અમેરિકી રાષ્ટ્રપતિ ડોનાલ્ડ ટ્રંપ ગુજરાતની મહેમાનગતિ માણીને વાયા આગ્રા દિલ્હી પહોંચી ગયા છે. ગુજરાતના લોકો જાણે પોતાના ઘરનો પ્રસંગ રંગચંગે સમાપન થયો હોય તેવો ભાવ અનુભવી રહ્યા છે. આનંદ અને ગર્વની વાત એ રહી કે આવું મહાઆયોજન ગુજરાતની ધરતી પર શાંતિપૂર્વક પાર પડ્યું. આમ ગુજરાતની વૈશ્વિક ઓળખ શાંતિ અને સમૃદ્ધિના પ્રતિક તરીકે થઈ રહી છે. ગુજરાતે ઘર આંગણે નમસ્તે ટ્રંપના ભગીરથ આયોજને શાંતિ અને શિસ્ત પૂર્વક યોજીને પોતાની ઓળખ બરકરાર રાખી છે.
ગુજરાતે શાંતિ અને શિસ્ત પૂર્વક યોજીને પોતાની ઓળખ બરકરાર રાખી છે
નમસ્તે ટ્રંપ કાર્યક્રમ કોઈ નાનૂ સૂનું આયોજન ન હતું. ખુદ અમેરીકી રાષ્ટ્રપતિ પણ આ કાર્યક્રમને લઈને રોમાંચિત હતા. કેમ કે, એક સાથે લાખો લોકો એકઠા થાય તે વાત ડોનાલ્ડ ટ્રંપ માટે પણ નવાઈથી ઓછી ન હતી. પરંતુ જ્યારે તેમણે રોડ શો અને મોટેરા સ્ટેડિયમમાં એક સાથે લાખો લોકોને જોયા તો તેઓ પણ આશ્ચર્ય ચકિત થઈ ગયા.
શિસ્તનો પરિચય
કોઈ કાર્યક્રમમાં આટલી વિશાળ જનમેદની એક સાથે જોઈને ડોનાલ્ડ ટ્રંપનું આશ્ચર્યચકિત થવાના ઘણા કારણો છે. કાર્યક્રમનું શાંતિપૂર્વક સમાપન થવું એ ગુજરાત માટે ગૌરવની વાત છે. કેમ કે નમસ્તે ટ્રંપ કાર્યક્રમ પર આખા વિશ્વની નજર હતી. આ કાર્યક્રમ માત્ર સ્વાગત સમારોહ ન હતો. આ કાર્યક્રમ દેશ અને રાજ્યના શિસ્ત અને સંગઠનનો પરિચય હતો. 1 લાખથી વધારે લોકો સ્ટેડિયમમાં એકઠા થયા હતા. રોડ પર લાખોની સંખ્યામાં જનમેદની ઊમટી હતી. તમામ ઉંમરના લોકો ટ્રંપના સ્વાગતમાં હોંશથી જોડાયા હતા. છતાં પણ કોઈપણ પ્રકારની ગેરવ્યવસ્થા સર્જાઈ નહીં.
ચુસ્ત બંદોબસ્ત
એ વાત જુદી છે કે ટ્રંપના સ્વાગત કાર્યક્રમ માટે તમામ પોલીસ જવાનોને પણ તમામ જવાબદારી સોંપાઇ હતી. તો બેઠક વ્યવસ્થાને લઇને પણ વિશેષ તૈયારી કરવામાં આવી હતી. સ્ટેડિયમમાં 1 લાખ 10 હજારની બેસવાની વ્યવસ્થા કરવામાં આવી હતી. ટ્રમ્પની સુરક્ષા માટે અમેરિકાથી આવેલા સુરક્ષા એજન્ટો તો હતા જ પરંતુ ભારત તરફથી પણ સુરક્ષા માટે 33 DCP, 75 ACP, 300 PI, 1 હજાર PSI સહિત 12 હજાર જવાનો તૈનાત રખાયા હતા. આ ઉપરાંત 15 બોમ્બ ડિસ્પોઝલ સ્ક્વૉડ, 7 મોરચા સ્ક્વૉડ, 7 QRT ટીમ હાજર રખાઈ હતી. 700 જેટલા હેન્ડ મેટલ ડિટેક્ટર, 300 જેટલા દોરડા, ધાબા પોઇન્ટ પર 140 દૂરબીન, 130 DFMDનો ઉપયોગ કરવામાં આવ્યા હતા.
જો કે, પોલીસ અને સુરક્ષા એજન્સીઓની આટલી તૈયારીને જનતાનો સારો પ્રતિસાદ ન મળ્યો હોત તો તેમના માટે પડકાર સર્જાત. પરંતુ ગુજરાતની જનતાએ એક થઈને ઘર આંગણે આવેલા કાર્યક્રમને રંગેચંગે પાર પાડ્યો તે ગુજરાત માટે ગૌરવની વાત છે.
શિસ્તથી દીપ્યો પ્રસંગ
રાજ્યના નાગરિકોએ પોલીસ સાથે તાલમેલ જાળવી રાખ્યો હતો. ગુજરાતીઓએ જવાબદાર યજમાન બની સુરક્ષાના નિયમોનું ચુસ્ત રીતે પાલન કર્યું. રાજ્યના નાગરિકો માટે આ પોતીકો પ્રસંગ હતો. અંગત સગવડો ભૂલીને સૌની સગવડ સાચવવાનો ગુજરાતીઓનો સ્વભાવ ઝળકી ઊઠ્યો. દુનિયામાં આ ઘટના શાંતિ અને શિસ્તના દાખલા તરીકે લેખાશે.
PM મોદીને હોય છે વિશ્વાસ!
કદાચ ગુજરાતીઓના આ સ્વભાવને એક ગુજરાતી પ્રાઈમિનિસ્ટર સારી રીતે પિછાણે છે. એટલે જ તો ગુજરાતમાં જ આવા મહાઆયોજનો સફળતાપૂર્વક પાર પડવાનો પ્રધાનમંત્રીને વિશ્વાસ હોય છે. આ તેનું જ પરિણામ છે કે, પીએમ નરેન્દ્ર મોદી આવા મહાઆયોજનોની યજમાનીની જવાબદારી ગુજરાતના શિરે નાખે છે. ગુજરાત હરખે હરખે આવા મહાઆયોજનો પાર પાડી વિશ્વને ગુજરાતની આગવી ઓળખ આપે છે.