પૂર્વતૈયારી / દેશમાં ફરી કોરોના વકરતા મોદી સરકાર એક્શનમાં, 12 વાગ્યે રાજ્યોના મુખ્યમંત્રીઓ સાથે PM કરશે બેઠક

• દેશભરમાં સતત વધી રહ્યાં છે કોરોનાના કેસ
• PM મોદી આજે ​​મુખ્યમંત્રીઓ સાથે કરશે બેઠક
• PM મોદીની આ બેઠક બપોરે 12 વાગ્યે શરૂ થશે

ભારતમાં એક વાર ફરી કોરોનાના કેસો ઝડપથી વધી રહ્યાં છે. ત્યારે પરિસ્થિતિ વધારે ગંભીર ના બને તે માટે વડાપ્રધાન નરેન્દ્ર મોદી (PM Narendra Modi) એ આજે રાજ્યોના મુખ્યમંત્રીઓની મહત્વની બેઠક બોલાવી છે. આ બેઠકમાં પીએમ મોદી દેશભરમાં કોરોનાની સ્થિતિની સમીક્ષા કરશે. કાર્યક્રમ અનુસાર પીએમ મોદીની આ બેઠક બપોરે 12 વાગ્યે શરૂ થશે.

કોરોનાની ચોથી લહેરની આશંકા વચ્ચે વડાપ્રધાન મોદીની મુખ્યમંત્રીઓ સાથે આ પ્રથમ મુલાકાત છે. આ રીતે અગાઉ પણ પીએમ મોદી સમયાંતરે સીએમ સાથે કોરોનાની સ્થિતિ પર વાતચીત કરતા રહ્યાં છે.

At 12 noon tomorrow, 27th April, will be interacting with state Chief Ministers to review the COVID-19 situation.

— Narendra Modi (@narendramodi) April 26, 2022

જાણો કોણ-કોણ પીએમ મોદીની બેઠકમાં રહેશે હાજર?

આ બેઠકમાં તમામ રાજ્યોના મુખ્યમંત્રીઓ, ગૃહમંત્રી અમિત શાહ, રાજનાથસિંહ સહિતના પીએમઓના અધિકારીઓ હાજર રહેશે અને દેશની કોરોનાની સ્થિતિની સમીક્ષા કરશે.

ભારતમાં કોરોનાની ચોથી લહેરની શક્યતા

ભારતમાં હાલમાં કોરોનાના કેસ વધી રહ્યાં છે જે ચોથી લહેરનો સંકેત છે.  છેલ્લા એક સપ્તાહથી દરરોજ નવા કેસની સંખ્યા વધી રહી છે. વૈજ્ઞાનિકોએ ઓમિક્રોનના નવા પ્રકારોના ઉદભવની આશંકા વ્યક્ત કરી છે, જે વધુ ચિંતાનો વિષય છે કારણ કે આ પ્રકાર ઝડપથી એક વ્યક્તિને બીજામાં ચેપ લગાડે છે.

દેશમાં બે અઠવાડિયાથી સતત કોરોનાના કેસમાં વધારો 

દેશમાં 11 અઠવાડિયાના સતત ઘટાડા બાદ કોરોનાના કેસમાં છેલ્લાં બે અઠવાડિયાથી દર્દીઓની સંખ્યામાં સતત વધારો થઇ રહ્યો છે. છેલ્લાં ત્રણ દિવસથી સતત 2500 થી વધુ કેસ નોંધાઈ રહ્યાં છે. તારીખ 18 થી 24 એપ્રિલની વચ્ચે 15700 થી પણ વધારે કોરોનાના નવા દર્દીઓ મળી આવ્યા છે. ગયા સપ્તાહથી તેમાં 95 ટકાનો વધારો જોવા મળ્યો છે. કોરોનાના કેસોમાં હવે 12થી વધુ રાજ્યોમાં વધારો જોવા મળી રહ્યો છે, જે ગયા સપ્તાહ સુધી માત્ર 3 રાજ્યોમાં હતો. ત્યાર બાદ અનેક રાજ્યોએ ફરીથી નવા નિયંત્રણો લાદવાનું શરૂ કરી દીધું છે.

બાળકોની વેક્સિનને પણ મંજૂરી મળી ગઇ

ભારતના ડ્રગ કંટ્રોલર જનરલ DCGI એ ભારત બાયોટેકની કોવેક્સિનને 6થી 12 વર્ષની વયના બાળકો માટે ઇમરજન્સીના ઉપયોગ માટે મંજૂરી આપી દીધી છે. આ સિવાય Zydus Cadilaની Zycov D રસી પણ 12 વર્ષથી વધુ ઉંમરના બાળકો માટે ઈમરજન્સી ઉપયોગ માટે મંજૂર કરી દેવાઇ છે. ડ્રગ્સ કંટ્રોલર જનરલ ઓફ ઈન્ડિયા (DCGI) ની વિષય નિષ્ણાંત સમિતિ (SEC) ની બેઠક બાદ આ નિર્ણય લેવામાં આવ્યો છે, જેમાં 2-12 વર્ષની વય જૂથના બાળકોમાં ભારત બાયોટેકના કોવેક્સિનના ઉપયોગ માટે ડેટા માંગવામાં આવ્યો હતો.