વિદેશ પ્રવાસ / PM મોદી આજથી અમેરિકાની મુલાકાતે, છ મહિનામાં પ્રથમ વિદેશપ્રવાસ, જાણો કયા મહત્વના કામો કરશે

• પાંચ દિવસની અમેરિકાની મુલાકાતે PM મોદી 
• જો બાઈડન અને કમલા હેરિસને મળશે 
• ક્વાડ સંમેલનમાં અને યુએનની બેઠકમાં આપશે હાજરી 

વડાપ્રધાન નરેન્દ્ર મોદી આજે એટલે કે બુધવારે પાંચ દિવસની અમેરિકાની મુલાકાતે જવા રવાના થશે. આ દરમિયાન તેઓ સંયુક્ત રાષ્ટ્ર મહાસભાના 76 માં સત્રમાં હાજરી આપશે તેમજ અન્ય દેશોના નેતાઓ સાથે મુલાકાત કરશે. આ મહત્વની બેઠકમાં ભાગ લેવા માટે પીએમ મોદી ઉપરાંત 100 દેશોના વડાઓ પણ અમેરિકા આવી રહ્યા છે.

પીએમ મોદીના કાર્યક્રમો 

અમેરિકાના ટોચના ઉદ્યોગપતિઓ સાથે બેક-ટુ-બેક બેઠકો બાદ પીએમ મોદી 23 સપ્ટેમ્બરે અમેરિકાના ઉપરાષ્ટ્રપતિ કમલા હેરિસને પણ મળશે. પ્રધાનમંત્રી એ જ દિવસે ઓસ્ટ્રેલિયાના વડાપ્રધાન સ્કોટ મોરિસન અને તેમના જાપાની સમકક્ષ યોશીહિડે સુગાને પણ મળશે. પીએમ મોદી 22 મી સપ્ટેમ્બરે મોડી રાત્રે વોશિંગ્ટન ડીસી પહોંચશે અને આગલી સવારે તેઓ અમેરિકાના ટોચના સીઈઓને મળશે. એપલના ચીફ ટિમ કૂક સાથેની બેઠક પણ કરવાની ચર્ચા છે. 

પીએમ મોદી 24 સપ્ટેમ્બરે રાષ્ટ્રપતિ બિડેનને મળશે
પીએમ મોદી 24 સપ્ટેમ્બરે મોદી પ્રથમ ક્વાડ લીડર્સ સમિટમાં ભાગ લેશે યુએસ પ્રમુખ જો બિડેન સાથે પ્રથમ દ્વિપક્ષીય બેઠક કરશે અને વોશિંગ્ટનમાં પીએમ મોદીની મુલાકાત દરમિયાન ડિનરનું પણ આયોજન કરવામાં આવશે. યુકેના વડા પ્રધાન બોરિસ જ્હોનસનની મુલાકાત પણ પીએમ મોદીની વોશિંગ્ટન મુલાકાત સાથે સુસંગત છે અને બંનેની મુલાકાત થવાની સંભાવના છે. 24 સપ્ટેમ્બરની સાંજે પીએમ મોદી ન્યૂયોર્ક જવા રવાના થશે, જ્યાં તેઓ બીજા દિવસે સંયુક્ત રાષ્ટ્ર મહાસભામાં ભાષણ આપશે.

બિડેને કહ્યું આવું
પીએમ મોદીની આ મુલાકાત અંગે, યુએસ પ્રમુખ બિડેને કહ્યું કે, શુક્રવારે પીએમ મોદી સાથે આ પ્રથમ વ્યક્તિગત મુલાકાત હશે. ભારત સાથેની આપણી વૈશ્વિક ભાગીદારીના દ્રષ્ટિકોણથી મુક્ત અને ઇન્ડો-પેસિફિક સંબંધને જાળવી રાખવા માટે સાથે મળીને કામ કરીને સ્ટ્રેન્થથી વધારે સ્ટ્રેન્થ તરફ જવાની આ તક હશે.

