વિદેશ પ્રવાસ / 5મી વાર સિંગાપોર પહોંચેલા PM મોદીનું કરાયું ભવ્ય સ્વાગત, ગળે લગાવીને અભિવાદન કર્યું, જુઓ Video

PM Modi Singapore : PM મોદી બુધવારે બ્રુનેઈની મુલાકાત લીધા બાદ બુધવારે 2 દિવસની મુલાકાતે સિંગાપુર પહોંચ્યા હતા. અહીં વડાપ્રધાન લોરેન્સ વોંગે તેમનું ઉષ્માભર્યું સ્વાગત કર્યું હતું. જે બાદમાં બંને નેતાઓએ ડિનર પણ લીધું હતું જેનું આયોજન વડાપ્રધાન વોંગ દ્વારા PM મોદીના સન્માનમાં કરવામાં આવ્યું હતું. વડાપ્રધાન નરેન્દ્ર મોદીનું સિંગાપોરના સંસદ ભવન ખાતે ઔપચારિક સ્વાગત કરવામાં આવ્યું હતું. વડાપ્રધાન નરેન્દ્ર મોદીએ સિંગાપોરના સંસદ ભવનમાં તેમના સિંગાપોરના સમકક્ષ લોરેન્સ વોંગ સાથે મુલાકાત કરી હતી.

આ સાથે PM મોદી સિંગાપોર પહોંચ્યા અને ભારતીય સમુદાયના લોકોએ તેમનું સ્વાગત કર્યું. આ દરમિયાન PM મોદીએ ઢોલ પણ વગાડ્યો હતો. PM મોદી નું સ્વાગત કરવા પહોંચેલા કલાકારો ઢોલના તાલે નાચતા જોવા મળ્યા હતા. લોકોએ PM મોદીને કેસરી રંગનો ટુવાલ અર્પણ કર્યો હતો.

6 વર્ષ બાદ સિંગાપુર પહોંચ્યા PM મોદી

વડાપ્રધાન મોદી 6 વર્ષ બાદ સિંગાપોરની મુલાકાતે આવ્યા છે. અગાઉ તેઓ નવેમ્બર 2018માં સિંગાપુર ગયા હતા. ભારતીય સમુદાયના લોકો પણ તેમના સ્વાગત માટે જ્યાં રોકાયા છે તે હોટલની બહાર હાજર હતા. લોકોએ PM મોદી સાથે સેલ્ફી પણ લીધી હતી. આ સાથે તેઓએ 'રામચંદ્ર કી જય' અને 'ગણપતિ બાપ્પા મોર્યા' ના નારા લગાવ્યા. આ દરમિયાન એક મહિલાએ તેમને રાખડી પણ બાંધી હતી. તેમની સિંગાપુર મુલાકાત દરમિયાન PM મોદી રાષ્ટ્રપતિ થર્મન ષણમુગરત્નમ સહિત અનેક વરિષ્ઠ નેતાઓને મળશે. PM મોદી સિંગાપોરના વેપારી સમુદાયના નેતાઓને પણ મળશે.

સિંગાપોરના વડાપ્રધાન અને રાષ્ટ્રપતિ સાથે મુલાકાત

PM મોદી સવારે સિંગાપોરના વડાપ્રધાન સાથે મુલાકાત કરશે જ્યાં તેમનું ઔપચારિક સ્વાગત કરવામાં આવશે. આ પછી તેઓ સિંગાપોરના રાષ્ટ્રપતિ થર્મન ષણમુગરત્નમ, વરિષ્ઠ મંત્રીઓ અને અન્ય મહાનુભાવો સાથે પણ બેઠક કરશે. બેઠક દરમિયાન PM મોદી સિંગાપોરના વડાપ્રધાન સાથે સેમિકન્ડક્ટર ફેસિલિટી AEMની પણ મુલાકાત લેશે. સુવિધાની મુલાકાત લીધા પછી તેઓ સિંગાપોરની કંપનીઓના સીઈઓ સાથે બેઠક કરશે.

જાણો કેમ ખાસ છે આ મુલાકાત ?

વડાપ્રધાન મોદીની આ મુલાકાત ભારતની એક્ટ ઈસ્ટ પોલિસી પર ભાર આપવાના સંદર્ભમાં ખૂબ જ ખાસ છે. આ પ્રવાસ દ્વારા ભારત અને સિંગાપોર વચ્ચે આર્થિક અને તકનીકી સંબંધોને પ્રોત્સાહન આપવાના પ્રયાસો કરવામાં આવી રહ્યા છે. આ ઉપરાંત ઈન્ડો-પેસિફિક ક્ષેત્રમાં બંને વચ્ચે પરસ્પર સહયોગને પ્રોત્સાહન આપવું એ પણ આ પ્રવાસનો એક મહત્વપૂર્ણ ઉદ્દેશ્ય છે.

સિંગાપોર પહેલા બ્રુનેઈના પ્રવાસે હતા PM મોદી

PM મોદીએ 3 અને 4 સપ્ટેમ્બરે બ્રુનેઈની મુલાકાત લીધી હતી. દરમિયાન બુધવારે PMએ બ્રુનેઈના સુલતાન બોલ્કિયા સાથે દ્વિપક્ષીય બેઠક યોજી હતી. બંને નેતાઓ વચ્ચે સંરક્ષણ, વેપાર, શિક્ષણ, ટેકનોલોજી અને આરોગ્ય જેવા મહત્વના મુદ્દાઓ પર ચર્ચા થઈ હતી. પ્રતિનિધિમંડળ સ્તરની બેઠક બાદ ભારત અને બ્રુનેઈ વચ્ચે MOU પર પણ હસ્તાક્ષર કરવામાં આવ્યા હતા. તેમણે બંદર સેરી બેગવાન અને ચેન્નાઈ વચ્ચે સીધી ફ્લાઈટ શરૂ કરવાના નિર્ણયને આવકાર્યો હતો. આ સિવાય બંને નેતાઓએ પ્રાદેશિક અને વૈશ્વિક મુદ્દાઓ પર પણ ચર્ચા કરી હતી.

વધુ વાંચો : આજનો દિવસ મંગલમય, આ જન્મતારીખ વાળા લોકોની આર્થિક સ્થિતિ પહેલા કરતા વધારે સારી

આ દરમિયાન તેઓ આસિયાન દેશોના વિકાસ માટે કામ કરવા માટે સંમત થયા હતા. બ્રુનેઈના સુલતાને વિશ્વના સૌથી મોટા મહેલ 'ઈસ્તાના નુરુલ ઈમાન'માં PM મોદીના સન્માનમાં લંચનું પણ આયોજન કર્યું હતું. PM મોદી કહ્યું કે, બ્રુનેઈમાં મારું ઉષ્માભર્યું સ્વાગત કરવામાં આવ્યું, જેના માટે હું રાજવી પરિવારનો આભાર માનું છું.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