PM મોદીના ડ્રીમ પ્રોજેક્ટ બુલેટ ટ્રેન પર લાગી બ્રેક જાપાને ફંડિંગ રોક્યું

નવી દિલ્હીઃ પ્રધાનમંત્રી નરેન્દ્ર મોદીના ડ્રીમ પ્રોજેક્ટ બુલેટ ટ્રેનને મોટો ઝટકો લાગ્યો છે. આ પ્રોજેક્ટને ફંડિંગ કરતી જાપાની કંપની જાપાન ઈન્ટરનેશનલ કોઓપરેશન એજન્સી એટલે કે જીકાએ બુલેટ ટ્રેન નેટવર્ક માટે ફંડિંગ પર રોક લગાવી છે.

જાપાની કંપનીએ ફંડિંગ તો રોક્યુ પણ સાથો સાથ મોદી સરકારને સલાહ પણ આપતા કહ્યું કે આ પ્રોજેક્ટને આગળ વધારતા પહેલાં તેઓ પોતાના દેશમાં ખેડૂતોની સમસ્યા પર ધ્યાન આપે. 

એક લાખ કરોડ રૂપિયાના ખર્ચે ચાલી રહેલા આ પ્રોજેક્ટના નિર્માણમાં ગુજરાત અને મહારાષ્ટ્રના ખેડૂતોએ જમીન સંપાદનને લઈને વિરોધ પણ કર્યો હતો.

જેથી આ વિવાદને જોતા કેન્દ્ર સરકારે ખાસ કમિટીની સ્થાપના કરી. આ પ્રોજેક્ટ 2022 સુધીમાં પૂરો કરવાનો મોદી સરકારનો લક્ષ્ય છે. પરંતુ હવે ફંડિંગ રોકાતા આ પ્રોજેક્ટ પર અનેક સવાલો ઉભા થયા છે.

જીકા જાપાન સરકારની એજન્સી છે અને તેઓ જાપાન સરકાર માટે આંતરરાષ્ટ્રીય સ્તરે સામાજિક-આર્થિક નીતિઓનું નિર્ધારણ કરે છે. ત્યારે નેશનલ હાઇ-સ્પીડ રેલ કોર્પોરેશન લિમિટેડે ભારતમાં બુલેટ ટ્રેન પ્રોજેક્ટની જવાબદારી મળી છે.

જો કે ભારત સરકારની આ એજન્સીએ બુલેટ ટ્રેન પ્રોજેક્ટ માટે ગુજરાત અને મહારાષ્ટ્રમાં ખેડૂતો પાસેથી જમીન સંપાદન કરવામાં તકલીફોનો સામનો કરવો પડી રહ્યો છે.