નવી દિલ્હી: ડિજિટલ પેમેન્ટને પ્રોત્સાહિત કરવા માટે 15 ડિસેમ્બરથી તમામ વાહનો પર ફાસ્ટેગ ફરજિયાત કરી દેવામાં આવેલ છે. હવે આ દરમિયાન નરેન્દ્ર મોદી સરકાર પાર્કિંગ માટે પણ ફાસ્ટેગ ફરજિયાત કરવાની તૈયારી કરી રહી છે. અહેવાલો અનુસાર પાઇલટ પ્રોજેક્ટ હેઠળ હૈદરાબાદ એરપોર્ટ પર પાર્કિંગ પેમેન્ટમાં પણ ફાસ્ટેગના ઉપયોગની શરૂઆત થઇ ગઇ છે. તેને ફાસ્ટેગ 2.0 કહેવામાં આવશે.
ટોલબૂથ બાદ હવે પાર્કિંગમાં પણ ફાસ્ટેગ ફરજિયાત કરવાની તૈયારી
પાઈલટ પ્રોજેક્ટ તરીકે એરપોર્ટ પર પાર્કિંગ માટે પણ ફાસ્ટેગનો અમલ
પ્રથમ તબક્કામાં માત્ર પરીક્ષણ કરવામાં આવશે
ફાસ્ટેગ ૨.૦ દ્વારા પાર્કિંગ પેમેન્ટ, પેટ્રોલ-ડીઝલનું પેમેન્ટ, ઇ-ચલણનું પેમેન્ટ વગેરે કાર્યો કરી શકાશે. માર્ગ પરિવહન અને હાઇવે મંત્રાલયના જણાવ્યા અનુસાર આ પાઇલટ પ્રોજેક્ટની શરૂઆત બે તબક્કામાં કરવામાં આવી છે.
પ્રથમ તબક્કામાં માત્ર પરીક્ષણ કરવામાં આવ્યું છે
પ્રથમ તબક્કામાં માત્ર પરીક્ષણ કરવામાં આવ્યું છે. પરીક્ષણ દરમિયાન માત્ર આઇસીઆઇસીઆઇ ટેગનો ઉપયોગ કરવામાં આવશે. બીજા તબક્કામાં ફાસ્ટેગનો ઉપયોગ હૈદરાબાદ એરપોર્ટ પર પાર્કિંગ હેતુસર કરવામાં આવશે. તેમાં અન્ય બેન્કોના પણ ટેગને રાખવામાં આવશે. હૈદરાબાદ પ્રોજેક્ટની શરૂઆત દિલ્હી એરપોર્ટ પર કરવામાં આવશે. આ ઉપરાંત એસબીઆઇ, એક્સિસ બેન્ક, એચડીએફસી બેન્ક અને આઇડીએફસી બેન્ક મુંબઇ અને બેંગલુરુ એરપોર્ટ સત્તાવાળા સાથે પણ વાતચીત કરી રહી છે અને ત્યાર બાદ કેટલાક મોલમાં પણ પાર્કિંગ માટે ફાસ્ટેગ-૨ની શરૂઆત કરવામાં આવશે.
ફાસ્ટેગ એ રેડિયો ફ્રીકવન્સી આઇડેન્ટિફિકેશન ટેગ છે
ફાસ્ટેગ એ રેડિયો ફ્રીકવન્સી આઇડેન્ટિફિકેશન ટેગ છે, જે ગાડીના વિન્ડ સ્ક્રીન પર લગાવવામાં આવે છે. વાહનો પર લગાવવામાં આવેલ આ ટેગ ઇલેક્ટ્રોનિક રીતે વાંચવામાં આવે છે. સરળ ભાષામાં કહીએ તો ટોલ પ્લાઝા પર લાગેલા કેમેરા તેને સ્કેન કરી લે છે. ત્યાર બાદ તમારા ખાતામાંથી રકમ ડેબિટ થઇ જાય છે.