અમદાવાદમાં મેટ્રો ટ્રેનનો આજે ટ્રાયલ રન તાજેતરમાં યોજાયો હતો. આ ટ્રાયલ રન 900 મીટરનાં રૂટ પર કરવામાં આવ્યો છે. એન્જિન સાથે 3 કોચ જોડીને આ ટ્રાયલ રન કરાયો હતો. આ ટ્રાયલ રનમાં કોઇ જ સમસ્યા ન હોવાનો તંત્રએ દાવો પણ કર્યો.
મહત્વનું છે કે હાલમાં જે કામગીરી ચાલી રહી છે એ શિડ્યુલ પ્રમાણે આખરે મેટ્રો ટ્રેનનો ટ્રાયલ રન તો થઇ ગયો. ત્યાર બાદ બની શકે છે આ 3 કોચને અલગ-અલગ પરીક્ષણ માટે બેથી ત્રણ મહિના સુધી રાખવામાં આવે. અલગ-અલગ એજન્સીઓ મેટ્રો ટ્રાયલ રનનું સંચાલન કરે તેવું બની શકે. ત્યારે આજરોજ VTV દ્વારા મેટ્રો સ્ટેશનની ખાસ મુલાકાત લેવામાં આવી હતી.
વડાપ્રધાન મેટ્રોને આપશે લીલીઝંડી
આપને જણાવી દઇએ કે આગામી 4 માર્ચે મેટ્રો ટ્રેનનું લોકાર્પણ દેશના વડાપ્રધાન નરેન્દ્ર મોદી કરવાના છે. જે સ્થળે આ કાર્યક્રમ યોજાવાનો છે તે સ્થળે તમામ પ્રકારની તૈયારીઓને આખરી ઓપ આપવામાં આવ્યો છે. સાથે જ સ્ટેશન પર CCTV કેમેરા લગાવવામાં આવ્યા છે.
PM મોદીનો ડ્રીમ પ્રોજેક્ટ
દેશના વડાપ્રધાન અને ગુજરાતના તત્કાલિન મુખ્યપ્રધાન નરેન્દ્ર મોદીનો મેટ્રો પ્રોજેક્ટ ડ્રીમ પ્રોજેક્ટ છે. જેની ઘણા વર્ષ અગાઉથી તૈયારીઓ હાથ ધરવામાં આવી હતી.
છ કિલોમીટરનો રૂટઃ
ઉલ્લેખનીય છે કે સૂત્રોએ જણાવ્યું હતું કે એપરલ ડેપોમાં 10થી વધુ ટ્રેક તૈયાર કરી દેવામાં આવ્યાં છે. જ્યાં 16 ટ્રેન રાખવામાં આવશે. ટ્રાયલ રનનાં આ પ્રારંભ બાદ પ્રથમ તબક્કામાં વસ્ત્રાલથી એપરલ પાર્ક સુધીનાં 6 સ્ટેશનોને આવરી લેવામાં આવશે.
એમાં વસ્ત્રાલ ગામ નિરાંત ક્રૉસ રોડ વસ્ત્રાલ રબારી કૉલોની અમરાઈવાડી અને એપરલ પાર્કનો સમાવેશ છે. આમ હવે અમદાવાદીઓ જે છેલ્લાં કેટલાંય સમયથી મેટ્રોની રાહ જોઈ રહ્યાં છે તેમનું મેટ્રોમાં મુસાફરી કરવાનું સપનું હવે સાકાર થશે.
10 700 કરોડનો પ્રોજેક્ટઃ
અમદાવાદ મેટ્રો રેલ્વે પ્રોજેક્ટની કિંમત 10 700 કરોડ રૂપિયા જેટલી છે. જેમાંથી જાપાન ઇન્ટરનેશનલ કોર્પોરેશન એજન્સી (JICA) દ્વારા 6 હજાર કરોડ રૂપિયાની લોન અપાઇ છે. ઇસ્ટ-વેસ્ટ તેમજ નોર્થ-સાઉથ એમ 2 કોરિડોરમાં કુલ 32 સ્ટેશનો હશે. ઇસ્ટ-વેસ્ટ કોરિડોરનાં પશ્ચિમ છેડા પરનો 2 કિ.મી લાંબો વાયાડક પણ તૈયાર થઇ ગયેલ છે. જ્યારે અન્ય પણ કામ ચાલુ છે.