મન કી બાતના 96મા અને છેલ્લા એપિસોડમાં પોતાના વિચારો શેર કરતા વડાપ્રધાને કહ્યું કે 'આ સમયે ઘણા લોકો રજાના મૂડમાં છે પણ સાવચેત રહીશું તો સુરક્ષિત રહીશું..'
નરેન્દ્ર મોદીએ કોરોના વાયરસને લઈને લોકોને કરી અપીલ
સાવચેત રહીશું તો સુરક્ષિત રહીશું - પીએમ મોદી
વડાપ્રધાને આપી આવી સલાહ
વડાપ્રધાન નરેન્દ્ર મોદીએ ઘણા દેશોમાં કોવિડ-19ના વધતા જતા કેસોનો ઉલ્લેખ કરતાં આજે મન કી બાત કાર્યક્રમમાં લોકોને આ વાયરસથી સુરક્ષિત રહેવા માટે સાવચેતીના પગલાઓનું પાલન કરવા વિનંતી કરી છે. આ વિશે વાત કરતાં એમને કહ્યું કે લોકોએ સાવચેત રહેવું જોઈએ, ચહેરા પર માસ્ક પહેરવું જોઈએ અને વારંવાર હાથ ધોવા જોઈએ.
આકાશવાણીના માસિક રેડિયો કાર્યક્રમ મન કી બાતના 96મા અને છેલ્લા એપિસોડમાં પોતાના વિચારો શેર કરતા વડાપ્રધાને કહ્યું કે 'આ સમયે ઘણા લોકો રજાના મૂડમાં છે. તહેવારો અને આ પ્રસંગોનો ભરપૂર આનંદ માણો પણ થોડી સાવધાની પણ રાખો. તમે પણ જોઈ રહ્યા છો કે વિશ્વના ઘણા દેશોમાં કોરોના વધી રહ્યો છે. તેથી જ આપણે માસ્ક અને હાથ ધોવા જેવી સાવચેતીઓનું વધુ ધ્યાન રાખવું પડશે.' મોદીજી એ આગળ કહ્યું કે, “જો આપણે સાવચેત રહીશું તો સુરક્ષિત રહીશું અને આપણા આનંદમાં કોઈ અડચણ નહીં આવે. વડાપ્રધાને આ સલાહ એવા સમયે આપી છે જ્યારે ચીન, જાપાન, દક્ષણિ કોરિયા સહિતના ઘણા દેશોમાં કોરોનાના કેસમાં ધરખમ વધારો જોવા મળી રહ્યો છે.'
નરેન્દ્ર મોદીએ આગળ કહ્યું હતું કે, “વર્ષ 2022 ખરેખર ઘણી રીતે ખૂબ જ પ્રેરણાદાયક અને અદ્ભુત હતું અને આ વર્ષે ભારતે તેની આઝાદીના 75 વર્ષ પૂર્ણ કર્યા અને આ વર્ષે અમૃતકાળની શરૂઆત થઈ. આ વર્ષે દેશને એક નવી ગતિ મળી છે. વર્ષ 2022 ની વિવિધ સફળતાઓએ આજે સમગ્ર વિશ્વમાં ભારત માટે એક વિશેષ સ્થાન બનાવ્યું છે. 2022 એટલે કે ભારત વિશ્વની પાંચમી સૌથી મોટી અર્થવ્યવસ્થા બનવાનો સીમાચિહ્ન હાંસલ કરે છે, ભારતે 220 કરોડ એન્ટી-કોવિડ-19 રસી આપવાનો અવિશ્વસનીય આંકડો પાર કર્યો છે અને ભારત નિકાસમાં $400 બિલિયનનો જાદુઈ આંકડો પાર કરવા જઈ રહ્યું છે.
વડાપ્રધાને કહ્યું હતું કે, 'વર્ષ 2022માં લોકોએ "આત્મનિર્ભર ભારત"નો સંકલ્પ અપનાવ્યો અને દેશના પહેલા સ્વદેશી વિમાનવાહક જહાજ INS વિક્રાંતનું સ્વાગત કર્યું. ભારતે અવકાશ, ડ્રોન, સંરક્ષણ અને રમતગમતની દુનિયા સહિત દરેક ક્ષેત્રમાં પોતાનું પરાક્રમ બતાવ્યું.'' ભારતને G-20નું પ્રમુખપદ મળવાનો ઉલ્લેખ કરતાં વડાપ્રધાને કહ્યું કે, "વર્ષ 2023માં આપણે G-20ના ઉત્સાહને નવી ઊંચાઈએ લઈ જવાનો છે."