મુલાકાત / કેવડિયામાં આકર્ષણ વધ્યું! વધુ ત્રણ ટૂરિસ્ટ સ્પોટ ખુલ્લા મૂકાશે, બે દિવસના પ્રવાસે આવી રહ્યા છે PM મોદી

• 30 અને 31 ઓક્ટોબરે PM મોદી ગુજરાતના પ્રવાસે
• PM મોદી કેવડિયા ખાતે રાષ્ટ્રીય એકતા પરેડમાં લેશે ભાગ
• ભૂલ ભુલૈયા ગાર્ડન, મિયાવાકી ગાર્ડન, કમલમ ગાર્ડનનુ કરશે લોકાર્પણ

ગુજરાત વિધાનસભાની ચૂંટણી હવે ખૂબ નજીકમાં છે. ભાજપ અને આમ આદમી પાર્ટીએ જોરશોરથી પ્રચાર શરૂ કરી દીધો છે. આ વખતે આમ આદમી પાર્ટીની એન્ટ્રીથી ગુજરાતમાં ત્રિપાંખીયો જંગ ખેલાવાનો છે. એવામાં હંમેશા ચૂંટણી મોડમાં રહેતી ભારતીય જનતા પાર્ટી પણ એડીચોટીનું જોર લગાવી રહી છે. ભારતીય જનતા પાર્ટી મિશન 182 હાંસલ કરવા મથામણ કરી રહી છે.  ગુજરાત વિધાનસભાની ચૂંટણી પૂર્વે તમામ રાજકીય પક્ષના કેન્દ્રીય નેતાઓ સતત ગુજરાતમાં આવજાવ કરી રહ્યાં છે. કેન્દ્રીય ગૃહમંત્રી અમિત શાહ હાલ ગુજરાતના પ્રવાસે છે તો વડાપ્રધાન નરેન્દ્ર મોદી ફરી 30 અને 31 ઓક્ટોબરે ગુજરાતના પ્રવાસે આવી રહ્યાં છે. 

30 અને 31 ઓક્ટોબરે ગુજરાતના પ્રવાસે આવી રહ્યાં છે PM
સરદાર વલ્લભભાઈ પટેલની જન્મજયંતિને રાષ્ટ્રીય એકતા દિવસ જાહેર કરનાર પ્રધાનમંત્રી નરેન્દ્ર મોદી 31 ઓકટોબરે કેવડિયા આવવાનું ક્યારે ટાળતા નથી. ત્યારે પીએમ મોદી 30 અને 31 ઓક્ટોબરે ગુજરાતના પ્રવાસે આવી રહ્યાં છે. આ દરમિયાન પીએમ મોદી કેવડિયા ખાતે રાષ્ટ્રીય એકતા પરેડમાં ભાગ લશે. સાથે જ તેમના હસ્તે ભૂલ ભુલૈયા ગાર્ડન, મિયાવાકી ગાર્ડન, કમલમ ગાર્ડનનું લોકાર્પણ કરાશે. પીએમ મોદીના આ પ્રવાસને લઈને જે પણ અધિકારીઓએ દિવાળીની લાંબી રજા મૂકી છે તેમની રજા કેન્સલ કરી દેવામાં આવી છે. 

31 ઓક્ટોબરે દિલ્હી માટે રવાના થશે PM
પીએમ મોદી નર્મદા ગોરા ઘાટ પર નર્મદાની મહાઆરતીમાં હાજર રહેશે. કેવડિયા એકતા નગર ખાતે સર્કિટહાઉસમાં રાત્રી રોકાણ કરશે. 31 ઓક્ટોબરે સ્ટેચ્યુ ઓફ યુનિટી ખાતે એકતા પરેડને નિહાળી રાષ્ટ્રીય એકતા દિનની ઉજવણી કરશે અને રાષ્ટ્રને સંબોધન કરશે. જે બાદ 31 ઓક્ટોબરની સાંજે PM મોદી દિલ્હી માટે રવાના થશે.

સાંસદ, ધારાસભ્યો, પ્રમુખો અને પદાધિકારીઓ સાથે કરશે બેઠક 
નોંધનીય છે કે,  ગુજરાત વિધાનસભાની ચૂંટણી જીતવા માટે હવે ભાજપે કમર કસી છે. આપના આક્રમક પ્રચાર અને વધતી લોકપ્રિયતા સામે ભાજપના ઉચ્ચ હોદ્દેદારોએ બેઠકોનો દોર શરૂ કર્યો છે. ગુજરાતના પ્રવાસે આવેલા કેન્દ્રીય ગૃહમંત્રી અમિત શાહ આજે મધ્યગુજરાતના નેતાઓ સાથે વડોદરામાં બેઠક કરશે. આજે તેઓ વડોદરામાં મધ્ય ગુજરાતના ભાજપના સાંસદ, ધારાસભ્યો, પ્રમુખ અને પદાધિકારીઓ સાથે બેઠક કરશે.