Video / PM મોદીનો વીડિયો યુટ્યુબ પર બરાબરનો ટ્રોલ થયો, છ લાખ નજીક Dislikeનો આંકડો

• પીએમ મોદીના વીડિયોને યુટ્યુબમાં ડીસ્લાઈક કરી રહ્યા છે લોકો 
• 83 હજાર લાઈક સામે સાડા પાંચ લાખ કરતા વધારે ડીસ્લાઈક થયા 
• રમકડા માટે વોકલ ફોર લોકલ થવા માટે પીએમ મોદીએ કરી અપીલ 

ગત રવિવારે વડાપ્રધાન નરેન્દ્ર મોદીએ મન કી બાત કાર્યક્રમમાં દેશનાં નાગરિકોને સ્માંબોધિત કર્યું હતું જેનો વીડિયો ભારતીય જનતા પાર્ટીનાં યૂટ્યુબ ચેનલમાં પ્રકાશિત કરવામાં આવ્યો છે. અત્યાર સુધી 21 લાખ વાર આ વીડિયો જોવામાં આવ્યો છે પરંતુ ચોંકવાનારી બાબત એ છે કે વીડિયોને મોટા ભાગના લોકો નાપસંદ કરી રહ્યા છે. 

વીડિયો ખૂબ તેજીથી વાયરલ થઇ રહ્યો છે અને યુઝર્સ વીડિયોને ધનાધન ડીસ્લાઈક આપી રહ્યા છે. સોમવાર બપોર સુધી વીડિયોમાં 83 હજાર લાઈક હતી સામે સાડા પાંચ લાખ કરતા વધારે લોકોએ ડીસ્લાઈક કર્યું છે. આટલું જ નહીં લોકો તેમાં કમેન્ટ કરીને પણ ભડાશ કાઢી રહ્યા છે. અત્યાર સુધી એક લાખ જેટલી તો કમેન્ટ થઇ ગઈ છે. 

સોશ્યલ મીડિયામાં યુઝર્સ NEET-JEE પરીક્ષા મુદ્દે સવાલ ઉઠાવી રહ્યા છે તેમ જ આ વીડિયોના કમેન્ટ બોક્સમાં પણ લોકો કોરોનાકાળમાં પરીક્ષા લેવા મુદ્દે સવાલ ઉઠાવી રહ્યા છે. નોંધનીય છે કે આ જ મુદ્દે કોંગ્રેસ નેતા રાહુલ ગાંધીએ પણ પીએમ મોદીને ટોણો મારતા કહ્યું હતું કે લોકોની માંગ હતી કે પરીક્ષા પર ચર્ચા થાય પરંતુ પીએમ મોદી રમકડાં પર ચર્ચા કરીને જતા રહ્યા. 

શું કહ્યું હતું PM મોદીએ ? 

દેશમાં આત્મનિર્ભર ભારતની શરૂઆત કરવામાં આવી છે અને લોકોને અપીલ કરવામાં આવી રહી છે કે લોકલ વસ્તુઓને પ્રોત્સાહન આપો ત્યારે આજે નાના બાળકોના રમકડા તરફ પીએમ મોદીએ દેશનું ધ્યાન દોર્યું અને તેના માટે ખાસ અપીલ પણ કરી. પીએમ મોદીએ કહ્યું કે હું મન કી બાત સાંભળી રહેલા બાળકોના માતા-પિતાથી માફી માંગુ છું કારણ કે હોઈ શકે કે હવે તે મન કી બાત સાંભળ્યા બાદ રમકડાની નવી નવી માંગણીઓ શરુ કરી દેશે અને માતાપિતા માટે એક નવું કામ સામે આવી જશે. PM મોદીએ કહ્યું કે રમકડા જ્યાં એક્ટિવિટીને વધારે છે ત્યાં આપણી આકાંક્ષાઓને નવી ઉડાન પણ આપે છે. 

લોકલ રમકડા માટે વોકલ થઇ જવાનો સમય : PM મોદી ​

રમકડાને લઈને દેશવાસીઓથી ખાસ અપીલ કરતાં પીએમ મોદીએ કહ્યું 'હવે બધા માટે લોકલ રમકડા માટે વોકલ થઇ જવાનો સમય છે. આવો આપણે કંઇક નવા પ્રકરાના સારી ગુણવત્તાનાં રમકડાં બનાવીએ. આપણે એવા રમકડાં બનાવીએ પર્યાવરણને પણ અનૂકૂળ હોય. આપણા દેશમાં કેટલા બધા આઈડિયા છે અને કેટલા બધા કોન્સેપ્ટ છે, સમૃદ્ધ ઈતિહાસ પણ છે. શું આપણે તેના પર ગેમ્સ બનાવી શકીએ છે ?.હું દેશના યુવાન ટેલેન્ટ થઇ કહું છું તમે ભારત માટે ગેમ્સ બનાવો અને ભારતમાં જ ગેમ્સ બનાવો. કહેવામાં પણ આવે છે કે : Let the games begin!તો ચાલો ખેલ શરુ કરીએ.'