મોદી સરકારે અત્યાર સુધીમાં પીએમ કિસાન યોજનાના 10 હપ્તા ટ્રાન્સફર કરી દીધાં છે. ત્યારે આગામી 11મો હપ્તો પણ કદાચ આ (એપ્રિલ) મહિનામાં જમા થઇ શકે તેવી શક્યતા છે.
PM kisan યોજનાનો 11મો હપ્તો એપ્રિલમાં થઇ શકે છે જમા!
આ યોજના હેઠળ ખેડૂતોના ખાતામાં દર વર્ષે 3 હપ્તામાં 6 હજાર થાય છે જમા
e-KYC કરાવ્યા બાદ જ તમને આ યોજના હેઠળ પૈસા મળશે
મોદી સરકારની મહત્વકાંક્ષી પ્રધાનમંત્રી કિસાન સન્માન નિધિ (PM કિસાન યોજના) ના અત્યાર સુધીમાં 10 હપ્તા આવી ચૂક્યા છે. તમને જણાવી દઇએ કે, 10માં હપ્તાના પૈસા 1 જાન્યુઆરી, 2022 નાં રોજ ખેડૂતોના ખાતામાં ટ્રાન્સફર કરવામાં આવ્યા હતાં. ત્યારે સરકાર ટૂંક સમયમાં ખેડૂતોના ખાતામાં હવે 11મો હપ્તો ટ્રાન્સફર કરવા જઈ રહી છે.
પ્રધાનમંત્રી કિસાન સન્માન નિધિ યોજના હેઠળ કેન્દ્ર સરકાર ખેડૂતોના ખાતામાં દર વર્ષે 3 હપ્તામાં 6 હજાર રૂપિયા જમા કરે છે. જેનાથી ખેડૂતોને આર્થિક મદદ મળે છે. જો કે તમને જણાવી દઇએ કે, ઈ-કેવાયસી કરાવ્યા બાદ જ તમને આ યોજના હેઠળ પૈસા મળશે. જેની માટે તમારે પીએમ કિસાનના ઓનલાઈન પોર્ટલ પર જઈને તમારી માહિતી ભરવાની રહેશે. જો કે, સરકારે ઇ-કેવાયસી માટેની છેલ્લી તારીખ લંબાવી છે. પીએમ કિસાન યોજનાના ઇ-કેવાયસી માટેની છેલ્લી તારીખ અગાઉ 31 માર્ચ હતી જે હવે વધારીને 22 મે, 2022 કરી દેવાઇ છે.
આ રીતે કરાવો e-KYC
સૌ પહેલાં પીએમ કિસાન સન્માન નિધિ યોજનાની સત્તાવાર વેબસાઇટ pmkisan.gov.in પર જાઓ.
હોમ પેજની જમણી બાજુએ 'કિસાન કોર્નર' નામની લિંક પર ક્લિક કરો.
હવે પ્રથમ વિકલ્પ e-KYC પર ક્લિક કરો.
હવે તમારો આધાર કાર્ડ નંબર એન્ટર કરો.
કેપ્ચા કોડને એન્ટર કરો અને સર્ચ પર ક્લિક કરો.
હવે આધાર કાર્ડ સાથે લિંક કરેલ મોબાઈલ નંબર એન્ટર કરો.
તમને તમારા મોબાઈલ પર એક OTP આવશે કે જેને એન્ટર કરો.
તમારું આધાર કાર્ડ લિંક થઈ ગયું છે અને ઈ-કેવાયસી પૂર્ણ થઈ ગયું છે.
આ યોજનાને 24 ફેબ્રુઆરી, 2019 નાં રોજ લોન્ચ કરાઇ હતી. આ રીતે, આ યોજના શરૂ થયાને ત્રણ વર્ષથી વધુ સમય થઈ ગયો છે અને અત્યાર સુધીમાં કરોડો ખેડૂતોને યોજનાનો લાભ મળ્યો છે. આ યોજના દ્વારા દર ચાર મહિને ખેડૂતોના બેંક ખાતામાં બે-બે હજાર રૂપિયા ટ્રાન્સફર કરવામાં આવે છે. દર વર્ષે કુલ ત્રણ હપ્તામાં છ હજાર રૂપિયા ટ્રાન્સફર થાય છે.
આ રીતે ચેક કરો તમારું એપ્લિકેશન સ્ટેટસ
PM કિસાન સન્માન નિધિ યોજનાની સત્તાવાર વેબસાઇટ pmkisan.gov.in પર ક્લિક કરો.
વેબસાઈટની જમણી બાજુએ 'કિસાન કોર્નર' પર ક્લિક કરો.
હવે વિકલ્પમાંથી Beneficiary Status પર ક્લિક કરો.
સ્ટેટસ ચેક કરવા માટે તમારે આધાર નંબર, બેંક એકાઉન્ટ અને મોબાઈલ નંબર જેવી કેટલીક વિગતો દાખલ કરવાની જરૂર રહેશે.
આ પ્રક્રિયા પૂર્ણ કર્યા બાદ તમે તમારું નામ યાદીમાં છે કે નહીં તેની માહિતી મેળવી શકો છો.
આ યોજનાનો પ્રથમ હપ્તો 1 એપ્રિલથી 31 જુલાઈની વચ્ચે આવે છે. તો બીજો હપ્તો 1 ઓગસ્ટથી 30 નવેમ્બરની વચ્ચે ટ્રાન્સફર કરવામાં આવે છે. એ સિવાય ત્રીજા હપ્તાના પૈસા 1 ડિસેમ્બરથી 31 માર્ચની વચ્ચે ટ્રાન્સફર કરવામાં આવે છે. તે મુજબ એપ્રિલમાં જ ખેડૂતોના ખાતામાં 11 હપ્તાના નાણાં ટ્રાન્સફર થઇ શકે છે.