અમદાવાદ / ઓસ્ટ્રેલિયાના વડાપ્રધાન આજે ગુજરાતમાં હોળી ખેલશે, PM મોદી પણ આજથી 2 દિવસ માદરે વતન

• આજથી PM મોદી પણ 2 દિવસ ગુજરાતની મુલાકાતે
• ઓસ્ટ્રેલિયાના વડાપ્રધાન આજે ગુજરાતમાં હોળી ખેલશે
• INDvsAUS મેચને લઇ અમદાવાદીઓમાં અનેરો ઉત્સાહ

9મી માર્ચે અમદાવાદના નરેન્દ્ર મોદી સ્ટેડિયમ ખાતે ભારત-ઓસ્ટ્રેલિયા વચ્ચે ટેસ્ટ મેચને લઈને અમદાવાદ શહેરના લોકોમાં ઉત્સાહ જોવા મળી રહ્યો છે. મેચને લઈને સ્ટેડિયમ બહાર બંને દેશના ટીશર્ટનું વેચાણ પણ થઈ રહ્યું છે. આ સાથે વિરાટ કોહલી, રોહિત શર્મા અને હાર્દિક પંડ્યાના ટીશર્ટનું પણ વેચાણ વધારે થઈ રહ્યું છે.

અમદાવાદ પોલીસે ખાસ બંદોબસ્તની તૈયારી કરી લીધી
તો બીજી તરફ PM મોદી અને ઓસ્ટ્રેલિયાના વડાપ્રધાન 9 માર્ચે મોદી સ્ટેડિયમમાં મેચ નિહાળશે. જેને લઇને અમદાવાદ પોલીસે ખાસ બંદોબસ્તની તૈયારી કરી લીધી છે. PM મોદી આજથી 2 દિવસ સુધી ગુજરાતની મુલાકાતે છે. આજે રાતે 9 વાગ્યે PM મોદી અમદાવાદ આવશે. PM મોદી રાજભવનમાં રાત્રીરોકાણ કરશે. ત્યાર બાદ આવતીકાલે સવારે 8 વાગ્યે રાજભવનથી જવા રવાના થશે. આવતીકાલે સવારે 8:30એ PM મોદી નમો સ્ટેડિયમ પહોંચશે. જ્યાં PM મોદી બોર્ડ ગાવસ્કર ટેસ્ટ મેચની શરૂઆત કરાવશે. અહીં તેઓ ઓસ્ટ્રેલિયાના PM સાથે ટેસ્ટ મેચ નિહાળશે. સવારે 10 વાગ્યે નમો સ્ટેડિયમથી મોદી રાજભવન જવા રવાના થશે. રાજભવન ખાતે ગુરૂવારે સવારે 10.30થી 2.30 વાગ્યાનો સમય રિઝર્વ રહેશે. ત્યાર બાદ આવતીકાલે સાંજના 5 વાગ્યે PM મોદી દિલ્હી જવા રવાના થશે.

ઓસ્ટ્રેલિયાના PM રાજભવનમાં ધૂળેટી રમશે
તમને જણાવી દઇએ કે, ઓસ્ટ્રેલિયાના PM એન્થોની એલ્બેનીઝ પણ આજે અમદાવાદની મુલાકાતે આવશે. આજે સાંજે 4 વાગ્યે તેઓ અમદાવાદ પહોંચશે. ઓસ્ટ્રેલિયાના PM સાબરમતી આશ્રમની મુલાકાત લેશે. તેઓ સાબરમતી આશ્રમની મુલાકાત બાદ રાજભવનમાં ધૂળેટી રમશે. ત્યાર બાદ આવતીકાલે PM મોદી સાથે નરેન્દ્ર મોદી ક્રિકેટ સ્ટેડિયમમાં મેચ નિહાળશે.