એક વેબસાઇટ પર એવા સમાચાર પ્રકાશિત થયા હતા કે ભારત સરકારે ઝૂમ એપ્લિકેશનની સ્પર્ધામાં દેશી વીડિયો કોન્ફરન્સિંગ સે-નમસ્તે શરૂ કરી છે. નમસ્તે એપના સમાચાર વાયરલ થયા પછી પ્રેસ ઇન્ફર્મેશન બ્યુરો (PIB)ની ફેક્ટ ચેકિંગ ટીમે આવી કોઈ પણ એપ લોંચ થવાની હોવાનો ઇન્કાર કર્યો છે.PIBએ જણાવ્યું છે કે સરકારે આ નામ હેઠળ કોઈ વીડિયો કોન્ફરન્સિંગ એપ્લિકેશન શરૂ કરી નથી.
વેબસાઇટ પર એવા સમાચાર પ્રકાશિત થયા હતા કે સે નમસ્તે એપ્લિકેશન હાલમાં બીટા વર્ઝન પર છે
PIBએ જણાવ્યું છે કે સરકાર આવી એપ્લિકેશનને સમર્થન પણ આપતી નથી
લોકડાઉન દરમિયાન સમગ્ર વિશ્વમાં ઝૂમ સહિતની વીડિયો કોન્ફરન્સ એપ્લિકેશનનો વ્યાપકપણે ઉપયોગ કરવામાં આવી રહ્યો છે. પરંતુ તાજેતરમાં ઝૂમ એપ ના પાંચ લાખ એકાઉન્ટ્સ હેક થયા હતા. તે પછી ભારત સરકારે ઝૂમ એપ ના ઉપયોગ અંગે ચેતવણી આપી હતી. ઝૂમ એપના CEOએ પણ પ્રાઇવસીની સમસ્યા હોવાનું સ્વીકાર્યું હતું અને ખાતરી આપી હતી કે આ ખામીને જલ્દી ઠીક કરવામાં આવશે.
દરમિયાન, ભારતની એક વેબસાઇટ પર એવા સમાચાર પ્રકાશિત થયા હતા કે ભારત સરકારે ઝૂમ એપ્લિકેશનની સ્પર્ધામાં દેશી વીડિયો કોન્ફરન્સ સે-નમસ્તે શરૂ કરી છે. રિપોર્ટમાં કહેવામાં આવ્યું છે કે સે નમસ્તે એપ્લિકેશન હાલમાં બીટા વર્ઝન પર છે. તેનું ફાઇનલ વર્ઝન ટૂંક સમયમાં બહાર પાડવામાં આવશે. રિપોર્ટમાં દાવો કરવામાં આવ્યો છે કે આ એપ્લિકેશન મુંબઇ સ્થિત વેબ એપ્લિકેશન અને સોફ્ટવેર કંપની ઇન્સક્રિપ્ટ દ્વારા બનાવવામાં આવી છે. આ મોબાઇલ એપ્લિકેશન યુઝર્સને મફતમાં વીડિયો કોન્ફરન્સિંગ કરવાની મંજૂરી આપે છે. સે-નમસ્તે મોબાઇલ એપ્લિકેશન ટુંક સમયમાં ગૂગલ પ્લે સ્ટોર અને એપલ સ્ટોર પરથી ડાઉનલોડ કરી શકાશે.
નમસ્તે એપના સમાચાર વાયરલ થયા પછી પ્રેસ ઇન્ફર્મેશન બ્યુરો (PIB)ની ફેક્ટ ચેકિંગ ટીમે આવી કોઈ પણ એપ લોંચ થવાની હોવાનો ઇન્કાર કર્યો છે. PIBએ જણાવ્યું છે કે સરકારે આ નામ હેઠળ કોઈ વીડિયો કોન્ફરન્સ એપ્લિકેશન શરૂ કરી નથી કે તે આવી એપ્લિકેશનને સમર્થન પણ આપતી નથી. આ એપ સ્વદેશી હોઇ શકે છે પણ સરકારે બનાવી નથી. આ એપથી યુઝર્સની પ્રાઇવસી અને ડેટાને ખતરો છે કે કેમ તેની કોઇ ઠોસ જાણકારી પણ બહાર આવી નથી.