નમસ્તે ટ્રમ્પ / જાણો, PM મોદી અને ટ્રમ્પે ભાષણમાં એકબીજાના નામનું રટણ કેટલી વખત કર્યુ

• ડોનાલ્ડ ટ્રમ્પ આવ્યા ભારત પ્રવાસે 
• ટ્રમ્પ 26 મિનિટના ભાષણમાં 12 વખત બોલ્યા મોદી 
• PM મોદીએ 21 વખત ઉચ્ચાર્યું ટ્રમ્પ નામ 

આ તરફ એક વિશાળ ભીડની વચ્ચે મોદીએ ટ્રમ્પને તેમના મિત્ર ગણાવતાં કહ્યું, 'મારો મિત્ર ભારતનો મિત્ર છે'. નરેન્દ્ર મોદીએ કહ્યું, 'આપણે ઘણી બધી બાબતોની વહેચણી કરીએ છીએ: મૂલ્યો અને આદર્શો, ઉદ્યમ અને નવીનતાની ભાવના, તકો અને પડકારો, આશાઓ અને આકાંક્ષાઓ.'

ટ્રમ્પ 26 મિનિટના ભાષણમાં 12 વખત બોલ્યા મોદી 

રાષ્ટ્રપતિ ટ્રમ્પે 26 મિનિટના ભાષણમાં અમેરિકા શબ્દનો ઉલ્લેખ 23 વખત, મોદી 12, વિશ્વ 11, આતંકવાદ 7, પાકિસ્તાન 4, લશ્કરી 7, લોકશાહી 5, મિત્રતા 5, અર્થતંત્ર 5, વ્યવસાય 4, સંસ્કૃતિ 3, સરહદ 2, સુરક્ષા 3, પડોસી 2, ગુજરાત, ગાંધી અને મોટેરા 2 વખત તથા ગરીબી શબ્દનું 2 રટણ સાંભળવા મળ્યું હતું. આ સાથે જ તેમના ભાષણમાં વિજ્ઞાન, ટેકનોલોજી, બોલિવૂડ, ચાઇવાલા, સચિન તેંડુલકર, વિરાટ કોહલી, સરદાર પટેલ, વિવેકાનંદ અને તાજમહેલનો પણ ઉલ્લેખ સાંભળવા મળ્યો હતો.

PM મોદીએ 21 વખત ઉચ્ચાર્યું ટ્રમ્પ નામ 

પોતાના 21 મિનિટના સંબોધનમાં વડા પ્રધાન મોદીએ ટ્રમ્પનું 21 વાર નામ ઉચ્ચાર્યું હતું. આ સાથે જ તેમની જીભ પર અમેરિકાનું નામ પણ છવાયેલું જોવા મળ્યું હતું, જેમાં તેમણે અમેરિકા શબ્દનો 29 વાર ઉલ્લેખ કર્યો. વડા પ્રધાન મોદીએ પોતાના ભાષણમાં 41 વખત ભારતનું નામ લીધું છે, ફ્રેન્ડ્સ 14, ફેમિલી 4, ડિજિટલ 4, ઇતિહાસ, ફર્સ્ટ લેડી અને ઇવાન્કા 2, સરદાર પટેલ અને ટ્રસ્ટ 3, લોકશાહી 1, આતંકવાદ 2, ભારત-અમેરિકન સંબંધો 7, નમસ્તે ટ્રમ્પ 7 , ગુજરાત 2, ઇતિહાસ 2, મેલેનીયા 2, સંસ્કૃતિ 2, સ્પેસ 2 વખત અને સંરક્ષણ, વિકાસ એ શબ્દનું એકવાર રટણ કર્યું હતું.

22 કિમી. લાંબો રોડ શો યોજાયો હતો

ડોનાલ્ડ ટ્રમ્પના એરપોર્ટ પર ગ્રાન્ડ વેલકમ બાદ ભવ્ય રોડ શો યોજાયો હતો. જેની એક ઝલક જોવા માટે લાખોની સંખ્યામાં ગુજરાતીઓ ઉમટયાં હતા. ટ્રમ્પ-PM મોદીનો મેગા રોડ શો 22 કિમી સુધી લાંબો હતો.

અમેરિકન રાષ્ટ્રપતિ ડોનાલ્ડ ટ્રમ્પે સાબરમતી આશ્રમની લીધી હતી મુલાકાત

અમેરિકન રાષ્ટ્રપતિ ડોનાલ્ડ ટ્રમ્પના સ્વાગતમાં સાબરમતી આશ્રમને સજાવવામાં આવ્યો છે. ત્યારે પીએમ મોદી, અમેરિકન રાષ્ટ્રપતિ ડોનાલ્ડ ટ્રમ્પ, મેલેનિયા ટ્રમ્પે સાબરમતી આશ્રમની મુલાકાત લીધી હતી. અહીં તેમણે પરંપરા અનુસાર પોતાના બુટ ઉતારીને આશ્રમમાં પ્રવેશ કર્યો હતો.

અમેરિકાના રાષ્ટ્રપતિ ડોનાલ્ડ ટ્રમ્પનું ગાંધી આશ્રમમાં ખેસ પહેરાવીને સ્વાગત કરવામાં આવ્યું હતું. મોદી હ્રદય કુંજમાં ટ્રમ્પના ગાઇડ બન્યા. પીએમ મોદી અને ટ્રમ્પે ગાંધીજીની તસ્વીરને સૂતરની આંટી પહેરાવી વંદન કર્યા. ત્યાર બાદ ગાંધીજીના ચરખાને પણ કાત્યો હતો. આ પ્રસંગે મેલેનિયા ટ્રમ્પે પણ ચરખો કેવી રીતે ચાલે છે તે નિહાળ્યું હતું. તો સમગ્ર મુલાકાતમાં વડાપ્રધાન મોદી તેમના ગાઈડ બન્યા હતા. 

ગાંધી આશ્રમની વિઝીટર બૂકમાં ટ્રમ્પે ખાસ મેસેજ પણ લખ્યો હતો. ટ્રમ્પે લખ્યું કે મારા મિત્ર નરેન્દ્ર મોદીનો અદભુત મુલાકાત બદલ આભાર.