અમદાવાદના વાડજ વિસ્તારમાં પુત્રવધૂ સાસુને તેમના બેડરૂમમાં સસરાના બિઝનેસ પાર્ટનર સાથે કઢંગી હાલતમાં જોઈ ગઈ હતી, જેથી સાસુએ આ બાબતે કોઈને જાણ કરીશ તો તને જાનથી મારી ઠેકાણે પાડી દઇશ તેવી ધમકી આપી છે.
પતિએ કહ્યું કે- 30 લાખની મદદ કરી છે એટલે માતા સાથે આડાસંબંધ રાખે છે
અમદાવાદના ચાંદખેડા વિસ્તારમાં રહેતી 30 વર્ષીય યુવતીએ પતિ તેમજ સાસરિયાં વિરુદ્ધ ફરિયાદ નોંધાવી છે. યુવતી છેલ્લા એક વર્ષથી પિયરમાં રહે છે. યુવતીનાં લગ્ન સમાજના રીતરિવાજ મુજબ વર્ષ 2017માં આશ્રમરોડ રહેતા એક યુવક સાથે થયાં હતાં. યુવતીનાં લગ્નમાં તેનાં માતા-પિતાએ 50 લાખનું કરિયાવર આપ્યું હતું. ત્યારબાદ યુવતીને થોડા દિવસ સુધી સારી રીતે રાખી હતી. ત્યારબાદ લગ્નના થોડા સમય બાદ પતિએ યુવતીને પિયરમાંથી એક્ટિવા લઈ આવવા કહ્યું હતું, જેથી યુવતીએ તેના પિતાને જાણ કરતાં પુત્રીનું ઘર ન તૂટે તે માટે પિતાએ એક્ટિવા લઈ આપ્યું હતું.
પુત્રવધુ સાસુને તેના સસરાના બિઝનેસ પાર્ટનર સાથે કઢંગી હાલતમાં જોઈ ગઈ
વર્ષ 2018માં એક દિવસ યુવતીને પાણીની તરસ લાગતાં તે તેના રૂમમાંથી બહાર આવી હતી. યુવતીના રૂમની સામે જ તેની સાસુનો બેડરૂમ હતો. યુવતી જ્યારે રસોડામાં જતી હતી ત્યારે સાસુના રૂમનો દરવાજો ખુલ્લો હતો. તે સમયે યુવતીની નજર પડતાં જ તે તેનાં સાસુને તેના સસરાના બિઝનેસ પાર્ટનર સાથે કઢંગી હાલતમાં જોઈ ગઈ હતી. દરમિયાનમાં સાસુની નજર પણ પુત્રવધૂ પર પડતાં તેણે પુત્રવધૂને ધમકી આપી કે કોઈને કહીશ તો તારી હત્યા કરાવી નાખીશ અને તને ઠેકાણે પાડી દઈશ અને કોઈને ખબર પણ નહીં પડે તેવી ધમકી આપતાં યુવતી ગભરાઈ ગઈ હતી.
પતિએ કહ્યું કે- 30 લાખની મદદ કરી છે એટલે માતા સાથે આડાસંબંધ રાખે છે
ત્યારબાદ યુવતીએ પતિને આ બાબતની જાણ કરતાં તેના પતિએ કંઈ ધ્યાન આપ્યું ન હતું અને ઝઘડો કરી ઊલટાની યુવતીને ધમકાવી હતી અને પતિએ યુવતીને એવું પણ કહ્યું કે તેના પિતાના પાર્ટનરે ભાઈને અમેરિકા મોકલવા માટે 30 લાખ રૂપિયાની મદદ કરી છે, જેના બદલામાં માતા તેમની સાથે આડા સંબંધ રાખે છે. તું તારા પિતાજીના ઘરેથી 30 લાખ રૂપિયા લેતી આવ, જેથી આ રૂપિયા પિતાના બિઝનેસ પાર્ટનરને આપી દઇશ, જેથી તે અહીંયાં આવવાનું બંધ કરી દેશે એમ કહ્યું હતું.
પતિએ આમ કહેતાં યુવતીએ પણ પતિને કહ્યું કે મારાં માતા-પિતા પાસે પૈસા નથી. યુવતીએ આમ કહેતાં બન્ને વચ્ચેનો ઝઘડો વધ્યો હતો, જોકે યુવતીએ પોતાનો સંસાર બચાવી રાખવા માટે સમાધાન કરી લીધું હતું અને તે સાસરે આવી ગઈ હતી. આ દરમિયાન પતિને કોરોના થયો હતો તેથી તે તેની સેવામાં લાગી ગઈ હતી, જોકે સાસરિયાંઓએ 30 લાખની માગણી ચાલુ રાખીને યુવતીને કાઢી મૂકી હતી. ત્યારે હવે પરિણીતાએ સાસુ, સસરા, જેઠ અને પતિ સામે શારીરિક-માનસિક ત્રાસની વાડજ પોલીસ સ્ટેશનમાં ફરિયાદ નોંધાવી છે.