વર્ચ્યુઅલ બેઠક / PM મોદીએ પૂછ્યું, ડોક્ટરમાંથી IPS કેમ બન્યા?, મહિલા અધિકારીએ આપ્યો દિલચસ્પ જવાબ

• પ્રધાનમંત્રી મોદીએ IPS પ્રોબેશનર્સ સાથે સંવાદ સાધ્યો
• આઈપીએસ ડોક્ટર નવજોત સિમી સાથે દિલચસ્પ વાત કરી
• દુશ્મનોના દાંત ખાટા કરવાનો વિચાર કેવી રીતે આવ્યો-મોદીએ નવજોત સિમીને પૂછ્યું 

હૈદરાબાદની સરદાર વલ્લભભાઈ પટેલ રાષ્ટ્રીય પોલીસ એકેડમીમાં ઉપસ્થિત આઈપીએસ પ્રોબેશનર્સ સાથે સંવાદ સાધવામાં પીએમ મોદીએ આઈપીએસ ડોક્ટર નવજોત સિમી સાથે દિલચસ્પ વાત કરી હતી. હકીકતમાં નવજોત સિમી પહેલા ડેન્ટિસ્ટ હતા. પ્રધાનમંત્રીએ સિમિને પૂછ્યું કે લોકોના દાંતનું દૂર કરવાની જવાબદારી લીધી હતી તો પછી દેશના દુશ્મનોના દાંત ખાટા કરવાનો તમને કેવી રીતે વિચાર આવ્યો. પ્રધાનમંત્રીનો જવાબ સાંભળીને ડોક્ટર સિમીએ જવાબ આપ્યો શરુઆતથી જ મારો ઈરાદો સિવિલ સર્વિસિસમાં નોકરી કરવાનો હતો અને ડોક્ટર હોય કે પોલીસ અફસર, બન્નેનું કામ લોકોના દર્દ દૂર કરવાનું છે. 

મહિલા અધિકારીઓ પોલીસને નકારાત્મક છાપ દૂર કરવા મહેનત કરે- મોદી

પ્રધાનમંત્રી મોદીએ બીજા આઈપીએસ ટ્રેઈનીને એવું પણ જણાવ્યું કે લોકોમાં પોલીસની જે નકારાત્મક છાપ પડી છે તેને દૂર કરવામાં તેમણે તનતોડ પ્રયાસ કરવો જોઈએ. મોદીએ કહ્યું કે કોરોના કાળમાં પોલીસે લોકોની મદદ કરીને ખૂબ વાહવાહી મેળવી હતી પરંતુ હવે ફરી વાર લોકોમાં પોલીસની નકારાત્મક છાપ પડી છે. 

પ્રધાનમંત્રીએ મહિલા અધિકારીઓ પાસેથી સાયબર ગુનાખોરી અટકાવવાના સૂચનો માંગ્યા 

મોદીએ કહ્યું કે પોલીસ વિભાગમાં વધારે મહિલાઓને સમાવવાથી પોલીસ દળ મજબૂત બનશે. ફરજ દરમિયાન તાલીમાર્થી આઈપીએસ અધિકારીઓનો હેતુ નેશન ફર્સ્ટ, ઓલ્વેઝ ફર્સ્ટ (દેશ પહેલો, હમેંશા પહેલો) હોવો જોઈએ. પ્રધાનમંત્રી મોદીદએ કહ્યું કે સાયબર ગુનેગારો દ્વારા થતી નાણાકીય છેતરપિંડી, મહિલાઓ અને બાળકો સામેના ગુનાઓ એક મોટો પડકાર છે. ટેકનોલોજીનો ઉપયોગ કરીને આ મુદ્દાઓનો ઉકેલ લાવવા માટે શું કરી શકાય તે અંગેના સૂચનો પ્રધાનમંત્રીએ આઈપીએસ ટ્રેઈની પાસેથી માંગ્યા હતા.