ગીર સોમનાથ જિલ્લાના સદભાવના ગ્રાઉન્ડ ખાતેથી વડાપ્રધાન નરેન્દ્ર મોદીએ કહ્યું કે, આ વખતે જૂના બધા રેકોર્ડ તોડવાના છે. આ વખતે ત્રણ રેકોર્ડ ખાસ તોડવાના છે.
PM મોદીએ પોતે ગુજરાતમાં પ્રચારની સંભાળી છે કમાન
વડાપ્રધાને સદભાવના ગ્રાઉન્ડ ખાતે જનસભાને સંબોધી
PM મોદીએ લોકોને ત્રણ રેકૉર્ડ તોડવા કરી અપીલ
ગુજરાત વિધાનસભાની ચૂંટણીને આંગળીના વેઢે ગણી શકાય એટલા જ દિવસો બાકી રહ્યા છે. એવામાં તમામ રાજકીય પક્ષોએ પ્રચાર અભિયાનને તેજ બનાવ્યું છે. દરેક રાજકીય પક્ષો મતદારોને આકર્ષવા માટે અડીચોટીનું જોર લગાવી રહ્યા છે. PM મોદીએ પોતે ગુજરાતમાં પ્રચારની કમાન સંભાળી છે. આજે વડાપ્રધાન નરેન્દ્ર મોદીએ સોમનાથ મંદિરમાં સોમનાથ દાદાના ચરણોમાં શીશ ઝૂકાવી આશીર્વાદ લીધા બાદ સદભાવના ગ્રાઉન્ડ ખાતે જનસભાને સંબોધી. જેમાં વડાપ્રધાન નરેન્દ્ર મોદીએ કહ્યું કે, આ વખતનો લક્ષ્યાંક જુદો છે, અહીંની તો ચારે ચાર બેઠક આ વખતે જીતવાની છે.
આ વખતે જૂના બધા રોકોર્ડ તોડવાના છેઃ નરેન્દ્ર મોદી
વડાપ્રધાન નરેન્દ્ર મોદીએ જય સોમનાથ, રામ રામ કરીને સભાને સંબોધન શરૂ કર્યું. જે બાદ પીએમ મોદીએ કહ્યું કે, સાથીઓ ચૂંટણીમાં સૌરાષ્ટ્રમાં એક પ્રકારે આ મારી પહેલી રેલી છે અને એ પણ સોમનાથ દાદાની પવિત્ર ધરતી પરથી છે. ગઈકાલે હું કાશીના દરબારમાં હતો અને આજે હું સોમનાથના ચરણોમાં છું. સોમનાથ દાદાના આશીર્વાદ હોય અને તેની સાથે જનતાના આશીવાર્દ જોડાઈ જાય. એટલે આ વખતનો લક્ષ્યાંક જુદો છે. અહીંની તો ચારેય બેઠક જીતવાની છે. પરંતુ આ વખતે જૂના રેકોર્ડ તોડવા છે. હું આ ચૂંટણીમાં તમારી પાસે એટલા માટે જ આવ્યો છે. આ વખતે ત્રણ રેકોર્ડ ખાસ તોડવાના છે.
પહેલો રેકોર્ડ તોડવો છે પોલિંગ બુથનોઃ PM
PM મોદીએ કહ્યું કે, આ વખતે પહેલો રેકોર્ડ તોડવાનો છે એ છે પોલિંગ બુથ. જૂના બધા રેકોર્ડ તોડીને વધુમાં વધુ મતદાન થાય. એક પણ પોલિંગ બુથ એવું ન હોય કે જેમાં ભાજપનો વિજય વાવટો ન ફરક્યો હોય. મારો આગ્રહ છે કે આ વખતે આપણે પોલિંગ બધા જીતવા છે. વધુમાં વધુ મતદાન અને વધુમાં વધુ પોલિંગ બુથ જીતવાના સંકલ્પ સાથે આ ચૂંટણીમાં લોકશાહીના ઉત્સવને આપણે ઉજવવો છે.
'બીજો આ રેકોર્ડ તોડવાનો છે'
પીએમ મોદીએ સંબોધનમાં કહ્યું કે, બીજો રેકોર્ડ એ તોડવાનો છે કે એક પણ પોલિંગ બૂથ એવું ન હોય જેમાં ભાજપનો વિજય ન થયો હોય.
નરેન્દ્રના જેટલા રેકૉર્ડ છે એ બધા રેકૉર્ડ ભૂપેન્દ્ર તોડેઃ PM મોદી
વડાપ્રધાન નરેન્દ્ર મોદીએ કહ્યું કે, બીજી મારી ઈચ્છા છે કે આ વખતે નરેન્દ્રના જેટલા રેકોર્ડ છે એ બધા રેકોર્ડ ભૂપેન્દ્ર તોડે અને ભૂપેન્દ્ર રેકોર્ડ તોડે એના માટે નરેન્દ્ર કામ કરે. આપણે બધા જૂના રેકોર્ડ તોડવા છે. કારણ કે આપણે ગુજરાતને વિકાસની નવી ઊંચાઈઓ પર લઈ જવાનું છે અને તેના માટે આપણે જેટલી મહેનત કરી શકીએ એટલી મહેનત કરવાની છે.
નરેન્દ્ર મોદીએ કહ્યું- માછીમારો માટે બનાવામાં આવી યોજનાઓ
વડાપ્રધાન મોદીએ જણાવ્યું કે, આજે ગુજરાતનો દરિયાકાંઠો ધમધમી રહ્યો છે અને ગુજરાતના બંદરો હિન્દુસ્તાનની સમૃદ્ધિનો દ્વાર બની રહ્યા છે. હિન્દુસ્તાનની સમૃદ્ધિનો દ્વાર બને એના માટે ગુજરાતના બંદરોનો વિકાસ કર્યો. સરકારે માછીમારો માટે અનેક યોજના ચાલુ કરી. માછીમારોને પણ મામુલી વ્યાજે બેંકમાંથી પૈસા મળે એવી વ્યવસ્થા કરવામાં આવી છે. માછીમારોનું વિશ્વમાં એક્સપોર્ટ ડબલ થઈ ગયું છે અને આવક પણ બમણી થઈ ગઈ છે.
પીએમ મોદીએ કહ્યું- કચ્છના રણને ગુજરાતનું તોરણ બનાવી દીધું
પીએમ મોદીએ કહ્યું કે, કચ્છનું રણ આપણને મુસીબત લાગતુ હતું. કચ્છના રણને આપણે બદલી નાખ્યું. કચ્છના રણને આપણે ગુજરાતનું તોરણ બનાવી દીધું. આજે કચ્છના રણોત્સવ જોવા માટે મોટી સંખ્યામાં લોકો આવે છે. કચ્છના રણપ્રદેશમાં રોજીરોટીના અવસરો ઉભા થઈ ગયા.
બે તબક્કામાં થશે મતદાન
આપને જણાવી દઈએ કે, ગુજરાતમાં બે તબક્કામાં મતદાન થવાનું છે. પ્રથમ તબક્કાનું મતદાન 1 ડિસેમ્બરે અને બીજા તબક્કાનું મતદાન 5 ડિસેમ્બરના રોજ થશે. જ્યારે મતગણતરી 8 ડિસેમ્બરના રોજ હાથ ધરવામાં આવશે.