ગાંધીનગર / વિદ્યા સમીક્ષા કેન્દ્રથી રમત-ગમત, શિક્ષણ અને પોષણ અંગે PM મોદીનો ઈ-સંવાદ, વિદ્યાર્થીનીને પૂછ્યું- ફર્સ્ટ આવે છે એટલે તને ઉભી કરી ?

• પ્રધાનમંત્રી નરેન્દ્ર મોદી ત્રણ દિવસની ગુજરાતની મુલાકાતે
• પ્રધાનમંત્રીએ દેશના પ્રથમ “વિદ્યા સમીક્ષા કેન્દ્ર”ની કરી મુલાકાત
• શિક્ષકો, વાલીઓ, વિદ્યાર્થીઓ સાથે કર્યો ઈ-સંવાદ

પ્રધાનમંત્રી નરેન્દ્ર મોદી આજે તા.18 એપ્રિલથી ત્રણ દિવસ માટે ગુજરાતના પ્રવાસે આવ્યા છે. જેના ભાગરૂપે પ્રથમ દિવસે વડાપ્રધાન મોદી ગાંધીનગર સ્થિત શિક્ષણ ક્ષેત્રે વૈશ્વિક કક્ષાના રીયલ ટાઈમ ઓનલાઈન મોનિટરિંગ-વિદ્યા સમીક્ષા કેન્દ્રની આજે તા.18 એપ્રિલના રોજ પ્રથમવાર રૂબરૂ મુલાકાત કરી હતી. પ્રધાનમંત્રીની વિદ્યા સમીક્ષા કેન્દ્રની મુલાકાત દરમિયાન ગુજરાતના રાજ્યપાલ આચાર્ય દેવવ્રત, મુખ્યમંત્રી ભૂપેન્દ્ર પટેલ, શિક્ષણ મંત્રી જીતુ વાઘાણી સહિત મહાનુભાવો- શિક્ષણવિદો ખાસ ઉપસ્થિત રહ્યા હતા.

વડાપ્રધાન મોદી ગાંધીનગર સ્થિત વિદ્યા સમીક્ષા કેન્દ્ર ખાતે અત્યાધુનિક મોનિટરીંગ રૂમમાંથી ગુજરાતભરના વાલીઓ, વિદ્યાર્થીઓ, શિક્ષકો, મુખ્ય શિક્ષકો, બીઆરસી, સીઆરસી, તાલુકા પ્રાથમિક શિક્ષણ અધિકારી, જિલ્લા પ્રાથમિક શિક્ષણ અધિકારી સાથે સીધો ઈ-સંવાદ કરીને શિક્ષણ ક્ષેત્રે જરૂરી માર્ગદર્શન આપ્યું હતું.

શિક્ષકા સાથે પ્રધાનમંત્રીએ કર્યો ઈ-સંવાદ
બનાસકાંઠા જિલ્લાની શિક્ષિકા રાજશ્રી પટેલને પીએમ મોદીએ કહ્યું કે, આ નવી પેઢી માટે તો ટેક્નોલોજી સરળ છે, પરંતુ તમને લોકોને કેટલી તકલીફ પડે છે ? શિક્ષિકાએ કહ્યું કે, કોરોનાકાળમાં શાળા બંધ હતી પણ શિક્ષા બંધ ન હતી, ઓનલાઇન માધ્યમથી લાભ થયો અને મહત્તમ વિદ્યાર્થીઓએ ઓનલાઇન ક્લાસથી શિક્ષણ મેળવ્યું. ક્યૂકાર કોડવાળા પાઠ્યપુસ્તકથી શિક્ષણ મેળવ્યું. દિક્ષા પોર્ટલ ખુબ મદદરૂપ થઇ.

PM મોદીએ CRC કોર્ડિનેટર પાસે માંગ્યું સજેશન

પોષણ અંગે CRC કોર્ડિનેટરને પીએમ મોદીએ કહ્યું કે, મને સલાહ આપો કે તે શક્ય થશે કે નહીં. અમે લોકો પોષણ અભિયાન ચલાવી રહ્યા છીએ. આપણે એવો ચાર્ટ બનાવી દઇએ. જેમાં બાળકોને ટીક માર્ક કરે કે મેં આટલું ખાધું અને મને આટલી કેલેરી મળી. તો શું શિક્ષકો આના માટે તૈયાર છે ? આ અંગે કોર્ડિનેટરે સહમતિ દર્શાવી હતી.

વિદ્યાર્થીની સાથે પીએમ મોદી કર્યો સંવાદ
 7માં ધોરણની અશરુખા બહાન નામની વિદ્યાર્થીની સાથે પીએમ મોદીએ સંવાદ કર્યો છે. પીએમ મોદીએ રમતનું મહત્વ બતાવતા કહ્યું કે, રમત માટે સમય મળે છે કે ? વિદ્યાર્થીનીએ હા કહેતા પીએમએ કહ્યું કે મને નથી લાગતું કે તું રમતી હો કે ખાતી હો. તારો ક્લાસમાં કેટલામો નંબર આવે છે, વિદ્યાર્થીનીએ કહ્યું ફર્સ્ટ, તો પીએમએ કહ્યું એટલે તને ઉભી કરી દીધી.

દેશ અને રાજ્યોના શિક્ષણનો વિકાસ વધે તે માટે સરકાર હંમેશા કટિબદ્ધ રહે છે. ગુજરાતમાં પણ શિક્ષક, શિક્ષણ અને વિદ્યાર્થીઓનું સ્તર સર્વૌચ્ચ રહે તે માટે સરકાર પ્રયાસ કરે છે. વર્ષ 2019માં શિક્ષણ ક્ષેત્રે દેશનું સર્વપ્રથમ કમાન્ડ એન્ડ કંટ્રોલ સેન્ટર એટલે કે CCCનો શુભારંભ કરવામાં આવ્યો હતો તેનો હેતુ શિક્ષણમાં ટેકનોલોજી અને તેનું સ્તર વધુ ઉંચા લેવલે લઈ જવાનું હતું. રાજ્યના મહાનગરોથી લઇને દુર્ગમ પહાડી પરના આદિવાસી વિસ્તારની સ્કૂલ, વિદ્યાર્થી, શિક્ષકોનું સીધું મોનિટરિંગ રાજ્યના વિદ્યા સમીક્ષા કેન્દ્રમાં થશે.