પીએમ મોદીએ આવતીકાલે સાંજે સચિવો સાથે મોટી બેઠક બોલાવી છે જેમા કામોને લઈને સમીક્ષા કરવામાં આવશે.
પીએમ મોદીએ બોલાવી મોટી બેઠક
આવતીકાલે સાંજે સચિવો સાથે બેઠક
જુલાઇમાં કેબિનેટ વિસ્તરણ બાદ કાલે ફરી મોટી બેઠક
પીએમ મોદી એક્શનમાં
દેશમાં કોરોના વાયરસને લઈને કેસ રોકાવાનું નામ નથી લઈ રહ્યા અને બીજી તરફ મહામારીથી બચવા માટે મોટા પાયે વેકસીનેશન કાર્યક્રમ કરવામાં આવી રહ્યો છે. આ સિવાય બીજી તરફ સત્તારૂઢ પાર્ટી ભાજપમાં છેલ્લા છ મહિનાથી મોટી ઉથલપાથલ મચેલી છે અને એક બાદ એક મુખ્યમંત્રીઓના રાજીનામાં લેવામાં આવી રહ્યા છે. એવામાં PM મોદી સતત એક્શનમાં દેખાઈ રહ્યા છે. PM મોદીએ આવતી કાલે સાંજે સચિવોની બેઠક બોલાવી છે જેમા કામોની સમીક્ષા કરવામાં આવશે.
સચિવોની બોલાવી બેઠક
આવતીકાલે સાંજે સાડા ચાર વાગ્યે દિલ્હીમાં પીએમ મોદીએ તમામ સચિવોની બેઠક બોલાવી છે. આ બેઠકમાં વર્તમાન કામો પર સમીક્ષા કરવામાં આવશે તથા આગામી કોઈ મોટો નિર્ણય લેવાય તેવી સંભાવનાઓ છે. પીએમ મોદી કામ પર રિપોર્ટ પણ માંગી શકે છે જેને લઈને સચિવોમાં ખળભળાટ મચ્યો છે અને દિલ્હીનાં જુદા જુદા મંત્રાલયોમાં ધમધમાટ જોવા મળી રહ્યો છે.
સપ્ટેમ્બર મહિનો ખૂબ ખાસ
નોંધનીય છે કે સપ્ટેમ્બર મહિનો પીએમ મોદી અને કેન્દ્ર સરકાર માટે ખૂબ જ મહત્વપૂર્ણ છે, આ મહિનામાં વેક્સિનેશનનો એક મોટો પડાવ પાર કરવાનો છે અને એક બાદ એક વેક્સિનેશન રેકોર્ડ બની રહ્યો છે ત્યાં બીજી તરફ વિદેશનીતિ માટે પણ આ મહિનો ખૂબ જ મહત્વપૂર્ણ છે. આજે SCO સમિટમાં પીએમ મોદીએ સંબોધન કર્યું છે અને મહિનાનાં અંત સુધીમાં પીએમ મોદી અમેરિકાનાં પ્રવાસ પર જવાના છે, આ સિવાય યુનાઈટેડ નેશન્સમાં પણ ભાષણ આપવાનો કાર્યક્રમ છે. બીજી તરફ હાલમાં જ ગુજરાતમાં મુખ્યમંત્રી સહિત આખી સરકાર બદલી નાંખવાનું મોટું મિશન પાર પાડવામાં આવ્યું છે.