવાળો નથી કે નથી હું જૂઠ્ઠું બોલનારો અને ના તો હું રાફેલવાળો છું. મારું કામ સત્ય બોલવું અને સેવા કરવી જ છે."
પ્રધાનમંત્રી નરેન્દ્ર મોદી જેવાં દેખાવને કારણે ઘણી વખત અભિનંદન પાઠક વિશેષ રીતે ચર્ચામાં પણ રહ્યાં છે. ગયાં વર્ષે તેઓએ કૉંગ્રેસમાં જોડાવાનાં ઇરાદા સાથે ઉત્તર પ્રદેશની કોંગ્રેસ ઓફિસ પર પણ પહોંચ્યાં હતાં. સહારનપુરનાં નિવાસી અભિનંદન પાઠકે એવો આરોપ લગાવ્યો છે કે ચૂંટણી પ્રચાર દરમ્યાન ભાજપે તેમનો ઘણો ઉપયોગ કર્યો છે. 2015ની દિલ્હીની વિધાનસભાની ચૂંટણીમાં અને 2017ની યુપી વિધાનસભા ચૂંટણીમાં તેઓ વડા પ્રધાનમંત્રી મોદીની રેલીમાં આકર્ષણનું કેન્દ્ર પણ બન્યાં હતાં.