ભારતમાં કોરોના વાયરસથી સંક્રમિત લોકોની સંખ્યા 91 લાખને પાર પહોંચી છે. આ દરમિયાન, દિલ્હી, મહારાષ્ટ્ર અને ગુજરાતમાં દરરોજ નોંધાતા કોરોનાના કેસમાં મોટો ઉછોળો જોવા મળી રહ્યો છે. આ સાથે જ મોતનો આંકડો પણ વધ્યો છે. ત્યારે આજરોજ સુપ્રીમ કોર્ટે દેશના 4 રાજ્યોની ઝાટકણી કાઢતા કોરોનાની સ્થિતિ અંગેનો રિપોર્ટ શુક્રવાર સુધીમાં રજૂ કરવાના આદેશ આપ્યો છે. ત્યારે હવે પ્રધાનમંત્રી મોદી પણ એલર્ટ થયાં છે અને આવતીકાલે રાજ્યોના મુખ્યમંત્રીઓ સાથે બેઠક યોજવાના છે.
દેશના વિવિધ રાજ્યોમાં કોરોના સંકટ બન્યું ઘેરું
પ્રધાનમંત્રી મોદી થયાં એલર્ટ
આવતીકાલે દેશના રાજ્યોના મુખ્યમંત્રીઓ સાથે કરશે બેઠક
ઉલ્લેખનીય છે કે, પ્રધાનમંત્રી નરેન્દ્ર મોદી આવતીકાલે એટલે કે મંગળવારે દેશમાં કોરોનાની સ્થિતિને લઈને તમામ રાજ્યોના મુખ્યમંત્રીઓ સાથે બેઠક કરશે. કહેવામાં આવી રહ્યું છે કે આ બેઠક ડિજિટલ માધ્યમથી બે તબક્કામાં યોજાશે.
2 તબક્કામાં યોજાશે બેઠક
પ્રથમ તબક્કામાં સવારે 10 વાગે આઠ રાજ્યોના મુખ્યમંત્રીનો સમાવેશ થશે જ્યાં કોરોનાના સૌથી વધુ કહેર જોવા મળી રહ્યો છે. ત્યારબાદ બાકીના રાજ્યોના મુખ્યમંત્રીઓ સાથે બપોરે 12 વાગ્યાથી વડા પ્રધાન બેઠક યોજવાના છે.
સુપ્રીમ કોર્ટે 3 રાજ્યોની ઝાટકણી કાઢી
સોમવારે સુપ્રીમ કોર્ટે ગુજરાત સહિત મહારાષ્ટ્ર, દિલ્હી અને આસામ એમ ચાર રાજ્યો પાસેથી કોરોનાની કામગીરી અંગે રિપોર્ટ માંગ્યો છે. જસ્ટિસ અશોક ભૂષણના વડપણ હેઠળની બેન્ચે કહ્યું હતું કે આ રાજ્યોમાં સંક્રમણની સ્થિતિ બેકાબૂ બની રહી છે ત્યારે આ રાજ્યો 2 દિવસમાં રિપોર્ટ સબમીટ કરે. બેન્ચે એમ પણ કહ્યું હતું કે દિલ્હી અને મહારાષ્ટ્ર બાદ ગુજરાતમાં સ્થિતિ ખરાબ થઈ રહી છે.
છેલ્લાં 5 દિવસમાં ગુજરાતમાં રોજના 1400થી વધુ કેસ
મહત્વનું છે કે ગુજરાતમાં કોરોનાની વણસી રહેલી પરિસ્થિતિને પગલે રાજ્ય સરકારે અમદાવાદમાં 2 દિવસનું કર્ફ્યુ લગાવ્યા બાદ ચાર મહાનગરોમાં અચોક્કસ મુદ્દતનો રાત્રિ કર્ફ્યૂ પણ લાગુ કરી દીધો છે. રાજ્યમાં કોરોનાના આંકડાની વાત કરીએ તો છેલ્લાં 5 દિવસમાં 1400થી વધુ રોજના કેસ આવી રહ્યાં છે.
દેશમાં જાન્યુઆરીના અંત સુધીમાં આવી શકે રસી
દેશમાં કોરોનાની રસીનો પહેલો જથ્થો જાન્યુઆરીના અંત સુધી અથવા ફેબ્રુઆરીની શરુઆત સુધીમાં આવી શકે છે. આ રસીને પહેલા ફ્રન્ટલાઈન વર્કસ જેમ કે ડૉક્ટર, નગરપાલિકાના કાર્યકર્તાઓને આપવામાં આવશે. કેન્દ્ર સરકાર સીરમ ઈન્સ્ટીટ્યૂટને ઓક્સફોર્ડ એસ્ટ્રાજેનેકા રસીના ઈમરજન્સી ઉપયોગને મંજૂરી આપી દીધી છે.