નમસ્તે ટ્રમ્પ / ટ્રમ્પ-મોદીના આ કાર્યક્રમમાં 2 ફેરફાર, CMએ કહ્યું- 'ટ્રમ્પ ક્યાં જશે તેની અમને નથી ખબર'

• મોદી-ટ્રમ્પના રોડ-શોમાં 2 ફેરફાર કરવામાં આવ્યા
• 2500 જેટલી ટ્રાફિક પોલીસ તહેનાત રહેશે
• ટ્રમ્પને ક્યાં જવું તે વ્હાઇટ હાઉસ નક્કી કરેઃ CM રૂપાણી

જગત જમાદાર અમેરિકાના રાષ્ટ્રપતિ ડૉનાલ્ડ ટ્રમ્પ અમેરિકાથી સીધા અમદાવાદ આવી રહ્યા છે. ત્યારે અમદાવાદમાં તડામાર તૈયારીઓ ચાલી રહી છે. ત્યારે હવે મોદી-ટ્રંપના રોડ-શોમાં 2 ફેરફાર કરવામાં આવ્યા છે. જેમાં પાવર હાઉસ સર્કલથી જનપથ સુધીનો માર્ગ બંધ રાખવાનો નિર્ણય લેવાયો છે. તો વિસત સર્કલથી ઝુંડાલ સર્કલ સુધીનો માર્ગ બંધ રાખવા નિર્ણય લેવામાં આવ્યો છે.

આ દરમિયાન 2500 જેટલી ટ્રાફિક પોલીસ તૈનાત રહેશે. ઉપરાંત 2000 ટ્રાફિક બ્રિગેડના જવાનો ખડેપગે ખડેપગે તૈનાત રહેશે. જ્યારે 100 PSI, 4 DCP અને 7 ACP રૂટ પર હાજર રહેશે. તો બીજી તરફ ગાંધી આશ્રમમાં પણ હાલ પુરતો બંદોબસ્ત યથાવત રાખવાનો નિર્ણય કરાયો છે.

ટ્રમ્પને ક્યાં જવું તે વ્હાઇટ હાઉસ નક્કી કરેઃ મુખ્યમંત્રી રૂપાણી

મુખ્યમંત્રી વિજય રૂપાણી ખુદ અમદાવાદ એરપોર્ટ પહોંચ્યા હતા અને તૈયારીઓની સમિક્ષા કરી હતી. મીડિયા સાથેની વાતચીતમાં મુખ્યમંત્રીએ કહ્યું કે તમામ તૈયારીઓ ફાઈનલ સ્ટેજ પર છે. તો સાબરમતી આશ્રમમાં ટ્રમ્પ મુલાકાત લેશે કે કેમ ? તેને લઈ જે અસમંજસની સ્થિતિ છે તેના પર મુખ્યમંત્રી રૂપાણીએ કહ્યું કે ટ્રમ્પને ક્યાં જવું તે વ્હાઈટ હાઉસ નક્કી કરે છે. તેથી આજે સાંજ સુધીમાં ખબર પડી જશે કે ટ્રમ્પ સાબરમતી આશ્રમમાં જશે કે નહીં.