દમણઃ પ્રધાનમંત્રી નરેન્દ્ર મોદી આજે 24મી ફેબ્રુઆરીના રોજ રાજ્યના પડોશના સંઘ પ્રદેશ દમણમાં આવી રહ્યાં છે. પીએમ બન્યા બાદ મોદી પ્રથમ વખત દમણ આવી રહ્યાં હોવાથી પ્રદેશનું પ્રશાસન અને લોકો પ્રધાનમંત્રીને આવકારવા થનગની રહ્યાં છે. પીએમને આવકારવા અને સ્વાગત માટે દમણને દુલ્હનની જેમ શણગારવામાં આવી રહ્યું છે.
મહત્વપૂર્ણ છે કે દમણની મુલાકાત વખતે પ્રધાનમંત્રી નરેન્દ્ર મોદીના હસ્તે દમણ અને દીવ વચ્ચેની હેલિકોપ્ટર સેવાનો આરંભ કરવામાં આવશે. આ હેલીકોપ્ટર સેવા શરૂ થયા બાદ દમણથી દીવ હેલિકોપ્ટર દ્વારા માત્ર એક કલાકમાં જ પહોંચી શકાશે. એક હજાર કરોડથી પણ વધુના 31 જેટલા વિકાસના કામોનું લોકાર્પણ અને ખાતમુહર્ત થશે. પ્રશાસન દ્વારા આ અંગે તડામાર તૈયારીઓ ચાલી રહી છે.
એકજ પ્રદેશ ના બે ભાગ એવા દમણ અને દીવ વચે રોડ માર્ગે 700 કિલોમીટર જેટલું અંતર છે. આથી દમણથી દીવ રોડ માર્ગે પહોંચતા 14 કલાકથી વધુ સમય લાગે છે. જોકે હવે આ હેલીકોપ્ટરની સેવા શરૂ થયા બાદ દમણથી દીવ હેલિકોપ્ટરમાં માત્ર એક કલાક માંજ પહોંચી શકાશે.
આથી આ સેવા અહીંના લોકો અને તંત્ર માટે અનેક રીતે ફાયદાકારક પુરવાર થશે. આ સાથે જ નરેન્દ્ર મોદી દમણ અને દીવ ના વિકાસ માટે સરકારના વિવિધ યોજનાઓ અંતર્ગત તૈયાર થયેલ અને પ્રગતિમાં રહેલા એક હજાર કરોડથી પણ વધુના 31 જેટલા વિકાસના કામોનું લોકાર્પણ અને ખાત્મૂર્હૂત થનાર છે. આમ મોદીની મુલાકાતને લઈને પ્રશાસન દ્વારા તડામાર તૈયારીઓ ચાલી રહી છે.