વિશ્વભરમાં કોરોના વાયરસ સામે જંગ ચાલી રહી છે ત્યારે ભારતના પ્રધાનમંત્રી નરેન્દ્ર મોદીએ અમેરિકન રાષ્ટ્રપતિ ડોનાલ્ડ ટ્રમ્પ સાથે કોરોના વાયરસ મુદ્દે ટેલિફોનિક વાતચીત કરી હતી. આ અંગે તેમણે પોતાના સત્તાવાર ટ્વીટર એકાઉન્ટ પર જાણકારી આપતા જણાવ્યું કે, અમેરિકાના રાષ્ટ્રપતિ ડોનાલ્ડ ટ્રમ્પ સાથે કોરોના મુદ્દે સકારાત્મક ચર્ચા થઇ.
કોરોનાનો સમગ્ર વિશ્વમાં કહેર યથાવત
પ્રધાનમંત્રી મોદી અને ડોનાલ્ડ ટ્રમ્પે ટેલિફોનિક વાતચીત કરી
પીએમ મોદીએ લખ્યું હતું કે, યુએસ પ્રમુખ ડોનાલ્ડ ટ્રમ્પ સાથે વિસ્તૃત ટેલિફોન વાતચીત થઈ છે. અમે કોરોના મહામારીને લઇને સારી ચર્ચા કરી હતી અને કોવિડ -19 સામે લડવા માટે ભારત-અમેરિકાની ભાગીદારીની સંપૂર્ણ તાકાતનો ઉપયોગ કરવા સંમત થયા હતા.
અમેરિકામાં કોરોનાએ વિનાશ સર્જ્યો
આપને જણાવી દઇએ કે, અમેરિકામાં કોરોના વાયરસે વિનાશ સર્જ્યો છે. ટેલિગ્રાફમાં પ્રસિદ્ધ થયેલ અહેવાલ મુજબ જોન હોપકિન્સ યુનિવર્સીટીએ આંકડા જાહેર કર્યા છે કે અમેરિકામાં અત્યાર સુધીમાં સૌથી વધારે 1480 લોકોના મોત થયાં છે. આ આંકડા ગુરૂવારે સાંજથી લઇને શુક્રવારની સાંજ(ભારતીય સમય મુજબ) સુધીના છે.
Had an extensive telephone conversation with President @realDonaldTrump. We had a good discussion, and agreed to deploy the full strength of the India-US partnership to fight COVID-19.
નોંધનીય છે કે, ચીનના વુહાન શહેરથી ફેલાયેલા આ વાયરસને કારણે ચીનમાં લગભગ 3200 લોકોના મોત થયાં છે. સ્પેનમાં આશરે 11000 લોકોના મોત થયાં તો જર્મનીમાં 1275, ફ્રાન્સમાં 6520, ઇરાનમાં 3294, બ્રિટનમાં 3606 તથા સાઉથ કોરિયામાં 174 લોકોના મોત થયાં છે. ભારતની વાત કરીએ તો સરકારી આંકડા અનુસાર ભારતમાં 2902 લોકો કોરોના પોઝિટિવ છે તો 68 લોકોના કોરોના વાયરસને કારણે મોત થયાં છે.
આપણે સાથે મળીને કોરોના સામેની જંગ લડવાની છે : કેન્દ્રીય આરોગ્ય સચિવ લવ અગ્રવાલ
કેન્દ્રના આરોગ્ય વિભાગે આજે ફરી એકવાર કોરના મામલે પત્રકાર પરિષદને સંબોધન કર્યું હતું. જેમાં આરોગ્ય મંત્રાલયના સચિવ લવ અગ્રવાલે જણાવ્યું હતું કે, કોરોના વિરૂદ્ધની જંગ આપણે સાથે મળીને લડવાની છે. આ સાથે જ તેમણે વધુમાં જણાવ્યું કે, મોં ઢાંકવાને લઇને પણ કેટલીક એડવાઇઝરી જાહેર કરવામાં આવી છે. તો ટેસ્ટિંગ વધારવાને લઇને પણ મથામણ ચાલુ છે. મંત્રાલયના જણાવ્યા અનુસાર, દેશમાં કોરોના પીડિતોની સંખ્યા હાલ 2992 છે તથા અત્યાર સુધીમાં 68 લોકોના મોત થયા છે. તો 183 લોકો કોરોના મુક્ત થયા છે. નોંધનીય છે કે, આ આંકડા આજે સવારે 9 વાગ્યા સુધીના છે.