વડાપ્રધાન નરેન્દ્ર મોદી વધુ એક વખત આવતીકાલે ગુજરાતના પ્રવાસે આવી રહ્યા છે. તેઓની ગુજરાતીની મુલાકાતને પગલે ભારતના પ્રધાનમંત્રી નરેન્દ્રભાઇ મોદીના હસ્તે સાબરડેરીમાં 1000 કરોડથી વધુના ત્રણ પ્લાન્ટનું લોકાર્પણ તેમજ ખાતમુહૂર્ત કરવામાં આવશે.
નવનિર્મિત પાવડર પ્લાન્ટનું PM નરેન્દ્ર મોદીના હસ્તે લોકાર્પણ કરાશે
આવતીકાલે 28 જુલાઈના સાબર ડેરી ખાતે ૩૦૫ કરોડના ખર્ચે બનેલ નવનિર્મિત પાવડર પ્લાન્ટનું PM નરેન્દ્ર મોદીના હસ્તે લોકાર્પણ કરવામાં આવશે. સાથે જ ૧૨૫ કરોડના ખર્ચે નિર્મિત ટેટ્રાપેકનું વર્ચ્યુઅલ લોકાપર્ણ અને ૬૦૦ કરોડના ખર્ચે તૈયાર થનાર ચીઝ પ્લાન્ટનું ખાતમુહૂર્ત કરવામાં આવશે. આ ઉપરાંત સુકન્યા યોજના અન્વયે દિકરીઓને ખાતા ખોલવાનો કાર્યક્રમ અને મહત્તમ દૂધ ઉત્પાદન કરનાર મહિલા પશુપાલકોનું સન્માન કરવામાં આવશે. ત્યારબાદ PM મોદી જિલ્લાના પ્રગતિશીલ મહિલા ખેડૂતો તેમજ આદિવાસી મહિલા દૂધ ઉત્પાદકો સાથે મુલાકાત કરશે.
નરેન્દ્ર મોદીનું સાબર ડેરીને દીર્ઘદ્રષ્ટીપૂર્ણ માર્ગદર્શન સમયાંતરે મળતું રહ્યું છે: ચેરમેન
દેશના વડાપ્રધાન નરેન્દ્ર મોદીના હસ્તે સાબરકાંઠા-અરવલ્લી જિલ્લાના પશુપાલકોની જીવાદોરી સમાન સાબરડેરીના વિવિધ પ્લાન્ટના લોકાપર્ણ અને ખાતમુહૂર્ત કરાશે છે. જેને પગલે તૈયારીઓનો ધમધમાટ ચાલી રહ્યો છે. સાબરડેરી ખાતે 28 જુલાઈ 2022ના રોજ પ્રધાનમંત્રી નરેન્દ્ર મોદીના હસ્તે રૂ. ૩૦૫ કરોડના ખર્ચે નવનિર્મિત પાવડર પ્લાન્ટનું લોકાપર્ણ કરશે. હાલના સમયમાં સાબર ડેરી સાબરકાંઠા ખેડૂતોની જીવાદોરી છે. આજે સાબર ડેરી આખા દેશમાં જાણીતી બની છે. આ અંગે સાબર ડેરીના ચેરમેન શામળ ભાઈ પટેલે જણાવ્યું કે વડાપ્રધાન નરેન્દ્ર મોદીનું સાબર ડેરીને દીર્ઘદ્રષ્ટીપૂર્ણ માર્ગદર્શન સમયાંતરે મળતું રહ્યું છે. તેમણે આપેલા વિચારબીજ ક્રમશ: વટવૃક્ષબનતા જાય છે. તેના ફળ આજે સાબરકાંઠા જિલ્લા સહિત ઉત્તર ગુજરાત અને આસપાસના લોકો મેળવી રહ્યા છે.
સ્થાનિક રોજગારને મોટું મહત્વ મળશે
વધુમાં તેમણે ઉમેર્યું હતું કે, વર્ષ ૧૯૬૪-૬૫માં માત્ર ૧૯ દૂધમંડળીથી શરૂ થયેલી ડેરી આજે ૧૭૯૮ કાર્યરત દૂધ મંડળી ધરાવે છે. એ જ રીતે માત્ર ૨૯ સભાસદો સાથે શરૂ થયેલી ડેરી આજે ૩,૮૪,૯૮૬ સભાસદોનું સુદ્રઢ પીઠબળ ધરાવે છે. સ્થાપના સમયે એટલે કે વર્ષ ૧૯૬૪-૬૫માં માત્ર ૦.૦૫ લાખ લિટર દૂધ સંપાદનથી શરૂઆત કરી આજે દૈનિક સરેરાશ ૩૩.૨૭ લાખ લીટર પ્રતિદિન દૂધનું સંપાદન કરવામાં આવી રહ્યું છે. આગામી સમયમાં સ્થાનિક રોજગારને પણ ખૂબ મોટું મહત્વ મળશે તે અંગેનો આશાવાદ વ્યક્ત કર્યો હતો.