તૈયારી / PM મોદી ફરી 18મી જૂને આવશે ગુજરાત! પાવાગઢમાં મહાકાળી માતાના કરશે દર્શન, જાણો સમગ્ર કાર્યક્રમ

• યાત્રાધામ પાવાગઢમાં PMના આગમનને લઇને તૈયારીઓ
• PMના હસ્તે 18 જૂનના રોજ ધ્વજારોહણ થશે
• PMના આગમનને લઇને પાવાગઢ મંદિર ટ્રસ્ટ દ્વારા ખાસ તૈયારીઓ કરાઇ

વડાપ્રધાન નરેન્દ્ર મોદી આગામી 18 જુનના રોજ પાવાગઢ મહાકાળી માતાજીના દર્શનાર્થે આવવાના છે. આ તરફ વડાપ્રધાન આવવાના હોઇ પાવાગઢ મંદિર ટ્રસ્ટ  અને જિલ્લા વહીવટી તંત્ર દ્વારા તૈયારીઓને આખરી ઓપ આપી દેવામાં આવ્યો છે. નોંધનીય છે કે, હાલમાં મંદિર નવીનીકરણનું કાર્ય પણ આખરી તબક્કામાં છે. મંદિરના કળશ, ધ્વજા દંડ અને ગર્ભ ગૃહને સુવર્ણ જડિત કરવામાં આવ્યા છે. 

પાવાગઢ ખાતે ઐતિહાસિક ક્ષણ સર્જાશે 

પાવાગઢ ખાતે 18 મી જૂનના રોજ પીએમ મોદીના હસ્તે જે ધ્વજારોહણ થવા નું તેને ખૂબ જ ઐતિહાસિક માનવા માં આવી રહ્યું છે. કારણ કે, અગાઉ જે જૂનું ઐતિહાસિક મંદિર હતું તેનું શિખર ખંડિત હતું જેને લઈ તેની પર હજારો વર્ષો થી ધ્વજારોહણ કરી શકાતું નહોતું. પરંતુ હવે જ્યારે આખે આખા મંદિરનું નવીનીકરણ થઈ જતા હવે સ્વર્ણ જડિત ધ્વજદંડ પર વડાપ્રધાન મોદીના હસ્તે ધ્વજાજી બિરાજમાન થશે. હજારો વર્ષો બાદ પાવાગઢ નિજ મંદિર પર ધ્વજારોહણ થવાનું હોય આ ક્ષણ ને ખૂબ જ ઐતિહાસિક માનવામાં આવી રહ્યું છે.

વડાપ્રધાન પોતે શક્તિ ઉપાસક હોઈ દર્શન કરવાની ઈચ્છા હતી 

વડાપ્રધાન નરેન્દ્રમોદી પોતે શક્તિ ઉપાશક હોઈ માં મહાકાળી માં અતૂટ શ્રદ્ધા ધરાવે છે. હમણાં થોડા દિવસ પહેલા તેમણે જાતે જ જાહેરાત કરી કે, પાવાગઢ ખાતે દર્શન કરવા ની તેમની ઈચ્છા છે . જોકે તેમની તે ઈચ્છા હવે પૂર્ણ થવા જઈ રહી છે. વડાપ્રધાનના આગમનને લઈ મંદિર ટ્રસ્ટ, સ્થાનિક પ્રજાજનો સહિત સમગ્ર ગુજરાત ઉત્સાહિત છે.  પીએમના આગમન અને નિજ મંદિર દર્શન માટે ખાસ વ્યવસ્થાઓ કરવામાં આવી રહી છે.

વડાપ્રધાન માટે ખાસ લિફ્ટ બનાવાઇ 

સ્થાનિક સૂત્રોથી મળતી વિગત મુજબ વડાપ્રધાનના આગમનને લઈ અને સુરક્ષાના કારણોસર પીએમ માટે ખાસ લિફ્ટ બનાવવા આવી રહી છે. જેના દ્વારા પીએમને નિજ મંદીર સુધી લઈ જવામાં આવશે. પીએમ માટે ખાસ સુરક્ષા બંદોબસ્તની પણ તૈયારીઓ કરવામાં આવી રહી છે.

ડ્રોન વિડિઓમાં અદ્ભૂત નજારો જોવા મળ્યો 

પાવાગઢ મહાકાળી મંદિરમાં આગામી 18 જૂન વડાપ્રધાનના આગમનને લઈ તૈયારીઓ પૂર્ણ થઈ ચૂકી છે. પાવાગઢ નિજ મંદિર સહિત ગર્ભ ગૃહના ડ્રોન વિડિઓનો અદ્ભૂત નજારો પણ પ્રથમ વખત વિટીવીની ટીવી સ્ક્રિન પર જોવા મળ્યો છે. ડ્રોનની મદદથી લેવામાં આવેલ વિડિઓમાં નિજ મંદિરનો જે નજારો કેદ થયો છે તે ખૂબ જ મનમોહક અને આહલાદક છે.