પીએમ મોદીએ કહ્યું કે કોરોના મહામારીમાં ભારતે 150 કરતા પણ વધારે દેશોને મદદ કરી છે. બીજી લહેર દરમિયાન દુનિયા એક પરિવારની જેમ ભારતની પડખે ઊભી છે.
અમેરિકામાં પહોંચ્યા બાદ પ્રધાનમંત્રી મોદીનું સંબોધન
ગ્લોબલ કોવિડ સમિટને સંબોધિત કર્યું
મહામારીમાં ભારતે 150 કરતા પણ વધારે દેશોને મદદ કરી
અમેરિકાની પાંચ દિવસની મુલાકાતે પહોંચેલા પ્રધાનમંત્રી મોદીએ ગ્લોબલ કોવિડ સમિટને સંબોધિત કર્યું. મોદીએ કહ્યું કે કોરોના મહામારી હજુ પુરી થઈ નથી. દુનિયાની મોટાભાગની વસતી હજુ પણ વેક્સિનેટેડ થઈ નથી. ભારતે 150 થી વધારે દેશોની મદદ કરી છે.
મોદીએ કહ્યું કે ભારતે માનવતા માટે હમેંશા એક પરિવારને જેમ જોઈ છે. ભારતની ફાર્મા ઈન્ડસ્ટ્રીઝે ઓછા ખર્ચવાળી ડાયગ્નોસ્ટિક, કિટ્સ, દવાઓ, મેડિકલ ડિવાઈસ અને પીપીઈ કેટ બનાવી છે. અને ઘણા વિકાસશીલ દેશોને સસ્તા ભાવે આપી રહ્યું છે.
બીજી લહેરમાં આખી દુનિયા ભારતની પડખે ઊભી રહી તે બદલ ધન્યવાદ-મોદી
તેમણે કહ્યું કે ચાલુ વર્ષે અમે અમારી વેક્સિન 95 દેશો સહિત યુએન શાંતિ સૈનિકોને આપી છે અને ભારત જ્યારે બીજી લહેરનો સામનો કરી રહ્યો હતો ત્યારે દુનિયા અમારે માટે એક પરિવારને જેમ ઊભી હતી. ભારત માટે એકજૂટ થવા અને સમર્થન લેવા માટે હું તમામનો આભાર માનું છું. મોદીએ કહ્યું કે જેમ જેમ ભારતીય વેક્સિન ડેવલપ થઈ રહી છે, આપણે હાલની વેક્સિનની ક્ષમતા પણ વધારી રહ્યાં છીએ. જેમ જેમ આપણું ઉત્પાદન વધશે તેમ તેમ અમે બીજા દેશોને પણ વેક્સિન સપ્લાય કરી શકીશું.
વેક્સિનેશન અંગે મોદીએ આપી મહત્વની જાણકારી
મોદીએ કહ્યું કે ભારતમાં દુનિયાનું સૌથી મોટું વેક્સિનેશન અભિયાન ચાલી રહ્યું છે. ભારતે તાજેતરમાં 2.5 કરોડ લોકોને વેક્સિન આપી છે મોદીએ કહ્યું કે અત્યાર સુધી 80 કરોડથી વધારે ડોઝ અપાઈ ચૂક્યા છે અને 20 કરોડથી વધારે ભારતીયોને બન્ને ડોઝ અપાઈ ચૂક્યા છે.
150 થી વધારે દેશોને દવાઓ અને મેડિકલ સપ્લાય પૂરો પાડ્યો
મોદીએ કહ્યું કે અમે 150 થી વધારે દેશો સાથે દવાઓ અને મેડિકલ સપ્લાય શેર કર્યો છે. સ્વદેશી રીતે વિકસીત બે વેક્સિનને ભારતમાં ઈમરજન્સી ઉપયોગની મંજૂરી આપી દેવાઈ છે જેમાં દુનિયાની પહેલી ડીએનએ બેસ્ડ વેક્સિન પણ સામેલ છે. બીજી પણ ભારતીય વેક્સિન કંપનીઓને પ્રોડક્શનનું લાઈસન્સ મળ્યું છે. મોદીએ કહ્યું કે આપણે મહામારીની આર્થિક અસરોને દૂર કરવા પર પણ ધ્યાન આપવુ પડશે. વેક્સિન સર્ટિફિકેટને માન્યતા આપીને આંતરરાષ્ટ્રીય પ્રવાસને આસાન બનાવવો પડશે.