બિડેન વહીવટીતંત્ર દ્વારા જારી કરાયેલા નિવેદનમાં તેમણે કહ્યું કે પીએમ મોદી અને જો બિડેન સાથેની દ્વિપક્ષીય વાતચીત આતંકવાદના ખતરા અને અફઘાનિસ્તાનની પરિસ્થિતિ વિશે વાત કરવાની તક પૂરી પાડશે, આતંકવાદ જેવા દુશ્મન સામે લડવા માટે આપણે સાથે મળીને કેવી રીતે કામ કરી શકીએ. તેમણે વધુમાં કહ્યું કે, અમેરિકા અને ભારત વચ્ચેના સંબંધો માત્ર સરકારના જ સંબંધો નથી પરંતુ આ બે વ્યક્તિના પણ સંબંધો છે.  

આજે અંદાજે છ મહિના પછી પ્રધાનમંત્રી વિદેશપ્રવાસે જઈ રહ્યા છે. લોકડાઉન બાદ આ બીજો વિદેશપ્રવાસ છે અને બાયડનના આવ્યા પછી પ્રથમ અમેરિકા મુલાકાત છે. આ રાજદ્વારી સંબંધો માટે ખૂબ અગત્યની મિટિંગ રહેશે અને મુલાકાતમાં કેટલાક મહત્વના મુદ્દાઓ પર ચર્ચા કરવામાં આવશે. 

મોદી, બિડેનની દ્વિપક્ષીય બેઠક ભારત-અમેરિકા સંબંધોને મજબૂત કરશે

વ્હાઈટ હાઉસે કહ્યું હતું કે 24 સપ્ટેમ્બરના રોજ ભારતના વડાપ્રધાન નરેન્દ્ર મોદી અને રાષ્ટ્રપતિ જો બિડેન વચ્ચેની પ્રથમ દ્વિપક્ષીય બેઠક બંને દેશો વચ્ચેના સંબંધોને વધુ મજબૂત બનાવશે અને ક્વાડ ગ્રુપને નવી ગતિ આપવામાં મદદ કરશે.

વ્હાઈટ હાઉસના એક અધિકારીએ જણાવ્યું હતું કે, "બેઠક દરમિયાન, બંને નેતાઓ તેમના લોકો વચ્ચેના ઊંડા સંબંધો અને સહિયારા લોકશાહી મૂલ્યોને મજબૂત કરવા પર ધ્યાન કેન્દ્રિત કરશે જેણે સાત દાયકાથી વધુ સમયથી અમેરિકા અને ભારત વચ્ચેના ખાસ બંધનને મજબૂત બનાવ્યું છે." સાથે તેની ભાગીદારી પણ વધી છે. 

કેટલીક નવી જાહેરાતો પણ થઈ શકે છે

પીએમ મોદીની મુલાકાત અંગે અમેરિકાના ઓબ્ઝર્વર રિસર્ચ ફાઉન્ડેશનના એક્ઝિક્યુટિવ ડિરેક્ટર ધ્રુવ જયશંકરે ન્યૂઝ એજન્સી સાથેની વાતચીત દરમિયાન જણાવ્યું હતું કે પીએમ મોદી મહામારી પછી બીજી વિદેશ યાત્રા કરશે. ચૂંટણી બાદ અમેરિકી રાષ્ટ્રપતિ જો બિડેન સાથે તેમની આ પ્રથમ મુલાકાત હશે. ચારેય નેતાઓ ક્વાડ સમિટ માટે સમય કાઢી રહ્યા છે જે વધતા ગઠબંધનના મહત્વને દર્શાવે છે.

ધ્રુવ જયશંકરે કહ્યું કે આ સમય દરમિયાન આપણને કેટલીક નવી જાહેરાત જોવા મળી શકે છે. બેઠકમાં ક્લાઇમેટ ચેન્જ અને દ્વિપક્ષીય બેઠકો પર ચર્ચા થશે. તે યુએસ પ્રમુખ જો બિડેન માટે ડોમેસ્ટિક લેવલે પ્રાથમિકતા પણ રહી છે.

ધ્રુવે કહ્યું હતું કે ક્વાડ કોન્ફરન્સમાં જોડાતા પહેલા, ચાર નેતાઓએ ત્રણ કાર્યકારી સમુહ બનાવવાનું નક્કી કર્યું હતું - 
1) એક ઇમપોર્ટન્ટ અને ઉભરતી ટેકનોલોજી પર
2) એક રસી અને વૈશ્વિક જાહેર આરોગ્ય પર
3) અને એક આબોહવા પરિવર્તન પર.