વઢવાણ બેઠક પર ત્રિપાંખિયા જંગમાં કોંગ્રેસે તરૂણ ગઢવી પર વિશ્વાસ વ્યક્ત કર્યો હતો, જ્યારે ગઢવીની સામે ભાજપે જગદીશ મકવાણાને તક આપી હતી
વઢવાણ વિધાનસભા બેઠક પર ભાજપના જગદીશ મકવાણાની જીત
વઢવાણ બેઠક પર ત્રિપાંખિયો જંગ જામ્યો હતો
7 ટર્મથી વઢવાણ બેઠક પર ભાજપનો દબદબો
સુરેન્દ્રનગર જિલ્લામાં આવતી વઢવાણ વિધાનસભા બેઠક પર ભાજપના જગદીશ મકવાણાની જીત થઈ છે. વિધાનસભા ચૂંટણીના પ્રથમ તબક્કામાં 1 ડિસેમ્બરે મતદાન થયું હતું.આ વખતે વઢવાણ બેઠક પર ત્રિપાંખિયો જંગ જામ્યો હતો.વઢવાણ બેઠક પરથી કોંગ્રેસે તરૂણ ગઢવી પર વિશ્વાસ વ્યક્ત કર્યો હતો, જ્યારે ગઢવીની સામે ભાજપે જગદીશ મકવાણાને તક આપી હતી. આ સાથે જ ગુજરાતની ચૂંટણીમાં પુરી તાકાત લગાવી રહેલી આમ આદમી પાર્ટી વતી હિતેશ પટેલ (બજરંગ)ને ચૂંટણીના મેદાનમાં ઉતારવામાં આવ્યા હતા.
ગત ચૂંટણીનું વઢવાણ સીટનું પરિણામ
2017ની વિધાનસભા ચૂંટણીની વાત કરીએ તો ભાજપની ટિકિટ પર ચૂંટણી લડેલા ધનજીભાઈ પટેલ (મેકસન)એ કોંગ્રેસના ઉમેદવાર પટેલ મોહનભાઈ ડાહ્યાભાઈને 19,524 મતોના માર્જિનથી હરાવ્યા હતા. 2017ની ચૂંટણીમાં ધનજીભાઈને 89,595 મત મળ્યા હતા જ્યારે મોહનભાઈને 70,071 લોકોનું સમર્થન પ્રાપ્ત થયું હતું. NOTA 1312 મતો સાથે પાંચમા નંબરે હતી.
મતદારોના સમીકરણ
વઢવાણ વિધાનસભા બેઠકમાં કુલ 2,00,802 મતદારો છે. આ વિધાનસભા બેઠક પર તળપદા અને ચુવાળીયા કોળી ઉપરાંત દલિત, મુસ્લિમ, રાજપૂત અને જૈન સમાજના મતદારો છે. 14.11 ટકા તળપદા કોળી, 4.36 ટકા ચુવાળીયા કોળી, 5.82 ટકા પટેલ, 12.30 ટકા દલિત, 10 ટકા મુસ્લિમ, 8.62 ટકા રાજપૂત અને 8.90 ટકા જૈન મતદારો છે.
7 ટર્મથી વઢવાણ બેઠક પર ભાજપનો દબદબો
ભાજપ સતત 7 ટર્મથી આ બેઠક પર જીતતું આવ્યું છે. 1990થી 1995 બે ટર્મ સુધી ભાજપના રણજીતસિંહ ઝાલા જીત્યા હતા. 1998 અને 2002માં ધનરાજભાઈ કેલા વઢવાણ બેઠક પરથી જીત્યા હતા. 2007 અને 2012માં વર્ષાબેન દોશીનો વિજય થયો હતો. તો ભાજપે 2017માં ધનજી પટેલને ટિકિટ આપી હતી. તેઓનો વિજય થયો હતો. આ વખતે ભાજપે જગદીશ મકવાણા પર વિશ્વાસ મૂક્યો હતો.