ગુજ'રાજ' 2022 / સુરતની સૌથી ચર્ચિત બેઠક પર પ્રચાર માટે PM મોદી પોતે મેદાનમાં, પાટીદારોના ગઢમાં AAP આપી રહ્યું છે સીધી ટક્કર

• PM નરેન્દ્ર મોદી 27મી એ સુરતમાં જાહેર સભા કરશે
• પાટીદારોના ગઢ સમાન મોટા વરાછામાં જાહેર સભા યોજાશે
• એરપોર્ટથી મોટા વરાછા સુધી રૂટ પર યોજાશે રોડ શો 

ગુજરાત વિધાનસભાની ચૂંટણી નજીક આવતા જ તમામ રાજકીય પક્ષો પ્રભાવશાળી પાટીદાર સમાજને રીઝવવા માટે કોઈ કસર છોડી રહ્યા નથી. રાજ્યની 182 વિધાનસભા સીટોની ચૂંટણી માટે એક તરફ ભારતીય જનતા પાર્ટીએ 45 પાટીદારોને ઉમેદવાર બનાવ્યા છે, તો મુખ્ય વિપક્ષ કોંગ્રેસે 42 પાટીદારોને મેદાનમાં ઉતાર્યા છે. આમ આદમી પાર્ટીએ પણ પાટીદાર સમાજના 46 નેતાઓને ટિકિટ આપી છે. પાટીદારોને રિઝવવા માટે અવનવા પ્રયાસો કરવામાં આવી રહ્યા છે. ત્યારે હવે વડાપ્રધાન નરેન્દ્ર મોદી પાટીદારોના ગઢમાં જાહેરસભા અને રોડ-શો કરવા જઈ રહ્યા છે. 

પાટીદારોના ગઢ સુરતમાં PM મોદીની જાહેર સભા
વડાપ્રધાન નરેન્દ્ર મોદી ઉપરા ઉપરી ગુજરાતના પ્રવાસે આવી રહ્યા છે અને સભાઓ ગજવી રહ્યા છે. આ તરફ હવે વડાપ્રધાન નરેન્દ્ર મોદી પાટીદારોના ગઢ સુરતની મુલાકાતે આવવાના છે. રાજ્યમાં વિધાનસભાની ચૂંટણીને લઈ વડાપ્રધાન નરેન્દ્ર મોદી આગામી 27 નવેમ્બરે સુરતમાં આવવાના છે. જેને લઈ સુરત ભાજપની ટીમ કવાયતમાં લાગી છે. પીએમ મોદીનો એરપોર્ટથી મોટા વરાછા રૂટ પર રોડ શો યોજાશે. સાથે પાટીદારોના ગઢ સમાન મોટા વરાછામાં જાહેર સભા યોજાશે. 

રાત્રિ રોકાણ પણ સુરતમાં જ કરશે PM મોદી
મહત્વનું છે કે, સુરત સહિત ગુજરાતની ચૂંટણીમાં આ વખતે કોંગ્રેસની સાથે સાથે આમ આદમી પાર્ટી પણ મેદાને છે. તેવામાં હવે પાટીદાર પ્રભુત્વવાળી બેઠકો પર PMનો રોડ-શો અને જાહેર સભા યોજાશે. મોટા વરાછામાં જાહેર સભા પૂર્ણ થયા બાદ  પીએમ મોદી રાત્રિ રોકાણ પણ સુરતમાં જ કરશે. તેઓ બીજા દિવસે બપોરે 12 વાગ્યા સુધી સુરતમાં રોકાણ કરશે. 

ભાજપ -AAP વચ્ચે ખરાખરીનો જંગ 
આપને જણાવી દઈએ કે, પાટીદારના ગઢ ગણાતા વરાછામાં ભાજપ-AAP વચ્ચે ખરાખરીનો જંગ જામશે. કારણ કે આ વખતે અહીં આમ આદમી પાર્ટીએ એવા ઉમેદવારને ટિકિટ આપી છે, કે જેઓ પાટીદાર આંદોલનમાં એક સમયે હાર્દિક પટેલના સાથી હતા. આમ આદમી પાર્ટીએ અલ્પેશ કથીરિયાને ચૂંટણીના મેદાનમાં ઉતાર્યા છે. તો બીજી તરફ ભાજપે પોતાના જુના જોગી અને ગત ચૂંટણી જીતેલા કુમાર કાનાણીને રિપીટ કર્યા છે.  જ્યારે કોંગ્રેસ તરફથી પ્રફુલ તોગડિયા ઉમેદવાર છે. વરાછામાં આપનો પ્રચાર આક્રમક છે. કેજરીવાલ અહી રેલી, રોડ શો અને સભાઓ કરી રહ્યા છે. 

ગત વખતે ભાજપને પ્રચાર કરવા માટે ભારે મુશ્કેલી થઈ 
વર્ષ 2017 વિધાનસભાની ચૂંટણીમાં સુરતની વરાછા બેઠક પર ભાજપના કાર્યકર્તાઓને પ્રચાર કરવા માટે ભારે મુશ્કેલી થઈ હતી. આ વિસ્તારમાં આંદોલનને લગતા વિરોધ પ્રદર્શન પણ થયા હતા. ભાજપને પ્રચારમાં પણ ઘણી મુશ્કેલીનો સામનો કરવો પડ્યો હતો. તેમ છતા ભાજપે આ બેઠકને જાળવી રાખી હતી. ત્યારે જોવાનું એ રહ્યું કે પાટીદારોનું દિલ જીતવામાં આ વખતે કોણ સફળ થાય છે. ભાજપ, આપ કે કોંગ્રેસ.