પ્લાસ્ટિક પર પ્રતિબંધ / ક્રાંતિઃ પોરબંદરને સ્વચ્છ રાખવા પ્લાસ્ટિકની ખરીદી શરૂ કરી, વલસાડમાં 50 હજારનો દંડ ફટકાર્યો

• પોરબંદર અને વલસાડમાં ક્રાંતિ
• વલસાડમાં પ્રતિબંધિત પ્લાસ્ટિકનો જથ્થો રાખનારને 50 હજાર સુધીનો દંડ ફટકાર્યો
• પ્લાસ્ટીકની બોટલ અને પ્લાસ્ટિકની કોથળીના મળશે પૈસા

પ્લાસ્ટિકના કારણે અનેક સમસ્યા સર્જાય રહી છે. ત્યારે વડાપ્રધાન નરેન્દ્ર મોદીએ દેશને પ્લાસ્ટિક મુક્ત બનાવા આહ્વાન કર્યું છે. ત્યારે ગાંધીભૂમિ પોરબંદરને પ્લાસ્ટીક મુક્ત બનાવવાની ખાસ ઝુંબેશ શરૂ કરી છે. પોરબંદર નગરપાલીકા દ્વારા પ્લાસ્ટિક રીકવર સેન્ટર એટલ કે એમઆરએફ સેન્ટર ત્રણ સ્થળો એ શરૂ કર્યા છે. જેમા પ્લાસ્ટીકની બોટલના એક કિલોના રૂપિયા ૧૦ જ્યારે ઝબલા તથા દુધની કોથળીના એક કીલોના રૂપિયા ૪, વેફરની કોથળીના એક કિલોના રૂપિયા ૧ તેમજ ફુડ-પેકટની કોથળીના રૂપિયા ૧ આપવામાં આવશે. આ રીતે પોરબંદરને પ્લાસ્ટિક મુક્ત બનાવા માટે કલેકશન સેન્ટર શરૂ કરવામાં આવ્યું. આ ઉપરાંત ર૭ ઓકટોબર સુધી પ્લાસ્ટિક મુક્તિને લઈ વિવિધ કાર્યક્રમોનું આયોજન કરવામાં આવ્યું છે.

શ્રમિકોને વળતર પણ મળી રહેશે

દેશને પ્લાસ્ટીક મુક્ત બનાવવા માટેની ઝુંબેશ શરૂ કરવામાં આવી છે. શહેરના વિવિધ વિસ્તારમાં કચરો એકત્રીત કરતા લોકોને પ્લાસ્ટીક માટે ખાસ વળતર આપવામાં આવ્યુ છે. તેમજ તેમના આરોગ્યને નુકશાન ન થાય તે માટે શ્રમિકોને હેડગ્લોઝ પણ આપવામાં આવ્યુ છે. પ્લાસ્ટિક વિણતા શ્રમિકોને વળતર પણ મળી રહેશે.

પોરબંદરમાં સૌ પ્રથમ પ્લાસ્ટિક કલેકશન શરૂ કરવામાં આવ્યુ છે. હવે પોરબંદર શહેર પ્લાસ્ટિક મુક્ત બનશે અને પ્લાસ્ટિક મુકિત અંગે જનજાગૃતિના કાર્યક્રમો પણ યોજવામાં આવશે.

અહીં ક્લિક કરો... મનુષ્યો અને પ્લાસ્ટિક : એક ઝેરીલી પ્રેમ કથા 

વલસાડમાં પ્રતિબંધિત પ્લાસ્ટિકનો જથ્થો રાખનારને 50 હજાર સુધીનો દંડ ફટકાર્યો

વલસાડ પાલિકા વિસ્તારમાં પાલિકાએ પ્લાસ્ટિક પર પ્રતિબંધ મૂક્યા બાદ હવે તેનો કડકાઈથી અમલ માટે કામગીરી પણ હાથ ધરવામાં આવી રહી છે. પ્લાસ્ટિક પર પ્રતિબંધ સંદર્ભે પાલિકાએ હાથ ધરેલી કાર્યવાહી દરમ્યાન 400 કિલોથી વધુ પ્રતિબંધિત પ્લાસ્ટિકની વસ્તુઓ ઝડપી પાડી હતી. સાથે જ પ્રતિબંધિત પ્લાસ્ટિકનો જથ્થો રાખનાર વેપારીઓ અને દુકાનદારો વિરુદ્ધ કડક કાર્યવાહીના ભાગરૂપે રૂપિયા 50 હજારથી વધુનો દંડ પણ ફટકારવામાં આવ્યો છે.

કાર્યવાહીના ભાગરૂપે વલસાડ નગરપાલિકા દ્વારા છેલ્લા બે દિવસમાં શહેરના જુદા-જુદા વિસ્તારોમાં અલગ અલગ ટીમ બનાવી પ્રતિબંધિત પ્લાસ્ટિકની થેલીઓ, ગ્લાસ સહિતની અનેક વસ્તુઓ અંગે તપાસ કરવામાં આવી હતી. પાલિકાની ટીમોએ શહેરના બંદર રોડ, તાઈવાડ, છીપવાડ, શાકભાજી માર્કેટ, તિથલ રોડ, હાલર, સ્ટેડિયમ રોડ, સ્ટેશન રોડ સહિતના અનેક વિસ્તારોમાં તપાસ કરી અંદાજે 400 કિલો કરતા વધારે પ્રતિબંધિત પ્લાસ્ટિકનો જથ્થો કબ્જે કર્યો હતો.

પ્રતિબંધિત પ્લાસ્ટિકનો જથ્થો રાખનાર દુકાનદારો અને વેપારીઓ પાસેથી 50 હજાર રૂપિયા કરતાં પણ વધારેની દંડની રકમ વસૂલ કરી પ્રતિબંધિત પ્લાસ્ટિકનો જથ્થો રાખનાર વિરુદ્ધ લાલ આંખ કરતા દુકાનદારોમાં ફફડાટ વ્યાપી ગયો હતો.